ອະລິຍະທຳຈີນທີ່ມີປະຫວັດຄວາມເປັນມາຢ່າງຍາວນານໄດ້ຮັບການສືບທອດຈາກຮຸ່ນສູ່ຮຸ່ນຈົນມາເຖິງປັດຈຸບັນນີ້ໂດຍບໍ່ເຄີຍຂາດສະບັ້ນຈັກເທື່ອ ແລະໄດ້ກາຍເປັນເສົາຄ້ຳດ້ານຈິດໃຈທີ່ເຮັດໃຫ້ປະຊາຊາດຈີນຍືນຍົງຄົງຕົວຕະຫຼອດໄປ. ເມື່ອບໍ່ດົນມານີ້, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນໄດ້ໃຫ້ຄຳຊີ້ນຳສຳຄັນກ່ຽວກັບການເພີ່ມທະວີວຽກງານປົກປັກຮັກສາ, ສືບທອດ ແລະ ນຳໃຊ້ມໍລະດົກວັດທະນະທຳ ແລະ ທຳມະຊາດ, ເພິ່ນໄດ້ເນັ້ນໜັກວ່າ: ຕ້ອງເພີ່ມທະວີວຽກງານສືບທອດ ແລະ ນຳໃຊ້ມໍລະດົກ ວັດທະນະທຳ ແລະ ທຳມະຊາດຢ່າງຕໍ່ເນື່ອງ ເພື່ອເຮັດໃຫ້ເກີດມີຊີວິດຊີວາອັນໃໝ່ ແລະ ເປັ່ງລັດສະໝີໃໝ່ໃນຍຸກໃໝ່, ຕອບສະໜອງກັບຄວາມຮຽກຮ້ອງຕ້ອງການຂອງປະຊາຊົນທີ່ຢາກມີຊີວິດການເປັນຢູ່ອັນດີງາມໃຫ້ດີກວ່າເກົ່າ.

ທ່ານສີຈິ້ນຜິງແມ່ນໄດ້ໃຫ້ຄວາມເອົາໃຈໃສ່ທີ່ສຸດມາໂດຍຕະຫຼອດຕໍ່ສິ່ງປະເສີດທີ່ສຸດຂອງອະລິຍະທຳຈີນທີ່ໄດ້ຜ່ານປະຫວັດຄວາມເປັນມາຢ່າງຍາວນານ ແລະ ໄດ້ຮັບການສືບທອດຈົນມາເຖິງທຸກມື້ນີ້. ເພິ່ນໄດ້ຊີ້ນຳວ່າ: “ວັດທະນະທຳພວກເຮົາບໍ່ໄດ້ຂາດສະບັ້ນ, ມີແຕ່ໄດ້ຮັບການສືບທອດຢ່າງຕໍ່ເນື່ອງ ຈຶ່ງໄດ້ມີສິ່ງປະເສີດເຫຼົ່ານີ້ຮັກສາໄວ້ມາຈົນເຖິງທຸກມື້ນີ້, ສະນັ້ນຕ້ອງຊອກຫາທຸກວິທີທາງເພື່ອປົກປັກຮັກສາ ແລະ ທະນຸຖະໜອມໃຫ້ດີ.”

ສວນສາທາລະນະຮ່ອງຮອຍເມືອງບູຮານຫຼຽງຈູນະຄອນຫາງໂ່ຈ່ວແຂວງເຈີ້ຈ່ຽງ

ຫຼຽງຈູ ໃນພາສາຈີນ ມີຄວາມໝາຍວ່າ: “ດອນງາມກາງນ້ຳ” ເຊິ່ງຕັ້ງຢູ່ເມືອງຢວີຫາງ ນະຄອນ ຫາງໂຈ່ວ ແຂວງເຈີ້ຈ່ຽງ ທາງພາກຕາເວັນອອກສຽງໃຕ້ຂອງຈີນ. ເມື່ອ 5.000 ກວ່າປີກ່ອນ, ຢູ່ຫຼຽງຈູ ເຄີຍມີເມືອງໃຫຍ່ໂຕມະໂຫຖານແຫ່ງໜຶ່ງ ເຊິ່ງໄດ້ບົ່ມເພາະອະລິຍະທຳທີ່ຈະເລີນຮຸ່ງເຮືອງ.

