ຕອນເຊົ້າວັນທີ 16 ສິງຫານີ້, ພິທີມອບ-ຮັບ ແລະເປີດນ້ຳໃຊ້ຢ່າງເປັນທາງການໂຄງການປັບປຸງແລະຍົກລະດັບໂຮງໝໍແຂວງຫຼວງພະບາງທີ່ໄດ້ຮັບການຊ່ວຍເຫຼືອຈາກຈີນ ໄດ້ຈັດຂຶ້ນຢູ່ແຂວງຫຼວງພະບາງ. ໂດຍການໃຫ້ກຽດເຂົ້າຮ່ວມຂອງ ທ່ານນາງ ຟ່າງຫົງ ເອກອັກຄະລັດຖະທູດຈີນປະຈຳລາວ, ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກລາວ, ຜູ້ຕາງໜ້າບໍລິສັດຮັບເໝົາໂຄງການ, ພ້ອມດ້ວຍຜູ້ຕາງໜ້າຝ່າຍຈີນແລະລາວ.

ໃນເວລາກ່າວຄຳປາໄສ, ທ່ານນາງ ຟ່າງຫົງ ເອກອັກຄະລັດຖະທູດຈີນປະຈຳລາວ ໄດ້ສະແດງຄວາມຂອບໃຈຕໍ່ຝ່າຍຕ່າງໆທີ່ມີສ່ວນຮ່ວມ ແລະພະນັກງານທັງສອງປະເທດ ທີ່ໄດ້ທຳຄວາມພະຍາຍາມຢ່າງດຸໝັ່ນເຂົ້າໃນການກໍ່ສ້າງໂຄງການດັ່ງກ່າວ ແລະໄດ້ຕີລາຄາຕໍ່ການສຳເລັດໂຄງການດັ່ງກ່າວເປັນຢ່າງດີ. ທ່ານນາງ ຟ່າງຫົງ ກ່າວວ່າ: ໃນການຮ່ວມມືສອງຝ່າຍຈີນ-ລາວ, ຈີນໄດ້ຍຶດໝັ້ນຖືປະຊາຊົນເປັນໃຈກາງຢ່າງສະເໝີຕົ້ນສະເໝີປາຍ, ຈັດສັນຊັບພະຍາກອນດ້ານການຮ່ວມມືເຂົ້າໃນຂົງເຂດທີ່ກ່ຽວຂ້ອງກັບຊີວິດການເປັນຢູ່ຂອງປະຊາຊົນຫຼາຍກວ່າເກົ່າ, ພະຍາຍາມເຮັດໃຫ້ຜົນງານແຫ່ງການຮ່ວມມືນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດຫຼາຍກວ່າເກົ່າ, ເຊິ່ງໂຄງການຊ່ວຍເຫຼືອຄັ້ງນີ້ແມ່ນປະຕິບັດຕາມເນື້ອໃນຈິດໃຈດັ່ງກ່າວ.

ໃນເວລາກ່າວຄຳປາໄສ, ທ່ານບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກລາວໄດ້ສະແດງຄວາມຂອບໃຈເປັນຢ່າງສູງຕໍ່ລັດຖະບານຈີນແລະບໍລິສັດກໍ່ສ້າງໂຄງການຊ່ວຍເຫຼືອໃນຄັ້ງນີ້ຢ່າງຈິງໃຈ. ທ່ານກ່າວວ່າ: ໂຄງການນີ້ຈະພັດທະນາລະດັບຫັນເປັນທັນສະໄໝຂອງໂຮງໝໍແຂວງຫຼວງພະບາງຂອງລາວໃຫ້ສູງຂຶ້ນຕື່ມອີກ, ເຊິ່ງສະແດງໃຫ້ເຫັນເຖິງການສະໜັບສະໜູນຈາກຈີນທີ່ມີຕໍ່ ພາລະກິດປັບປຸງຊີວິດການເປັນຢູ່ຂອງປະຊາຊົນລາວ ກໍ່ຄືໄມຕີຈິດມິດຕະພາບອັນເລິກເຊິ່ງຈາກປະຊາຊົນຈີນອ້າຍນ້ອງທີ່ມີຕໍ່ປະຊາຊົນລາວ.