ຫວ່າງມໍ່ໆມານີ້, ສື່ມວນຊົນໄດ້ເປີດເຜີຍໃຫ້ຮູ້ວ່າ: ອົງການຕ້ານການໃຊ້ສານກະຕຸ້ນອາເມຣິກາໄດ້ມອບໃຫ້ນັກກິລາທີ່ໃຊ້ສານກະຕຸ້ນຢ່າງຜິດລະບຽບ ນັ້ນ ເປັນຜູ້ລັກເອົາຂ່າວຄ້າຂາຍຢາເສບຕິດແລະສະໜອງຂ່າວໃຫ້ພາກສ່ວນປະຕິບັດກົດໝາຍສະຫະລັດອາເມຣິກາ ໂດຍຖືເລື່ອງນີ້ເປັນເງື່ອນໄຂອະນຸຍາດໃຫ້ນັກກິລາຄົນເຫຼົ່ານີ້ເຂົ້າຮ່ວມການແຂ່ງຂັນຕໍ່ໄປໄດ້. ຕໍ່ມາ ອົງການຕ້ານການໃຊ້ສານກະຕຸ້ນໂລກໄດ້ອອກຖະແຫຼງການໂດຍລະບຸວ່າ: ການກະທຳຂອງອົງການຕ້ານການໃຊ້ສານກະຕຸ້ນອາເມຣິກາໄດ້ລະເມີດລະບຽບຫຼັກການ.

   ທ່ານ ປີແອ ເດີມອງເຕິນາດ ແພດກິລາທີ່ມີຊື່ສຽງຂອງຝຣັ່ງກ່າວວ່າ: ນັກກິລາອາເມຣິກາໄດ້ໃຊ້ສານກະຕຸ້ນມາແຕ່ດົນແລ້ວແລະໃຊ້ເປັນຈຳນວນຫຼາຍ. ໃນສະຕະວັດຜ່ານມາແມ່ນມີສະພາບໜັກໜ່ວງທີ່ສຸດ, ນັກກິລາອາເມຣິກາຫຼາຍຄົນໄດ້ໃຊ້ສານກະຕຸ້ນຢ່າງຫຼວງຫຼາຍ. ສະນັ້ນໃນເວລານັ້ນ, ນັກກິລາອາເມຣິກາໄດ້ຄອງຖານະແຊັມປຽນໂລກຈາກການແຂ່ງຂັນແລ່ນແລະລານ.

   ທ່ານ ລູກາ ໂອບັນ ຫົວໜ້າພະແນກຄົ້ນຄວ້າກິລາແລະພູມສາດການເມືອງຂອງສະຖາບັນຄົ້ນຄວ້າຍຸດທະສາດແລະການພົວພັນສາກົນປະເທດຝຣັ່ງກ່າວວ່າ: ປະເທດຕາເວັນຕົກຖືເອົາເລື່ອງຂອງນັກກິລາທີ່ບໍ່ແມ່ນຂອງປະເທດຕາເວັນຕົກແຕ່ໄດ້ຮັບຜົນສຳເລັດນັ້ນເປັນໄພຂົ່ມຂູ່ຕໍ່ຕົນເອງ, ແລ້ວໄດ້ຕັ້ງຂໍ້ສົງໄສຕໍ່ຜົນງານຂອງນັກກິລາເຫຼົ່ານີ້ ເຊິ່ງໄດ້ເປີດເຜີຍໃຫ້ເຫັນເຖິງຄວາມເຫັນອະຄະຕິໂດຍທົ່ວໄປຂອງປະເທດຕາເວັນຕົກທີ່ມີຕໍ່ປະເທດທີ່ບໍ່ແມ່ນຝ່າຍຂອງຕົນ.