ຄະນະກຳມະການທົ່ວປະເທດຂອງພັກດີໂມເກຣດອາເມຣິກາໄດ້ປະກາດໃນວັນທີ 2 ສິງຫານີ້ວ່າ ນາງຄາມາລາ ເດວີ ຮາຣິສ ຮອງປະທານາທິບໍດີອາເມຣິກາ ໄດ້ບັດຜູ້ແທນພັກຢ່າງພຽງພໍທີ່ສາມາດກາຍເປັນຜູ້ສະໝັກຮັບເລືອກຕັ້ງປະທານາທິບໍດີອາເມຣິກາຂອງພັກດີໂມເກຣດແລ້ວ.

ການລົງຄະແນນສຽງຜ່ານທາງອອນລາຍທີ່ມີຜູ້ແທນພັກດີໂມເກຣດປະມານ 4.700 ຄົນເຂົ້າຮ່ວມໄດ້ເລີ່ມຕົ້ນໃນຕອນເຊົ້າວັນທີ 1 ສິງຫານີ້ ແລະ ເມື່ອຜ່ານການລົງຄະແນນສຽງເປັນເວລາປະມານໜຶ່ງມື້ເຄິ່ງ, ທ່ານເຈມີ ຮາຣິສັນ ປະທານຄະນະກຳມະການທົ່ວປະເທດຂອງດີໂມເກຣດໄດ້ປະກາດວ່າ: ນາງຄາມາລາ ເດວີ ຮາຣິສໄດ້ບັດຜູ້ແທນພັກຢ່າງພຽງພໍທີ່ຈະໄດ້ຮັບການສະເໜີຊື່ເປັນຜູ້ສະໝັກຮັບເລືອກຕັ້ງປະທານາທິບໍດີຂອງພັກດີໂມເກຣດແລ້ວ. ຄະນະກຳມະການດັ່ງກ່າວຄາດວ່າຈະສິ້ນສຸດການລົງຄະແນນສຽງຜ່ານທາງອອນລາຍເທື່ອນີ້ໃນວັນທີ 5 ສິງຫານີ້ ແລະ ຈະປະກາດຜົນການລົງຄະແນນສຽງຢ່າງເປັນທາງການ. ທີມງານຫາສຽງເລືອກຕັ້ງຂອງນາງຮາຣິສກ່າວວ່າ: ນາງຮາຣິສໄດ້ບັດຫຼາຍກວ່າ 2.350 ບັດ ແລະ ບັນລຸເງື່ອນໄຂການສະເໜີຊື່ໃຫ້ເປັນຜູ້ສະໝັກຮັບເລືອກຕັ້ງປະທານາທິບໍດີຂອງພັກດີໂມເກຣດແລ້ວ.

ວັນທີ 21 ກໍລະກົດຜ່ານມາ, ໂດຍປະເຊີນໜ້າກັບຄວາມກົດດັນທາງການເມືອງ ແລະ ຫາງສຽງ, ທ່ານໂຈ ໄບເດນ ປະທານາທິບໍດີປະທານາທິບໍດີອາເມຣິກາ, ຊາວພັກດີໂມເກຣດໄດ້ປະກາດປະລະການລົງສະໝັກຮັບເລືອກຕັ້ງປະທານາທິບໍດີອີກສະໄໝໜຶ່ງ ທັງສະໜັບສະໜູນໃຫ້ນາງຮາຣິສເປັນຜູ້ລົງສະໝັກຮັບເລືອກຕັ້ງປະທານາທິບໍດີຂອງພັກດີໂມເກຣດ. ກອງປະຊຸມຜູ້ແທນທົ່ວປະເທດຂອງພັກດີໂມເກຣດໄດ້ກຳນົດຈະຈັດຂຶ້ນຢູ່ນະຄອນຊີຄາໂກລະຫວ່າງວັນທີ 19-22 ສິງຫານີ້ ໂດຍຈະສະເໜີຜູ້ລົງສະໝັກຮັບເລືອກຕັ້ງປະທານາທິບໍດີຂອງພັກດີໂມເກຣດຢ່າງເປັນທາງການ.