   ເດືອນກໍລະກົດປີ2003, ທ່ານສີຈິ້ນຜິງ ເລຂາຄະນະພັກແຂວງເຈີ້ຈ່ຽງໃນເວລານັ້ນໄດ້ເດີນທາງໄປສຳຫຼວດຄົ້ນຄວ້າ ແລະ ເກັບກຳຂໍ້ມູນຢູ່ຮ່ອງຮອຍເມືອງບູຮານຫຼຽງຈູ. ໃນເວລານັ້ນ, ຫຼຽງຈູພວມຕົກຢູ່ໃນຄວາມຂັດແຍ້ງລະຫວ່າງການປົກປັກຮັກສາກັບການພັດທະນາ. ເນື່ອງຈາກວ່າ ຫີນແອນດີໄຊ(andesite)ຢູ່ທ້ອງຖິ່ນນັ້ນມີຄວາມແຂງ ແລະ ໝັ້ນໜຽວທີ່ສຸດ, ຈຶ່ງໄດ້ກາຍເປັນບໍ່ແຮ່ທຳມະຊາດ. ຊາວທ້ອງຖິ່ນໄດ້ລະເບີດພູເພື່ອຂຸດຄົ້ນຫີນແຮ່, ເຊິ່ງໄດ້ທຳລາຍສິ່ງແວດລ້ອມທຳມະຊາດຂອງຮ່ອງຮອຍເມືອງບູຮານຫຼຽງຈູຢ່າງໜັກໜ່ວງ. ໃນເວລາສຳຫຼວດຄົ້ນຄວ້າຄັ້ງນີ້, ທ່ານສີຈິ້ນຜິງໄດ້ເວົ້າດ້ວຍຄວາມເດັດຂາດວ່າ: “ຮ່ອງຮອຍເມືອງບູຮານຫຼຽງຈູເປັນດິນແດນສັກສິດທີ່ພິສູດໃຫ້ເຫັນເຖິງອະລິຍະທຳຈີນທີ່ມີມາເປັນເວລາ 5.000 ປີ, ເປັນຊັບສົມບັດອັນປະເສີດທີ່ຫາຍາກ, ພວກເຮົາຕ້ອງປົກປັກຮັກສາໃຫ້ດີ!”

   ຈາກນັ້ນບໍ່ດົນ,ສຽງລະເບີດພູເພື່ອຂຸດຄົ້ນບໍ່ແຮ່ໄດ້ມິດງຽບໄປ, ດິນແດນສັກສິດແຫ່ງນີ້ໄດ້ກັບຄືນສູ່ຄວາມສະຫງົບ, ພູຜາໄດ້ຟື້ນຟູສີຂຽວຄືນໃໝ່, ຮ່ອງຮອຍບູຮານສະຖານໄດ້ຟື້ນຊີບຄືນໃໝ່. ປີ2007, ເມືອງບູຮານທີ່ມີໂຄງສ້າງອັນຄົບຖ້ວນ ແລະ ມີຂະໜາດໃຫຍ່ໄດ້ປາກົດຕົວຄືນໃໝ່. ລະຫວ່າງປີ2009-2015, ລະບົບຊົນລະປະທານອ້ອມເມືອງບູຮານຫຼຽງຈູທີ່ປະກອບດ້ວຍຝາຍກັນນ້ຳ11ແຫ່ງ ກວມເນື້ອທີ່100ກິໂລຕາແມັດໄດ້ປາກົດອອກສູ່ສາຍຕາຊາວໂລກ.

