ວັນທີ 8 ສິງຫານີ້, ທ່ານອາເລັກຊັນດາ ວູຊິກ ປະທານາທິບໍດີແຊກບີໄດ້ເຂົ້າຮ່ວມພິທີເປີດກິດຈະກຳ “ຊາວໜຸ່ມແຊກບີທ່ອງທ່ຽວເມືອງຈີນ” ທີ່ຈັດຂຶ້ນຢູ່ນະຄອນຫຼວງແບນກຣາດ. ໃນເວລາກ່າວຄຳປາໄສ, ທ່ານກ່າວວ່າ: ຫວັງໃຫ້ຊາວໜຸ່ມເຍົາວະຊົນແຊກບີທີ່ໄປຢ້ຽມຢາມຈີນນັ້ນ ນຳເອົາຄວາມຮູ້ກັບຄືນມາປະເທດ, ບໍ່ພຽງແຕ່ໄດ້ຮັບຄວາມກ້າວໜ້າສຳລັບຕົນເອງເທົ່ານັ້ນ, ຍັງສາມາດສ້າງຮັ່ງຄຸນມີໃຫ້ກັບປະເທດຊາດໄດ້ຫຼາຍກວ່າເກົ່າ.

ກິດຈະກຳເທື່ອນີ້ໄດ້ເຊີນຊາວໜຸ່ມເຍົາວະຊົນແຊກບີ 100 ຄົນໄປທ່ອງທ່ຽວປະເທດຈີນແລະແລກປ່ຽນວັດທະນະທຳເປັນໄລຍະສັ້ນ, ມີຈຸດປະສົງເພື່ອໃຫ້ເຂົາເຈົ້າສຳຜັດກັບປະຫວັດສາດແລະວັດທະນະທຳທີ່ມີມາຢ່າງຍາວນານພ້ອມທັງຜົນງານແຫ່ງການຫັນເປັນທັນສະໄໝແບບຈີນ, ແລະເພີ່ມທະວີການແລກປ່ຽນແລະການຕິດຕໍ່ພົວພັນເຊິ່ງກັນແລະກັນ.