ນ້ຳໃຕ້ດິນແຫ່ງໜຶ່ງຢູ່ເມືອງເຊັດຊູ ແຂວງໂອຊາກາຂອງຍີ່ປຸ່ນຖືກກວດພົບປະລິມານສານຟຣູໂອຣິດເກີນຄ່າມາດຕະຖານ 400 ກວ່າເທົ່າໃນປີກາຍນີ້. ຫວ່າງມໍ່ໆມານີ້, ອົງການຈັດຕັ້ງພາກປະຊາຊົນແຫ່ງໜຶ່ງໄດ້ລະດົມປະຊາຊົນ 1.000 ກວ່າຄົນທີ່ຢູ່ໃກ້ກັບແຫຼ່ງນ້ຳໄປກວດເລືອດ. ຜົນກວດເລືອດຫຼ້າສຸດສະແດງໃຫ້ເຫັນວ່າ: ຢູ່ໃນເລືອດຂອງຜູ້ກວດເລືອດປະມານ 30% ມີສານ PFAS ເກີນຄ່າມາດຕະຖານ. ສານ PFAS ເປັນສານເຄມີທີ່ລະລາຍຍາກ, ຈະສະສົມຢູ່ໃນສິ່ງແວດລ້ອມ ແລະ ຮ່າງກາຍຄົນ, ມີຄວາມສ່ຽງເຮັດໃຫ້ເປັນພະຍາດມະເຮັງ. ອົງການຈັດຕັ້ງດັ່ງກ່າວຮຽກຮ້ອງໃຫ້ລັດຖະບານຍີ່ປຸ່ນຈົ່ງນຳໃຊ້ມາດຕະການທີ່ຈຳເປັນເພື່ອແກ້ໄຂບັນຫາທີ່ເກີດຂຶ້ນ.

    ນັບແຕ່ປີກາຍນີ້ເປັນຕົ້ນມາ, ແຫຼ່ງນ້ຳຢູ່ຫຼາຍແຫ່ງຂອງຍີ່ປຸ່ນ ເຊັ່ນ: ແຂວງໂອກິນາວາ, ແຂວງໂອຊາກາ, ນະຄອນຫຼວງໂຕກຽວ ແລະອື່ນໆ ຖືກກວດພົບປະລິມານສານ PFAS ເກີນຄ່າມາດຕະຖານ, ຜົນກວດເລືອດຂອງປະຊາຊົນທີ່ຢູ່ໃກ້ແຫຼ່ງນ້ຳແມ່ນຜິດປົກກະຕິ. ຍ້ອນວ່າສະຖານທີ່ເກີດເຫດສ່ວນໃຫຍ່ແມ່ນຢູ່ໃກ້ກັບຖານທັບອາເມຣິກາປະຈຳຍີ່ປຸ່ນ ແລະ ຖານທັບກຳລັງປ້ອງກັນຕົນເອງຍີ່ປຸ່ນ, ສະນັ້ນ, ຖານທັບເຫຼົ່ານີ້ຖືກສົງໄສວ່າອາດຈະເປັນແຫຼ່ງເຮັດໃຫ້ເກີດສານ. ນອກຈາກນີ້, ໂຮງງານຈຳນວນໜຶ່ງກໍຖືກສົງໄສວ່າເປັນແຫຼ່ງເຮັດໃຫ້ເກີດສານເຊັ່ນດຽວກັນ.