ນັກທ່ອງທ່ຽວທ່ຽວຊົມຮ່ອງຮອຍເມືອງບູຮານຫຼຽງຈູ

   ປີ2019, ຢູ່ໃນກອງປະຊຸມໃຫຍ່ມໍລະດົກໂລກຄັ້ງທີ 43, ຮ່ອງຮອຍເມືອງບູຮານຫຼຽງຈູໄດ້ປະສົບຜົນສຳເລັດໃນການຮ້ອງຂໍເຂົ້າເປັນມໍລະດົກໂລກ, ຮ່ອງຮອຍເມືອງບູຮານຫຼຽງຈູທີ່ຕາງໜ້າໃຫ້ອະລິຍະທຳຈີນທີ່ມີປະຫວັດຄວາມເປັນມາ5.000 ປີ ໄດ້ຮັບການຍອມຮັບຢ່າງກວ້າງຂວາງຈາກປະຊາຄົມໂລກ.

ເມື່ອຫວນຄືນປະຫວັດຄວາມເປັນມາຈະເຫັນໄດ້ວ່າ: ສິ່ງທີ່ຄ້ຳຊູຊົນຊາດຈີນເຊິ່ງເປັນຊົນຊາດເກົ່າແກ່ກ້າວເດີນມາເຖິງທຸກມື້ນີ້, ຄ້ຳຊູອະລິຍະທຳຈີນທີ່ມີປະຫວັດຄວາມເປັນມາ5.000ກວ່າປີໃຫ້ຍືນຍົງຄົງຕົວຈົນມາເຖິງປັດຈຸບັນນັ້ນແມ່ນແຊນວັດທະນະທຳທີ່ຝັງຮາກເລິກຢູ່ໃນສາຍເລືອດຂອງຊົນຊາດຈີນ.

ທ່ານສີຈິ້ນຜິງໄດ້ຊີ້ໃຫ້ເຫັນວ່າ: “ວັດທະນະທຳຈີນທີ່ມີມູນເຊື້ອອັນດີງາມໄດ້ກາຍເປັນແຊນຂອງຊົນຊາດຈີນໂດຍຝັງຮາກເລິກຢູ່ໃນຈິດໃຈຂອງຄົນຈີນ,ສົ່ງອິດທິພົນຕໍ່ຮູບການດ້ານແນວຄິດ ແລະ ຮູບການປະພຶດຂອງຄົນຈີນແບບບໍ່ຮູ້ສຶກຕົວ”

ທ່ານສີຈິ້ນຜິງໄດ້ເນັ້ນໜັກຢູ່ເລື້ອຍໆໃຫ້ປົກປັກຮັກສາສິ່ງປະເສີດດ້ານວັດທະນະທຳໃຫ້ດີ.

ຢູ່ຝັ່ງໃຕ້ຂອງແມ່ນ້ຳຢ່າຈື ທາງທິດຕາເວັນຕົກສຽງເໜືອເມືອງກວາງຮັ້ນແຂວງເສສວນ, ຢູ່ພື້ນດິນກວມເນື້ອທີ່ກວ້າງປະມານ12ກິໂລຕາແມັດ,ຄົນບູຮານຈີນໄດ້ຝັງວັດຖຸທີ່ມີຄ່າຕ່າງໆໄວ້ເຊັ່ນ: ເຄື່ອງທອງສຳລິດ, ເຄື່ອງຢົກ, ງາຊ້າງ ແລະອື່ນໆນັບເປັນພັນເປັນໝື່ນອັນ, ນີ້ຄືຮ່ອງຮອຍບູຮານສະຖານຊ່ານຊິ່ງຕຸ່ຍ ເຊິ່ງໄດ້ຕາງໜ້າໃຫ້ໂສມໜ້າແລະລະດັບການພັດທະນາຂອງອະລິຍະທຳສູບູຮານເມື່ອຫຼາຍພັນປີກ່ອນ, ເປັນຮ່ອງຮອຍລາຊະທານີທີ່ມີເນື້ອໃນວັດທະນະທຳອຸດົມສົມບູນທີ່ສຸດ ແລະ ກວມເນື້ອທີ່ໃຫຍ່ທີ່ສຸດຢູ່ເຂດລ່ອງແມ່ນ້ຳຢາງຊີກ້ຽງໃນເວລານັ້ນ. (ທີ່ນີ້ຄຳວ່າ ສູ ໝາຍເຖິງທົ່ງພຽງເສີງຕູ່ ເຂດລ່ອງແມ່ນ້ຳມິນຈ່ຽງຢູ່ແຂວງເສສວນ)

