ວັນທີ 12 ສິງຫານີ້, ໃນເວລາກ່າວຄຳເຫັນໃນກອງປະຊຸມຂັ້ນສູງກ່ຽວກັບການດັດແກ້ຄວາມບໍ່ຍຸຕິທຳດ້ານປະຫວັດສາດຂອງອາຟຣິກາທີ່ຈັດຂຶ້ນໂດຍສະພາຄວາມໝັ້ນຄົງອົງການສະຫະປະຊາຊາດ,ທ່ານຟູ້ຊົ່ງ ຜູ້ຕາງໜ້າຖາວອນຈີນປະຈຳອົງການສະຫະປະຊາຊາດກ່າວເນັ້ນວ່າ: ຖ້າຢາກດັດແກ້ຄວາມບໍ່ຍຸຕິທຳທີ່ອາຟຣິກາໄດ້ຮັບໃນປະຫວັດສາດນັ້ນ, ກ່ອນອື່ນໝົດຕ້ອງຄັດຄ້ານຜົນຮ້າຍທີ່ຄົງຄ້າງຂອງລັດທິລ່າເມືອງຂຶ້ນ ແລະ ການກະທຳຈາກລັດທິເຈົ້າອຳນາດຕ່າງໆ. ປະເທດຕາເວັນຕົກຄວນແບກຫາບພາລະໜ້າທີ່ຄັ້ງປະຫວັດສາດຢ່າງແທ້ຈິງ, ຍຸດຕິການກະທຳຜິດຕ່າງໆ ເຊັ່ນ: ການແຊກແຊງພາຍນອກ  ການໃຊ້ຄວາມກົດດັນ ແລະ ການລົງໂທດເປັນຕົ້ນ, ມອບອະນາຄົດຂອງອາຟຣິກາຄືນໃຫ້ກັບປະຊາຊົນອາຟຣິກາ.

    ທ່ານຟູ້ຊົ່ງກ່າວຕື່ມວ່າ: ຄວາມບໍ່ຍຸຕິທີ່ອາຟຣິກາໄດ້ຮັບນັ້ນກ່ຽວພັນເຖິງຂົງເຂດຕ່າງໆ ເຊັ່ນ: ການເມືອງ, ເສດຖະກິດ ແລະວິທະຍາສາດເຕັກໂນໂລຊີເປັນຕົ້ນ, ສະແດງໃຫ້ເຫັນໃນຫຼາຍດ້ານ ເຊັ່ນ: ສິດ, ໂອກາດ ແລະ ກົດລະບຽບເປັນຕົ້ນ. ຈີນເຫັນວ່າ, ໜ້າທີ່ທຳອິດຕ້ອງໃຫ້ການສະໜັບສະໜູນປະເທດອາຟຣິກາເດີນຕາມເສັ້ນທາງການພັດທະນາແບບຍືນຍົງ. ປະຊາຄົມໂລກຕ້ອງສະໜັບສະໜູນອາຟຣິກາບັນລຸການຫັນເປັນອຸດສາຫະກຳ ແລະ ຫັນເປັນທັນສະໄໝໂດຍໄວ, ພ້ອມກັນຊົມໃຊ້ຜົນປະໂຫຍດທີ່ມາຈາກເສດຖະກິດໂລກະວິວັດ, ເພື່ອຫຼຸດພົ້ນອອກຈາກຮອບວຽນທີ່ບໍ່ດີລະຫວ່າງຄວາມທຸກຍາກ ແລະ ຄວາມບໍ່ສະຫງົບ.