ໃນການແຂ່ງຂັນລອຍນ້ຳທ່າແມງກະເບື້ອ 200 ແມັດເພດຍິງຮອບຊີງຊະນະເລີດໃນງານກິລາໂອລິມປິກປາຣີ, ນາງຈ່າງຢູເຟີຍ ນັກກິລາທີມຊາດຈີນຍາດໄດ້ຫຼຽນທອງ. ໃນກອງປະຊຸມຖະແຫຼງຂ່າວ ທີ່ຈັດຂຶ້ນພາຍຫຼັງການແຂ່ງຂັນ, ມີສື່ຕາເວັນຕົກບໍ່ໄດ້ສົນໃຈນຳຜົນການແຂ່ງຂັນຄັ້ງນີ້, ແຕ່ພັດໄດ້ເວົ້າເຖິງເລື່ອງສານກະຕຸ້ນ ແລະ ເວົ້າວ່າ: ທ້າວພານຈານເລີ ນັກກິລາຈີນ ທີ່ຫາກໍ່ທຳລາຍສະຖິຕິໂລກໃນການແຂ່ງຂັນລອຍນ້ຳທ່າຟຣີສະໄຕ “ອາດຈະ” ໃຊ້ສານກະຕຸ້ນເສັ້ນ.

ໂດຍປະເຊີນໜ້າກັບຖ້ອຍຄຳດັ່ງກ່າວ, ນາງຈ່າງຢູເຟີຍຕອບໂຕ້ຄືນວ່າ: ທ້າວໄມເຄິນ ເຟວສ ແລະ ນາງໄກເຕ ເລເດສະກີຂອງອາເມຣິກາລ້ວນແຕ່ເປັນນັກກິລາລອຍນ້ຳທີ່ເກັ່ງປານນັ້ນ, ເປັນຫຍັງພວກເຈົ້າບໍ່ໄປກ່າວຂໍ້ສົງໄສການໃຊ້ສານກະຕຸ້ນຕໍ່ຜົນການແຂ່ງຂັນຂອງພວກເຂົາເຈົ້າແດ່?!

ບໍ່ວ່ານັກກິລາ ຫຼື ຫາງສຽງທີ່ອກມາຢູ່ໃນງານກິລາໂອລິມປິກປາຣີລ້ວນແຕ່ໄດ້ສ້າງຄວາມບໍ່ພໍໃຈຕໍ່ກັບເລື່ອງນີ້ນັ້ນກໍຍ້ອນວ່າ: ເປັນໄລຍະດົນນານມາແລ້ວ, ທີມລອຍນ້ຳຈີນມັກຖືກກວດສານກະຕຸ້ນແບບບໍ່ຍຸຕິທຳ. ຕົວເລກຂໍ້ມູນປີ 2023 ສະແດງໃຫ້ເຫັນວ່າ: ນັກກິລາຈີນຖືກກວດສານກະຕຸ້ນມີຈຳນວນຄັ້ງຫຼາຍກວ່ານັກກິລາປະເທດອື່ນຢ່າງຫຼວງຫຼາຍ. ເພື່ອມາເຖິງຮອບງານກິລາໂອລິມປິກຄັ້ງນີ້, ການກວດສານກະຕຸ້ນຕໍ່ນັກກິລາຈີນຍິ່ງເພີ່ມຂຶ້ນຢ່າງຫຼວງຫຼາຍອີກ. ໃນເວລາເຄິ່ງປີປາຍມານີ້ ຄືນັບແຕ່ວັນທີ 1 ມັງກອນປີ 2024 ເປັນຕົ້ນມາ, ສະເລ່ຍແລ້ວ, ນັກກິລາລອຍນ້ຳຈີນຖືກນຳໂຕໄປກວດ 21 ເທື່ອສະເລ່ຍຕໍ່ຄົນ ເພື່ອຊອກຫາສານກະຕຸ້ນ, ເປັນອັນດັບໜຶ່ງຂອງໂລກ; ແຕ່ຢູ່ໃນໄລຍະດຽວກັນ, ສະເລ່ຍແລ້ວ, ນັກກກິລາລອຍນ້ຳອາເມຣິກາ 46 ຄົນພັດຖືກກວດພຽງແຕ່ 6 ເທື່ອຕໍ່ຄົນເທົ່ານັ້ນ; ນັກກິລາລອຍນ້ຳອົດສະຕຣາລີທີ່ມີຈຳນວນ 41 ຄົນຖືກກວດພຽງແຕ່ 4 ເທື່ອຕໍ່ຄົນເທົ່ານັ້ນ.