ເດືອນກໍລະກົດປີ2023, ທ່ານສີຈິ້ນຜິງ ໄດ້ຢ້ຽມຊົມຫໍພິພິທະພັນຊ່ານຊິ່ງຕຸ່ຍທີ່ສ້າງຂຶ້ນໃໝ່

ເດືອນກໍລະກົດປີ2023, ທ່ານສີຈິ້ນຜິງ ໄດ້ເດີນທາງໄປຢ້ຽມຊົມຫໍພິພິທະພັນຊ່ານຊິ່ງຕຸ່ຍທີ່ສ້າງຂຶ້ນໃໝ່ ເພື່ອຮັບຮູ້ຂະບວນການຂຸດຄົ້ນຮ່ອງຮອຍບູຮານສະຖານຊ່ານຊິ່ງຕຸ່ຍ ແລະ ຜົນງານດ້ານອະລິຍະທຳສູບູຮານ.

ຢູ່ຫໍອະນຸລັກ ແລະ ບູລະນະວັດຖຸບູຮານຫໍພິພິທະພັນຊ່ານຊິ່ງຕຸ່ຍ, ທ່ານໂກ່ວຮັ້ນຈົ່ງ ທີ່ມີສົມຍານາມວ່າ ນາຍຊ່າງຊາດໃຫຍ່ ໄດ້ເຮັດວຽກບູລະນະວັດຖຸບູຮານມາໄດ້ເກືອບ40ປີແລ້ວ, ລາວໄດ້ເລົ່າສູ່ທ່ານສີຈິ້ນຜິງຟັງກ່ຽວກັບຂະບວນການບູລະນະຖານຮູບເທວະດາອັນໜຶ່ງ.

ທ່ານສີຈິ້ນຜິງຖາມວ່າ: “ຈັ່ງແມ່ນສະຫຼັບສັບຊ້ອນຫຼາຍເນາະ! ສະຫາຍບູລະນະວັດຖຸບູຮານອັນນີ້ໃຊ້ເວລາດົນປານໃດ?”

ທ່ານໂກ່ວຮັ້ນຈົ່ງຕອບວ່າ: “ຢ່າງໜ້ອຍຕ້ອງໜຶ່ງປີ.”

ຢູ່ຮ່ອງຮອຍບູຮານສະຖານຊ່ານຊິ່ງຕຸ່ຍຍັງມີວັດຖຸບູຮານທີ່ຫາກໍຂຸດຄົ້ນອອກມາໃໝ່ຫຼາຍກວ່າ 10.000 ອັນຄອຍຖ້າໃຫ້ອະນຸລັກ ແລະ ບູລະນະ. ສິ່ງນີ້ແມ່ນຕ້ອງເຮັດດ້ວຍຄວາມຮັບຜິດຊອບສູງແບບ “ເວລາບໍ່ຄອຍຖ້າເຮົາ” ແລະ ຄວາມອົດທົນລະອຽດອ່ອນແບບເຈາະຈົງຕັ້ງສະມາທິ.

