ວັນທີ 16 ສິງຫານີ້, ສະພາຕ່ຳຂອງໄທໄດ້ຈັດກອງປະຊຸມເພື່ອລົງຄະແນນສຽງເລືອກຕັ້ງນາຍົກລັດຖະມົນຕີ. ທ່ານນາງ ແພທອງທານ ຊິນນະວັດ ຫົວໜ້າພັກເພື່ອໄທທີ່ໄດ້ຮັບການສະເໜີຊື່ໃຫ້ເປັນຜູ້ສະໝັກຮັບເລືອກຕັ້ງນາຍົກລັດຖະມົນຕີນັ້ນ ຜ່ານການລົງຄະແນນສຽງແບບເປີດເຜີຍດ້ວຍການຂານຊື່ປາກົດວ່າ: ທ່ານນາງແພທອງທານ ຊິນນະວັດ ໄດ້ຮັບການສະໜັບສະໜູນຈາກສະມາຊິກສະພາຕ່ຳຫຼາຍກວ່າເຄິ່ງໜຶ່ງດ້ວຍຄະແນນສຽງເຫັນດີ 319 ຄະແນນ ແລະ ໄດ້ຮັບເລືອກຕັ້ງເປັນນາຍົກລັດຖະມົນຕີໄທຄົນໃໝ່.

    ທ່ານນາງ ແພທອງທານ ຊິນນະວັດເກີດໃນປີ 1986, ເປັນຫົວໜ້າພັກເພື່ອໄທຄົນປັດຈຸບັນ, ແມ່ນລູກສາວຂອງທ່ານທັກສິນ ຊິນນະວັດ ອະດີດນາຍົກລັດຖະມົນຕີໄທ. ຫຼັງຈາກໄດ້ຮັບເລືອກຕັ້ງເປັນນາຍົກລັດຖະມົນຕີໄທແລ້ວ, ທ່ານນາງ ແພທອງທານ ຊິນນະວັດ ຈະກາຍເປັນນາຍົກລັດຖະມົນຕີຍິງຄົນທີສອງ ແລະ ເປັນນາຍົກລັດຖະມົນຕີທີ່ມີອາຍຸນ້ອຍທີ່ສຸດໃນປະຫວັດສາດຂອງໄທ.