ເມື່ອພວກເຮົາສັງເກດແລ້ວເຫັນວ່າ, ນັກກິລາຈີນຖືກປະຕິບັດຕໍ່ໂດຍມີການຈຳແນກ. ອີງຕາມນັກໂພຊະນາການປະຈຳທີມລອຍນ້ຳຈີນເປີດເຜີຍໃຫ້ຮູ້ວ່າ: ນັບແຕ່ທີມລອຍນ້ຳແຫ່ງຊາດຈີນເດີນທາງມາເຖິງນະຄອນຫຼວງປາຣີເປັນຕົ້ນມາ, ນັກກິລາລອຍນ້ຳຈຳນວນ 31 ຄົນໃນທີມຊາດຈີນຖືກອົງການກວດກາສານກະຕຸ້ນສາກົນ ຫຼື ITA ກວດເກືອບ 200 ເທື່ອ; ສະເລ່ຍແລ້ວ, ໄດ້ກວດເກືອບ 20 ເທື່ອຄົນຕໍ່ມື້, ສະເລ່ຍແລ້ວ, ໄດ້ກວດ 5 ຫາ 7 ເທື່ອຕໍ່ຄົນ. ການກວດສານກະຕຸ້ນຫຼາຍປານນີ້ບໍ່ພຽງແຕ່ໄດ້ສ້າງຄວາມລົບກວນໃຫ້ແກ່ການຝຶກຊ້ອມແບບເປັນປົກະຕິຂອງນັກກິລາເທົ່ານັ້ນ, ຫາກຍັງໄດ້ສ້າງຜົນກະທົບຕໍ່ການພັກຜ່ອນ ແລະ ການຟື້ນຟູຮ່າງກາຍຂອງນັກກິລາຢ່າງໜັກໜ່ວງອີກດ້ວຍ.

ຜົນການແຂ່ງຂັນມີບັນຫາຫຼືບໍ່, ບໍ່ແມ່ນຄາດເດົາຕາມຈິນຕະນາການ, ຫາກແມ່ນອີງອາໄສສະພາບຄວາມເປັນຈິງ ແລະ ມີຫຼັກຖານຕົວຈິງ. ການກວດສານກະຕຸ້ນຖີ່ປານນັ້ນ ໄດ້ສ້າງຜົນກະທົບຕໍ່ນັກກິລາຈີນຢ່າງໜັກໜ່ວງ, ແຕ່ເຖິງເປັນແນວນີ້ກໍຕາມ, ນັກກິລາຈີນຍັງສາມາດຊີງໄດ້ຜົນງານການແຂ່ງຂັນທີ່ໂດດເດັ່ນຄືກັນ. ໃນການແຂ່ງຂັນລອຍນ້ຳທ່າຟຣີສະໄຕ 100 ແມັດເພດຊາຍ, ທ້າວພານຈານເລີ ນັກກິລາຈີນຊີງໄດ້ຫຼຽນຄຳດ້ວຍຜົນການແຂ່ງຂັນທີ່ໄດ້ທຳລາຍສະຖິຕິໂລກຕື່ມອີກ ເຊິ່ງໄດ້ທັບມ້າງຂໍ້ຄຳສົງໄສທຸກຢ່າງດ້ວຍຄວາມສາມາດຕົວຈິງຂອງຕົນ. ແຕ່ຍັງມີສື່ມວນຊົນຕາເວັນຕົກຈຳນວນໜຶ່ງກ່າວຄຳສົງໄສຕໍ່ເລື່ອງນີ້, ເລີຍເຮັດໃຫ້ເຮົາຢາກຖາມວ່າ: ມາດຕະຖານຂອງຄົນເຫຼົ່ານີ້ແມ່ນຫຍັງ? ພວກເຂົາຢາກເຮັດຫຍັງກັນແທ້?