ທ່ານສີຈິ້ນຜິງໄດ້ເວົ້າຕໍ່ວ່າ: “ວຽກນີ້ບໍ່ງ່າຍເລີຍ! ຈົ່ງເຊີດຊູຈິດໃຈທີ່ເຮັດວຽກດ້ວຍຄວາມອົດທົນຢ່າງລະອຽດແລະພາກພຽນເພື່ອໃຫ້ໄດ້ຜົນງານທີ່ປານີດ,ຄ່ອຍໆເຮັດໄປຢ່າງບໍ່ລົດລະ, ບູລະນະເປັນອັນຕໍ່ອັນ. ຂອບໃຈພວກສະຫາຍທີ່ໄດ້ປະກອບສ່ວນເຂົ້າໃນການອະນຸລັກວັດຖຸບູຮານ. ”

ຜົນງານສຳຫຼວດບູຮານຄະດີຢູ່ຮ່ອງຮອຍບູຮານສະຖານຊ່ານຊິ່ງຕຸ່ຍແມ່ນມີຊື່ສຽງໂດ່ງດັງໄປທົ່ວໂລກ ເຊິ່ງໄດ້ສະແດງໃຫ້ເຫັນເຖິງຜົນງານດ້ານອະລິຍະທຳເມື່ອ4000ກວ່າປີກ່ອນ, ໄດ້ອຳນວຍຫຼັກຖານຕົວຈິງດ້ານບູຮານນະຄະດີທີ່ເຂັ້ມແຂງກວ່າເກົ່າເພື່ອພິສູດໃຫ້ເຫັນເຖິງອະລິຍະທຳຈີນທີ່ກວມເອົາຫຼາຍເຄົ້າເຊື່ອມໂຍງເຂົ້າກັນ, ອະລິຍະທຳສູບູຮານກັບອະລິຍະທຳພາກກາງຈີນສົ່ງຜົນສະທ້ອນຕໍ່ກັນ ແລະອື່ນໆ.

   ການປົກປັກຮັກສາສິ່ງປະເສີດດ້ານວັດທະນະທຳແມ່ນສາມາດເຮັດໃຫ້ພວກມັນຄົງຕົວຢູ່ບ່ອນເກົ່າ, ສ່ວນການເຮັດໃຫ້ພວກມັນເຂົ້າເຖິງຈິດໃຈຂອງປະຊາຊົນ ເພື່ອເຮັດໃຫ້ເກີດມີຊີວີດຊີວາອັນໃໝ່ ແລະ ເປັ່ງລັດສະໝີໃໝ່ໃນຍຸກໃໝ່,ແມ່ນຕ້ອງສືບທອດແລະປະດິດສ້າງໃຫ້ດີກວ່າເກົ່າ.

ທ່ານສີຈິ້ນຜິງໄດ້ເນັ້ນໜັກວ່າ: ແຕ່ລະອະລິຍະທຳຕ່າງກໍໄດ້ສືບທອດມູນເຊື້ອດ້ານຈິດໃຈຂອງປະເທດໜຶ່ງແລະຊົນຊາດໜຶ່ງ, ບໍ່ພຽງແຕ່ຕ້ອງສືບທອດຕໍ່ກັນໄປ ແລະ ອະນຸລັກຮັກສາຈາກຮຸ່ນສູ່ຮຸ່ນເທົ່ານັ້ນ, ຍັງຕ້ອງກ້າວເດີນໄປຂ້າງໜ້າພ້ອມກັບຍຸກສະໄໝ ແລະ ກ້າປະດິດສ້າງ.

