ວັນທີ 16 ສິງຫານີ້, ໂຄສົກກະຊວງການຕ່າງປະເທດຈີນໄດ້ຕອບຄໍາຖາມນັກຂ່າວກ່ຽວກັບທ່ານນາງ ແພທອງທານ ຊິນນະວັດ ໄດ້ຮັບເລືອກຕັ້ງເປັນນາຍົກລັດຖະມົນຕີໄທຄົນໃໝ່.

   ໃນໂອກາດນີ້, ໂຄສົກກະຊວງການຕ່າງປະເທດຈີນກ່າວວ່າ: ຈີນສະແດງຄວາມຊົມເຊີຍຕໍ່ທ່ານນາງ ແພທອງທານ ຊິນນະວັດ ທີ່ໄດ້ຮັບເລືອກຕັ້ງເປັນນາຍົກລັດຖະມົນຕີໄທຄົນໃໝ່, ເຊື່ອວ່າປະຊາຊົນໄທຈະໄດ້ຜົນສໍາເລັດອັນໃໝ່ໃຫຍ່ຫຼວງກວ່າເກົ່າບົນເສັ້ນທາງພັດທະນາທີ່ສອດຄ່ອງກັບສະພາບເງື່ອນໄຂຕົວຈິງຂອງປະເທດຕົນ.

   ໂຄສົກກະຊວງການຕ່າງປະເທດຈີນກ່າວຕື່ມວ່າ: ຈີນ-ໄທມີຄວາມໃກ້ຊິດກັນເໝືອນດັ່ງຄອບຄົວດຽວກັນ, ສອງປະເທດເປັນບ້ານໃກ້ເຮືອນຄຽງທີ່ດີ, ປີ 2025 ຈະເປັນປີຄົບຮອບ 50 ປີແຫ່ງການສ້າງຕັ້ງສາຍພົວພັນທາງການທູດລະຫວ່າງຈີນ-ໄທ, ການພັດທະນາສາຍພົວພັນລະຫວ່າງສອງປະເທດໄດ້ພົບພໍ້ກັບໂອກາດຄັ້ງປະຫວັດສາດອັນໃໝ່. ຈີນຍິນດີຮ່ວມກັບໄທ, ສົ່ງເສີມໄມຕີຈິດມິດຕະພາບທີ່ເປັນມູນເຊື້ອ, ເພີ່ມທະວີການສົນທະນາທາງຍຸດທະສາດ, ລົງເລິກການຮ່ວມມືທີ່ຕິດແທດຕົວຈິງ ເພື່ອຊຸກຍູ້ການສ້າງຄູ່ຮ່ວມຊາຕາກໍາຈີນ-ໄທໃຫ້ກ້າວລົງສູ່ລວງເລິກ ແລະ ບັນລຸຜົນເປັນຈິງຢ່າງບໍ່ຢຸດຢັ້ງ.