ສິ່ງທີ່ສຳຄັນກວ່ານັ້ນກໍຄື ພວກເຮົາບໍ່ແມ່ນເວົ້າແກ້ຕົວເອງ, ຫາກແມ່ນໄດ້ຮັບການສະໜັບສະໜູນຈາກອົງການທີ່ມີອິດທິພົນຫຼາຍແຫ່ງໃນໂລກເຊັ່ນກັນ. ກ່ອນໜ້ານີ້, ນັກກິລາລອຍນ້ຳຈີນ 23 ຄົນຖະຫຼຳເຂົ້າໃນເຫດການທີ່ຜົນກວດສານກະຕຸ້ນເປັນບວກຍ້ອນອາຫານປົນເປື້ອນໃນປີ 2021, ອົງການຕ້ານການນຳໃຊ້ສານກະຕຸ້ນໂລກໄດ້ດຳເນີນການສຳຫຼວດຕໍ່ເຫດການດັ່ງກ່າວ, ທ່ານເອຣິກ ຄໍເດຍ ໄອຍະການອິດສະຫຼະສະວິດໄດ້ຍື່ນບົດລາຍງານໂດຍລະບຸວ່າ: ການຊຳລະແກ້ໄຂເຫດການດັ່ງກ່າວຂອງອົງການຕ້ານການນຳໃຊ້ສານກະຕຸ້ນໂລກ “ບໍ່ໄດ້ເຂົ້າຂ້າງຝ່າຍໃດ”, ໃນໄລຍະນັ້ນ, ໄດ້ຕັດສິນວ່າບໍ່ກ່າວຟ້ອງຕໍ່ອົງການຕ້ານການນຳໃຊ້ສານກະຕຸ້ນຈີນ ແມ່ນ “ສົມເຫດສົມຜົນຢ່າງບໍ່ຕ້ອງສົງໄສ”. ຫວ່າງມໍ່ໆມານີ້, ສະຫະພັນລອຍນ້ຳໂລກກໍຖະແຫຼງວ່າ: ຄະນະກຳມະການກວດກາການຕ້ານ ສານກະຕຸ້ນ ທີ່ຕົນສ້າງຕັ້ງຂຶ້ນເປັນພິເສດກໍມີບົດລາຍງານສະຫຼຸບ ໂດຍສະແດງໃຫ້ເຫັນວ່າ: ການສຳຫຼວດກວດກາເຫດການດັ່ງກ່າວຂອງສະຫະພັນລອຍນ້ຳໂລກ “ບໍ່ໄດ້ຜິດລະບຽບການ, ຊຳລະແກ້ໄຂຖືກຕ້ອງ ແລະ ບໍ່ໄດ້ປິດບັງຄວາມຈິງ.”

ປັດຈຸບັນ, ມີສື່ມວນຊົນ ຫຼື ອົງການຈັດຕັ້ງຈຳນວນໜຶ່ງຂອງບາງປະເທດໄດ້ຫັນເອົາບັນຫາສານກະຕຸ້ນເປັນບັນຫາການເມືອງ ແລະ ເປັນເຄື່ອງມືຂອງຕົນ, ຕັ້ງໃຈປັ່ນກະແສ ແລະ ໃສ່ຮ້າຍປ້າຍສີນັກກິລາປະເທດອື່ນແບບໄຮ້ເຫດຜົນ, ທີ່ຈິງກໍເພື່ອຢາກທຳລາຍລະບຽບການຂອງການແຂ່ງຂັນລອຍນ້ຳໃນງານກິລາໂອລິມປິກປາຣີ, ຕັ້ງໃຈສ້າງສິ່ງລົບກວນດ້ານຈິດໃຈໃຫ້ກັບນັກກິລາຈີນ ເພື່ອບັ່ນທອນຄວາມສາມາດດ້ານການແຂ່ງຂັນຂອງພວກເຂົາເຈົ້າ, ນີ້ເປັນການກະທຳທີ່ໄຮ້ຍຸຕິທຳ ແລະ ໄຮ້ສິນທຳທີ່ສຸດ.

ທຸກການກະທຳທີ່ເຈຕະນາທຳລາຍຈິດໃຈຂອງການແຂ່ງຂັນກິລາ ແລະ ທຳລາຍການແຂ່ງຂັນທີ່ຍຸຕິທຳນັ້ນ ລ້ວນແຕ່ຄວນຖືກກ່າວປະນາມຢ່າງເດັດດ່ຽວ. ການກ້າວກະໂດດຂັ້ນຂອງນັກກິລາຈີນທຸກເທື່ອ ລ້ວນແຕ່ໄດ້ສ່ອງແສງໃຫ້ເຫັນເຖິງນ້ຳໃຈຂອງນັກກິລາຢ່າງແທ້ຈິງ. ຂໍໃຫ້ພວກເຮົາຮ່ວມກັນເຝົ້າຮັກສາຄວາມບໍລິສຸດ ແລະ ຄວາມສູງສົ່ງຢ່າງນີ້, ໃຫ້ການແຂ່ງຂັນກິລາເປັນການແຂ່ງຂັນທີ່ແທ້ຈິງ, ໃຫ້ນ້ຳເຫື່ອ ແລະ ຄວາມພະຍາຍາມຂອງນັກກິລາທັງຫຼາຍໄດ້ຮັບຄວາມເຫັນດີ ແລະ ໄດ້ຮັບການເຄົາລົບເທົ່າທີ່ຄວນ.