ເດືອນຕຸລາປີ2023, ທ່ານສີຈິ້ນຜິງໄດ້ເດີນທາງໄປເຄື່ອນໄຫວຢ້ຽມຢາມເຂດຖະໜົນວັດທະນະທຳປະຫວັດສາດຖາວຢາງຫຼີນະຄອນຈິງເຕີເຈີ້ນ, ເພິ່ນໄດ້ໂອ້ລົມກັບຜູ້ສືບທອດມໍລະດົກວັດທະນະທຳນາມມະທຳຢ່າງສະຫນິດສະຫນົມ

   ຢູ່ນະຄອນຈິງເຕີເຈີ້ນແຂວງຈ່ຽງຊີ່ ທາງພາກຕາເວັນອອກສຽງໃຕ້ຂອງຈີນ ເຊິ່ງເປັນເມືອງບູຮານຜະລິດເຄື່ອງເຄືອບພັນປີ, ສ່ວນຖາວຢາງຫຼີ ເປັນສູນກາງອຸດສາຫະກຳເຄື່ອງເຄືອບຂອງຈິງເຕີເຈີ້ນມາຕັ້ງແຕ່ບູຮານນະການ. ຕຳລາບູຮານຈີນເຄີຍພັນລະເຖິງສະພາບຄວາມຈະເລີນຮຸ່ງເຮືອງດ້ານການຜະລິດເຄື່ອງເຄືອບຂອງຖາວຢາງຫຼີວ່າ: “ຖະໜົນຖາວຢາງຍາວ13ລີ້ ໂຮງເຜົາເຄື່ອງເຄືອບມີເປັນແສນ.” “ເຕົາໄຟຮຸ່ງແສງທຸກຄືນ, ຜະລິດເຄື່ອງເຄືອບອອກທຸກມື້.” ເດືອນຕຸລາປີ2023, ທ່ານສີຈິ້ນຜິງໄດ້ເດີນທາງໄປເຄື່ອນໄຫວຢ້ຽມຢາມເຂດຖະໜົນວັດທະນະທຳປະຫວັດສາດຖາວຢາງຫຼີນະຄອນຈິງເຕີເຈີ້ນ, ເພິ່ນໄດ້ໄປຢ້ຽມຊົມຮ່ອງຮອຍນານລູ້, ຫໍພິພິທະພັນເຄື່ອງເຄືອບ, ກຸ່ມເຕົາໄຟຜະລິດເຄື່ອງເຄືອບສະໄໝລາຊະວົງມິງແລະລາຊະວົງຊິ່ງຕາມລຳດັບ ເພື່ອເກັບກຳຂໍ້ມູນ ແລະຮັບຮູ້ສະພາບການກ່ຽວກັບຂັ້ນຕອນຜະລິດເຄື່ອງເຄືອບ, ການສືບທອດວັດທະນະທຳເຄື່ອງເຄືອບຢ່າງມີການປະດິດສ້າງ ແລະ ການແລກປ່ຽນກັບຕ່າງປະເທດ ເປັນຕົ້ນ, ພ້ອມທັງ ໄດ້ໂອ້ລົມກັບຜູ້ສືບທອດມໍລະດົກວັດທະນະທຳນາມມະທຳຕື່ມອີກ.

   “ສະບາຍດີ ສະຫາຍນາຍຊ່າງອາວຸໂສ! ສືມີເກັ່ງຫຼາຍເດີ! ໄດ້ແຕ້ມແບບບໍ່? ຫຼືວ່າອາໄສຄວາມຊຳນິຊຳນານດ້ານສີມືພຽງຢ່າງດຽວ?”

“ຈື່ຢູ່ໃນໃຈຢ່າງດຽວ.”

   ທ່ານສີຈິ້ນຜິງຍ້ອງຍໍວ່າ:  “ສະຫາຍເປັນຜູ້ສືບທອດທີ່ດິນແດນຜືນນີ້ຫຼໍ່ລ້ຽງຂຶ້ນມາ ແລະເປັນຕົວແບບແຫ່ງຈິດໃຈນາຍຊ່າງໄດ໋.”

