ວັນທີ 16 ສິງຫານີ້, ກອງປະຊຸມລັດຖະມົນຕີກະຊວງການຕ່າງປະເທດຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 9 ໄດ້ຈັດຂຶ້ນຢູ່ແຂວງຊຽງໃໝ່ຂອງໄທ. ທ່ານ ຫວາງຢີ້ ກຳມະການກົມການເມືອງສູນກາງພັກກອມມູນິດຈີນ, ລັດຖະມົນຕີກະຊວງການຕ່າງປະເທດຈີນ ແລະ ທ່ານນາງ ເອກສິຣິ ປິນທະຮຸຈິ ຫົວໜ້າຫ້ອງການກະຊວງການຕ່າງປະເທດໄທ ໄດ້ຮ່ວມກັນເປັນປະທານກອງປະຊຸມ, ມີທ່ານຊົກເຈັນດາ ຊົຟ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການຕ່າງປະເທດກຳປູເຈຍ, ທ່ານສະເຫຼີມໄຊ ກົມມະສິດ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການຕ່າງປະເທດລາວ, ທ່ານຕັນສຸຍ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການຕ່າງປະເທດມຽນມາ, ທ່ານນາງຫງວຽນມິ່ງຮາງ ຮອງລັດຖະມົນຕີກະຊວງການຕ່າງປະເທດຫວຽດນາມເຂົ້າຮ່ວມ.

ທ່ານຫວາງຢີ້ ກ່າວວ່າ: 6 ປະເທດຢູ່ຕາມລ່ອງແມ່ນ້ຳລ້ານຊ້າງ-ແມ່ນ້ຳຂອງແມ່ນປະເທດທີ່ “ຮ່ວມແມ່ນ້ຳສາຍດຽວກັນ, ແລະມີຊາຕາກຳທີ່ພົວພັນກັນຢ່າງສະໜິດແໜ້ນ”, ແມ່ນຄູ່ຮ່ວມມືແບບທຳມະຊາດ, ແມ່ນບ້ານໃກ້ເຮືອນຄຽງທີ່ດີຕະຫຼອດການ. ທ່ານຫວາງຢີ້ໄດ້ສະເໜີ 4 ຂໍ້ສະເໜີຂໍ້ ກ່ຽວກັບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ຄື: ໜຶ່ງ ເນັ້ນໃສ່ສັນຕິພາບແລະສະຖຽນລະພາບ, ຍຶດໝັ້ນວິໄສທັດຮ່ວມກັນ, ສອງ ເນັ້ນໃສ່ການຂັບເຄື່ອນດ້ວຍການປະດິດສ້າງໃໝ່ຫຼຸດຜ່ອນຄວາມຫຼຸດໂຕນກັນດ້ານດີຈິຕອນ, ສາມ, ເນັ້ນໃສ່ການພັດທະນາຮ່ວມກັນ ເພື່ອຍົກສູງກຳລັງແຮງຂັບເຄື່ອນໃນການພັດທະນາ, ສີ່, ເນັ້ນໃສ່ເພີ່ມທະວີຄວາມເຂົ້າໃຈກັນຂອງປະຊາຊົນ, ເພື່ອບຳລຸງສ້າງວັດທະນະທຳແມ່ນ້ຳລ້ານຊ້າງ-ແມ່ນ້ຳຂອງ.

ຝ່າຍຕ່າງໆທີ່ເຂົ້າຮ່ວມກອງປະຊຸມ ໄດ້ຕີລາຄາສູງຕໍ່ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ທີ່ໄດ້ຮັບຄວາມຄືບໜ້າຢ່າງຕັ້ງໜ້າ, ໂດຍເຫັນວ່າ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ພັດທະນາໄປຢ່າງວ່ອງໄວ,  ໂດຍໄດ້ກາຍເປັນກົນໄກທີ່ໄດ້ຮັບຜົນງານອຸດົມສົມບູນກວ່າໝູ່ແລະມີຊີວິດຊີວາຫຼາຍກວ່າໝູ່ຢູ່ໃນພາກພື້ນນີ້. ຝ່າຍຕ່າງໆໄດ້ຊົມເຊີຍຈີນໃນລະດັບສູງທີ່ໄດ້ສະໜັບສະໜູນໂຄງການຮ່ວມມືຈຳນວນຫຼວງຫຼາຍ ໂດຍຜ່ານກອງທຶນຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ເຊິ່ງໄດ້ຫຼຸດຜ່ອນຄວາມຫຼຸດໂຕນກັນດ້ານການພັດທະນາຢູ່ພາຍໃນພາກພື້ນຢ່າງບັງເກີດຜົນ, ຊຸກຍູ້ການເຊື່ອມໂຍງກັນຂອງອາຊຽນ, ພ້ອມທັງສ້າງຄວາມສຸກໃຫ້ແກ່ປະຊາຊົນປະເທດຕ່າງໆ.