ວັນທີ 15 ສິງຫານີ້, ສະພາຄວາມໝັ້ນຄົງອົງການສະຫະປະຊາຊາດໄດ້ຈັດກອງປະຊຸມກ່ຽວກັບສະຖານະການຢູ່ເຢເມນ. ທ່ານເກີງສວງ ຮອງຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດກ່າວໃນກອງປະຊຸມວ່າ: ຕ້ອງຊຸກຍູ້ໃຫ້ບັນລຸການຢຸດຍິງຢູ່ເຂດກາຊາຢ່າງຖາວອນໃນທັນທີ, ຊຸກຍູ້ໃຫ້ສະຖານະການຄວາມເຄັ່ງຕຶງຢູ່ພາກພື້ນ ລວມທັງຢູ່ເຢເມນແລະເຂດທະເລແດງຜ່ອນຄາຍລົງໂດຍໄວເທົ່າທີ່ຈະໄວໄດ້.

   ທ່ານເກີງສວງກ່າວຕື່ມວ່າ: ຈີນຊົມເຊີຍລັດຖະບານເຢເມນແລະກຸ່ມປະກອບອາວຸດຮູຕີໄດ້ກ້າວເຖິງຂັ້ນລົງນາມໃນສັນຍາກ່ຽວກັບບັນຫາການທະນາຄານແລະການບິນໃນຫວ່າງມໍ່ໆມານີ້. ຈີນຫວັງວ່າບັນດາຝ່າຍທີ່ກ່ຽວຂ້ອງຈະພິຈາລະນາເຖິງຜົນປະໂຫຍດແລະຄວາມສຸກຂອງປະຊາຊົນເຢເມນເປັນຫຼັກ, ຈັດການສົນທະນາແລະເຈລະຈາກັນເພື່ອແກ້ໄຂຂໍ້ຂັດແຍ້ງ, ພ້ອມກັນຊູກຍູ້ໃຫ້ຂະບວນການຮອບດ້ານທາງການເມືອງແມ່ນຊາວເຢເມນເປັນຜູ້ນຳພາຕົ້ນຕໍ ແລະເປັນຂອງຊາວເຢເມນເອງທັງໝົດ.

   ທ່ານເກີງສວງກ່າວເນັ້ນຕື່ມວ່າ: ສະຖານະການຢູ່ເຢເມນແລະເຂດທະເລແດງ ແມ່ນມີສ່ວນກ່ຽວຂ້ອງກັບການປະທະກັນຢູ່ເຂດກາຊາ, ຖ້າກາຊາບັນລຸການຢຸດຍິງໄດ້ຍາກ ກໍຈະເກີດຜົນກະທົບທາງລົບຕາມມາ ແລະເຮັດໃຫ້ພາກພື້ນປັ່ນປ່ວນຂຶ້ນຕື່ມອີກ. ຈີນທວງໃຫ້ບັນລຸການຢຸດຍິງຢູ່ເຂດກາຊາຢ່າງຖາວອນໃນທັນທີ, ຊຸກຍູ້ໃຫ້ສະຖານະການຄວາມເຄັ່ງຕຶງຢູ່ພາກພື້ນ ລວມທັງຢູ່ເຢເມນແລະເຂດທະເລແດງຜ່ອນຄາຍລົງໂດຍໄວເທົ່າທີ່ຈະໄວໄດ້.