   ຢູ່ນະຄອນຈິງເຕີເຈີ້ນ, ມີຊາວໜຸ່ມຈຳນວນ20.000ກວ່າຄົນໄດ້ຂຸ້ນຂ້ຽວເຮັດວຽກຢູ່ແຖວໜ້າແຫ່ງການຜະລິດເຄື່ອງເຄືອບ, ເຊິ່ງຢູ່ເບື້ອງຫຼັງຂອງເຂົາເຈົ້າແມ່ນຕ່ອງໂສ້ອຸດສາຫະກຳເຄື່ອງເຄືອບອັນໃຫຍ່ຫຼວງ. ທ່ານສີຈິ້ນຜິງໄດ້ເວົ້າດ້ວຍຄວາມປະທັບໃຈວ່າ: “ດີໃຈຫຼາຍທີ່ໄດ້ເຫັນພາລະກິດເຄື່ອງເຄືອບມີຜູ້ສືບທອດຫຼາຍປານນີ້,  ຕ້ອງພັດທະນາພາລະກິດນີ້ຕໍ່ໄປຢ່າງບໍ່ຢຸດຢັ້ງ.”

   ທ່ານສີຈິ້ນຜິງຊີ້ໃຫ້ເຫັນວ່າ: ວັດທະນະທຳຈີນທີ່ມີມູນເຊື້ອອັນດີງາມມາແຕ່ບູຮານນະການຈົນເຖິງປັດຈຸບັນນີ້ແມ່ນບໍ່ເຄີຍຂາດສະບັ້ນຈັກເທື່ອ, ເຄື່ອງເຄືອບເປັນສິ່ງປະເສີດຂອງຊາດຈີນ, ເປັນສັນຍາລັກອັນສຳຄັນຂອງອະລິຍະທຳຈີນ. ຕ້ອງເຕົ້າໂຮມຜູ້ມີຄວາມຮູ້ຄວາມສາມາດດ້ານຕ່າງໆ, ເພີ່ມທະວີການອອກແບບນະວັດຕະກຳ ແລະການຄົ້ນຄວ້າພັດທະນາຢ່າງມີການປະດິດສ້າງ, ພັດທະນາອຸດສາຫະກຳເຄື່ອງເຄືອບໃຫ້ເຕີບໃຫຍ່ຂະຫຍາຍຕົວຢ່າງເຂັ້ມແຂງຕື່ມອີກ, ເພື່ອເຮັດໃຫ້ສົມຍານາມຂອງນະຄອນຈິງເຕີເຈີ້ນທີ່ເປັນ “ເມືອງບູຮານເຄື່ອງເຄືອບພັນປີ” ໂດດເດັ່ນຂຶ້ນກວ່າເກົ່າ.

ວັນທີ18ຕຸລາປີ2023 ຜູ້ຊົມກຳລັງຊົມການວາງສະແດງເຄື່ອງເຄືອບໃນງານວາງສະແດງເຄື່ອງເຄືອບສາກົນຈິງເຕີເຈີ້ນຈີນ2023

   ທຸກມື້ນີ້, ປະຕິມະກຳຜະລິດເຄື່ອງເຄືອບແບບດັ້ງເດີມໄດ້ປະສົມປະສານເຂົ້າກັບນະວັດຕະກຳດ້ານການອອກແບບໃນຍຸກປັດຈຸບັນຢ່າງບໍ່ຢຸດຢັ້ງຢູ່ໃນຕົວເມືອງແຫ່ງນີ້ ເຊິ່ງໄດ້ຊຸກຍູ້ການປະດິດສ້າງຜະລິດຕະພັນເຄື່ອງເຄືອບ. ຜະລິດຕະພັນແບບປະດິດສ້າງຊະນິດຕ່າງໆໄດ້ຮັບຄວາມນິຍົມຊົມຊອບຈາກຜູ້ບໍລິໂພກໜຸ່ມທັງຫຼາຍ, “ເມືອງບູຮານເຄື່ອງເຄືອບພັນປີ”ໄດ້ເກີດມີຊີວິດຊີວາອັນໃໝ່.

