ຕອນບ່າຍວັນທີ 5 ສິງຫາ 2024, ບໍລິສັດທາງລົດໄຟລາວ-ຈີນ ໄດ້ຈັດພິທີມອບ-ຮັບໃບຢັ້ງຢືນໃຫ້ນັກຂັບລົດໄຟ ແລະ ຂັບລົດໄຟຂະບວນປະຖົມມະລືກທີ່ບັນຊາໂດຍພະນັກງານຂັບລົດໄຟຄົນລາວຮຸ່ນທໍາອິດທີ່ສະຖານີລົດໄຟນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ສະເຫຼີມໄຊ  ກົມມະສິດ, ຮອງນາຍົກລັດຖະມົນຕີ,ລັດຖະມົນຕີກະຊວງການຕ່າງປະເທດລາວພ້ອມດ້ວຍພາກສ່ວນກ່ຽວຂ້ອງທັງສອງຝ່າຍລາວ-ຈີນ.

      ເພື່ອຮັບປະກັນໃຫ້ວຽກງານທາງລົດໄຟລາວ-ຈີນມີຄຸນນະພາບສູງ, ບໍລິສັດທາງລົດໄຟລາວ-ຈີນ ຈຳກັດ ໄດ້ເປີດຮັບສະໝັກພະນັກງານຂັບລົດໄຟຄົນລາວຮຸ່ນທຳອິດຈຳນວນ 66 ຄົນ ເຂົ້າຮ່ວມຝຶກອົບຮົມພາກທິດສະດີຈາກອາຈານຝ່າຍຈີນ,ຜ່ານການອົບຮົມພາກທິດສະດີແລະລົງພາກປະຕິບັດຕົວຈິງໃນການຮ່ວມຂັບລົດໄຟເປັນໄລຍະທາງ 100.000 ກວ່າກິໂລແມັດ, ສາມາດຄັດເລືອກໄດ້ຜູ້ຂັບລົດໄຟດີເດັ່ນ   ແລະ ໄດ້ມອບໃບຢັ້ງຢືນທີ່ອອກໂດຍກະຊວງໂຍທາທິການ ແລະ ຂົນສົ່ງລາວ ແລະ ບໍລິສັດທາງລົດໄຟ ລາວ-ຈີນ ຈຳກັດໃຫ້ຈຳນວນ 14 ຄົນ.

    ທ່ານ ໄຊສົງຄາມ ມະໂນທຳ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງລາວກ່າວວ່າ:ນີ້ແມ່ນເຫດການສຳຄັນທາງປະຫວັດສາດແຫ່ງການພັດທະນາບຸກຄະລາກອນດ້ານຄົມມະນາຄົມຂອງລາວ,ແມ່ນສັນຍາລັກດ້ານຜົນງານແຫ່ງຄວາມສຳເລັດທີ່ຍິ່ງໃຫຍ່ຂອງສອງຊາດລາວ-ຈີນໃນການບຳລຸງສ້າງພະ ນັກງານທາງລົດໄຟຂອງລາວໃຫ້ມີຄວາມສາມາດເທົ່າທຽມກັບພາກພື້ນ ແລະ ສາກົນ.

     ທ່ານ ຫຼິວ ຫົງ, ຜູ້ອຳນວຍການໃຫຍ່ບໍລິສັດທາງລົດໄຟລາວ-ຈີນ ຈໍາກັດ ກ່າວວ່າ: ນີ້ແມ່ນຄວາມສຳເລັດອັນສຳຄັນຂອງການຮ່ວມມືຢ່າງຈິງໃຈ ລະຫວ່າງສອງປະເທດຈີນ-ລາວໃນການຝຶກຝົນຄວາມສາມາດໃຫ້ພະ ນັກງານດ້ານການລົດໄຟຂອງລາວເພື່ອດຳເນີນງານທາງລົດໄຟລາວ-ຈີນໃຫ້ມີຄຸນນະພາບສູງຂື້ນ.

ຫຼັງຈາກນັ້ນ,ຂະບວນລົດໄຟທີ່ຂັບໂດຍພະນັກງານຂັບລົດໄຟຄົນລາວຮຸ່ນທຳອິດໄດ້ແລ່ນອອກຈາກສະຖານີນະຄອນຫຼວງວຽງຈັນໄປສະຖານີຄຸນໝິງໃຕ້ ສປ ຈີນ.