ວັນທີ 11 ສິງຫານີ້ເປັນມື້ທີ່ ງານກິລາໂອລິມປິກປາຣີໄດ້ດຳເນີນມາເປັນເວລາ 19 ວັນ ແລະ ໄດ້ສິ້ນສຸດລົງແລ້ວ. ປະຊາຊົນຈີນມີຄວາມຮູ້ສຶກພາກພູມໃຈເປັນຢ່າງຍິ່ງວ່າ ຄະນະນັກກິລາທີມຊາດຈີນສາມາດຊີງໄດ້ 40 ຫຼຽນຄຳ 27 ຫຼຽນເງິນ ແລະ 24 ຫຼຽນທອງ, ເຊິ່ງເປັນຜົນງານດີທີ່ສຸດໃນປະຫວັດສາດທີ່ເຂົ້າຮ່ວມງານກິລາໂອລິມປິກລະດູຮ້ອນຢູ່ຕ່າງປະເທດ, ໄດ້ຮັບໝາກຜົນອັນອຸດົມສົມບູນໃນຜົນງານດ້ານການແຂ່ງຂັນກິລາ ແລະ ຄວາມສີວິໄລດ້ານຈິດໃຈ.

ໃນຫວ່າງບໍ່ດົນມານີ້, ໃນເວລາໃຫ້ສຳພາດຕໍ່ນັກຂ່າວ CMG, ທ່ານເອັມມານູເອວ ມາຄຣົງ ປະທານາທິບໍດີຝຣັ່ງກ່າວວ່າ, ຜົນງານທີ່ທີມຊາດຈີນຍາດມາໄດ້ໃນການແຂ່ງຂັນປິງປອງ, ການແຂ່ງຂັນການລອຍນ້ຳ ແລະລາຍການກິລາອື່ນໆ ໄດ້ຢືນຢັນວ່າ ຈີນມີຄວາມສາມາດໃນການອົບຮົມສ້າງນັກກິລາທີ່ດີເດັ່ນ, ແລະ ສາມາດກະຕຸ້ນກຳລັງໃຈໃຫ້ຄົນທັງຫຼາຍ.

ໃນງານກິລາໂອລິມປິກຄັ້ງນີ້, ນັກກິລາຜູ້ເກີດຫຼັງປີ 2000 ໄດ້ກາຍເປັນກຳລັງຫຼັກແຫຼ່ງໃນກິລາຫຼາຍປະເພດການແຂ່ງຂັນຂອງຈີນ. ເຂົາເຈົ້າຄືກັນກັບນັກກິລາຄົນຮຸ່ນກ່ອນ, ຖືເອົາກຽດຕິຍົດຂອງປະເທດຊາດໄວ້ຢູ່ຖານະສູງສຸດໃນຈິດໃຈ, ມີບຸກຄະລິກທັງມີພະລັງຊີວິດຢ່າງຟົດຟື້ນ, ໂດຍຜ່ານຈາກພວກເຂົາເຈົ້າ, ວົງການພາຍນອກສາມາດສັງເກດເຫັນເຖິງຄວາມໝັ້ນໃຈຕົນເອງ ຈິດໃຈກວ້າງຂວາງ ແລະ ຄວາມຫ້າວຫັນຂອງຊາວໜຸ່ມຈີນໃນຍຸກໃໝ່.

ເວົ້າສຳລັບໂລກແລ້ວ, ງານກິລາໂອລິມປິກເປັນຊ່ອງທາງໜຶ່ງທີ່ຮັບຮູ້ການປ່ຽນແປງ ແລະ ການພັດທະນາຂອງຈີນ. ນັບແຕ່ຄະນະນັກກິລາຈີນຍາດໄດ້ຫຼຽນຄຳຫຼຽນທຳອິດໃນປີ 1984, ຮອດປີ 2024 ຄະນະນັກກິລາຈີນໄດ້ຂຶ້ນເປັນອັນດັບທີ 1 ຮ່ວມໃນຕາຕະລາງຫຼຽນຄຳຂອງງານກິລາໂອລິມປິກປາຣີ. ຕະຫຼອດໄລຍະ 40 ປີຜ່ານມາ, ງານກິລາໂອລິມປິກໄດ້ເປັນສັກຂີພິຍານໃຫ້ແກ່ຄວາມກ້າວໜ້າດ້ານກິລາປະເພດການແຂ່ງຂັນຂອງຈີນ, ແລະເປັນສັກຂີພິຍານໃຫ້ແກ່ການເພີ່ມຂຶ້ນຂອງກຳລັງສັງລວມແຫ່ງຊາດຈີນ, ທັງເປັນສັກຂີພິຍານໃຫ້ແກ່ຈີນທີ່ໄດ້ປະກອບສ່ວນອັນສຳຄັນເຂົ້າໃນການພັດທະນາຂອງກິລາໂອລິມປິກ. ໃນອະນາຄົດ, ຈີນຈະພະຍາຍາມສ້າງຜົນງານດ້ານການແຂ່ງຂັນ ແລະ ຄວາມສີວິໄລດ້ານຈິດໃຈຫຼາຍກວ່າເກົ່າໃນສະໜາມກິລາ, ເຊີດຊູນ້ຳໃຈໂອລິມປິກ, ຊຸກຍູ້ສັນຕິພາບ ແລະຄວາມສາມັກຄີຂອງໂລກ, ປະກອບສ່ວນທັງສະຕິປັນຍາ ແລະ ກຳລັງວັງຊາຂອງຈີນຫຼາຍກວ່າເກົ່າເຂົ້າໃນຄວາມກ້າວໜ້າຂອງອະລິຍະທຳມະນຸດ.