   ການລຶບລ້າງອັນເກົ່າ ແລະ ສ້າງອັນໃໝ່ຂຶ້ນມາ, ກ້າວໜ້າໄປພ້ອມກັບຍຸກສະໄໝ ກາຍເປັນເອກະລັກດ້ານຈິດໃຈຕະຫຼອດການຂອງອະລິຍະທຳຈີນ. ຄ່ານິຍົມປ່ຽນແປງໃໝ່ທີ່ເຊື່ອງຊ້ອນຢູ່ໃນລັກສະນະປະດິດສ້າງຂອງອະລິຍະທຳຈີນ ບໍ່ພຽງແຕ່ໄດ້ສືບທອດຮາກເຫງົ້າດ້ານແນວຄິດຂອງອະລິຍະທຳຈີນເທົ່ານັ້ນ, ຍັງໄດ້ຊຸກຍູ້ອະລິຍະທຳທີ່ເກົ່າແກ່ມີການຫັນປ່ຽນໃນຍຸກປັດຈຸບັນ.

ຂໍ້ຕົກລົງຂອງສູນກາງພັກຄອມມູນິດຈີນກ່ຽວກັບການລົງເລິກການປະຕິຮູບຢ່າງຮອບດ້ານຕື່ມອີກ ເພື່ອຊຸກຍູ້ຄວາມທັນສະໄໝແບບຈີນ ເຊິ່ງໄດ້ຜ່ານ ແລະຮັບຮອງເອົາຢູ່ໃນກອງປະຊຸມຄົບຄະນະຄັ້ງທີ 3 ຂອງຄະນະກຳມະການສູນກາງພັກຄອມມູນິດຈີນສະໄໝທີ 20 ໄດ້ວາງແຜນການໃໝ່ກ່ຽວກັບການສືບທອດວັດທະນະທຳຈີນທີ່ມີມູນເຊື້ອອັນດີງາມ ແລະອື່ນໆ ໂດຍກຳນົດອອກວ່າ: “ສ້າງຕັ້ງອົງການປະສານງານດ້ານການປົກປັກຮັກສາ ແລະ ສືບທອດມໍລະດົກວັດທະນະທຳ, ສ້າງຕັ້ງລະບຽບການຕິດຕາມກວດກາການປົກປັກຮັກສາມໍລະດົກວັດທະນະທຳ, ຊຸກຍູ້ການປົກປັກຮັກສາຢ່າງເປັນລະບົບ ແລະ ຕິດຕາມຄຸ້ມຄອງຢ່າງເປັນເອກະພາບຕໍ່ມໍລະດົກວັດທະນະທຳ.” “ສ້າງລະບົບເຄື່ອງໝາຍອະລິຍະທຳຈີນ”, “ບູລະນະໂຄງປະກອບ ແລະ ກົນໄກພັດທະນາວັດທະນະທຳ ແລະ ການທ່ອງທ່ຽວ”ໃຫ້ເຊື່ອມໂຍງເຂົ້າກັນຢ່າງເລິກເຊິ່ງ.”

ຢູ່ບົນຂະບວນການໃໝ່, ພາຍໃຕ້ການຊີ້ນຳຈາກແນວຄິດສີຈິ້ນຜິງດ້ານວັດທະນະທຳ, ການຊອກຫາທຸກວິທີທາງເພື່ອປົກປັກຮັກສາ ແລະ ທະນຸຖະໜອມສິ່ງປະເສີດດ້ານວັດທະນະທຳໃຫ້ດີ ພວມກາຍເປັນຄວາມຮັບຮູ້ຮ່ວມ ແລະ ພາລະກຳຂອງປະຊາຊົນຈີນ, ແຊນປະດິດສ້າງທີ່ເຊື່ອງຊ້ອນຢູ່ໃນມໍລະດົກວັດທະນະທຳໄດ້ຖືກກະຕຸ້ນອອກມາຢ່າງບໍ່ຢຸດຢັ້ງ.