ວັນທີ 16 ສິງຫານີ້ຢູ່ແຂວງຊຽງໃໝ່ຂອງໄທ, ລັດຖະມົນຕີກະຊວງການຕ່າງປະເທດຈີນ-ລາວ-ມຽນມາ-ໄທໄດ້ພົບປະແບບບໍ່ເປັນທາງການ.

   ໃນໂອກາດນີ້, ທ່ານ ຫວາງຢີ້ ກໍາມະການກົມການເມືອງສູນກາງພັກຄອມມູນິດຈີນ ລັດຖະມົນຕີກະຊວງການຕ່າງປະເທດຈີນກ່າວວ່າ: ຈີນ-ລາວ-ມຽນມາ-ໄທເປັນປະເທດບ້ານໃກ້ເຮືອນຄຽງ, ໄດ້ “ຮ່ວມກັນຂີ່ເຮືອລໍາດຽວ ແລະ ຮ່ວມກັນດື່ມນໍ້າໃນແມ່ນໍ້າສາຍດຽວກັນ”. ສະຖານະການຢູ່ມຽນມາໃນປັດຈຸບັນແມ່ນໜ້າເປັນຫ່ວງທີ່ສຸດ. ກ່ຽວກັບບັນຫາມຽນມາຕ້ອງຍຶດໝັ້ນ 3 ເສັ້ນພື້ນຖານ ຄື: ມຽນມາບໍ່ຄວນເກີດຄວາມວຸ້ນວາຍ ແລະ ສົງຄາມພາຍໃນ, ບໍ່ຄວນຫ່າງເຫີນຈາກເສັ້ນທາງຂອງວົງຄະນາຍາດອາຊຽນ ແລະ ບໍ່ອະນຸຍາດໃຫ້ອິດທິກໍາລັງພາຍນອກເຂົ້າມາແຊກແຊງຕາມລໍາພັງໃຈ.

   ທ່ານ ຫວາງຢີ້ ຊີ້ໃຫ້ເຫັນວ່າ: ນະໂຍບາຍມິດຕະພາບຂອງຈີນຕໍ່ມຽນມາແມ່ນຫັນໜ້າໄປສູ່ປະຊາຊົນມຽນມາທຸກທົ່ວໜ້າ. ພວກເຮົາຍຶດໝັ້ນຫຼັກການບໍ່ແຊກແຊງວຽກງານພາຍໃນມາໂດຍຕະຫຼອດ, ສະໜັບສະໜູນມຽນມາປົກປັກຮັກສາອະທິປະໄຕ ແລະ ຄວາມເປັນເອກະພາບຂອງຊາດ, ສະໜັບສະໜູນມຽນມາບັນລຸຄວາມປອງດອງພາຍໃນຊາດດ້ວຍການເຈລະຈາ ແລະ ເປິກສາຫາລື, ພ້ອມທັງສະໜັບສະໜູນມຽນມາຊອກຫາເສັ້ນທາງພັດທະນາທີ່ສອດຄ່ອງກັບສະພາບເງື່ອນໄຂຕົວຈິງຂອງປະເທດຕົນ.

   ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການຕ່າງປະເທດລາວກ່າວວ່າ: ລາວ-ຈີນ-ມຽນມາ-ໄທມີຊາຍແດນຕິດຈອດກັນ ເປັນປະເທດທີ່ຮ່ວມທຸກຮ່ວມສຸກນໍາກັນ. ລາວໃນຖານະເປັນປະເທດບ້ານໃກ້ເຮືອນຄຽງ ແລະ ເພື່ອນມິດຂອງມຽນມາ, ຫວັງວ່າມຽນມາຈະຮັກສາສະຖຽນລະພາບ ແລະ ການພັດທະນາ ພ້ອມທັງຍິນດີໃຫ້ການຊ່ວຍເຫຼືອແກ່ມຽນມາ. ການພົບປະແບບບໍ່ເປັນທາງການລະຫວ່າງ 4 ຝ່າຍໃນຄັ້ງນີ້ຈະເປັນຜົນດີຕໍ່ການຮັບຮູ້ສະຖານະການຢູ່ມຽນມາດີກວ່າເກົ່າ ເພື່ອຮ່ວມກັນຊອກຫາວິທີແກ້ໄຂທີ່ເໝາະສົມ. ລາວເຫັນດີເຫັນພ້ອມກັບຄວາມເຫັນຂອງຝ່າຍຈີນກ່ຽວກັບການຍຶດໝັ້ນຫຼັກການບໍ່ ແຊກແຊງວຽກງານພາຍໃນ, ບັນຫາມຽນມາມີພຽງແຕ່ແກ້ໄຂໂດຍປະຊາຊົນມຽນມາເທົ່ານັ້ນ ເຊິ່ງຕ້ອງປ້ອງກັນບໍ່ໃຫ້ອິດທິກໍາລັງພາຍນອກເຂົ້າມາແຊກແຊງ.