ເມື່ອບໍ່ດົນມານີ້, ດ່ານທາງລົດໄຟບໍ່ຫານໄດ້ໃຫ້ບໍລິການຜູ້ໂດຍສານເປັນຈຳນວນຫຼວງຫຼາຍ ໂດຍໄດ້ກວດກາ ແລະ ອະນຸມັດໃຫ້ຜູ້ໂດຍສານຜ່ານດ່ານຫຼາຍກວ່າ 1.200 ເທື່ອຄົນໃນມື້ດຽວ ເຊິ່ງເປັນການສ້າງສະຖິຕິສູງສຸດຂອງຈຳນວນຄົນເຂົ້າ-ອອກເມືອງນັບແຕ່ມີການເປີດບໍລິການຂະບວນລົດໄຟໂດຍສານສາກົນຕາມທາງລົດໄຟຈີນ-ລາວເປັນຕົ້ນມາ.

ນັບແຕ່ເປີດແລ່ນຂະບວນລົດໄຟໂດຍສານສາກົນເປັນຕົ້ນມາ, ຂະບວນລົດໄຟນີ້ໄດ້ກາຍເປັນທາງເລືອກທີ່ນິຍົມກັນຫຼາຍຂອງຜູ້ໂດຍສານທັງພາຍໃນ ແລະ ຕ່າງປະເທດໃນການເດີນທາງໄປສຶກສາ, ດຳເນີນທຸລະກິດ ແລະ ທ່ອງທ່ຽວຢູ່ຈີນ ແລະ ລາວ ຍ້ອນການເດີນທາງດ້ວຍລົດໄຟຂະບວນນີ້ແມ່ນປະຢັດເວລາ ແລະ ສະດວກສະບາຍ. ນອກນີ້, ໃນປີ 2024 ນີ້, ຈີນໄດ້ປະຕິບັດນະໂຍບາຍຍົກເວັ້ນວີຊາຕໍ່ປະເທດຕ່າງໆນັບມື້ນັບຫຼາຍຂຶ້ນ, ທາງລົດໄຟຈີນ-ລາວໄດ້ເປີດແລ່ນຂະບວນລົດໄຟໂດຍສານສາກົນເພີ່ມອີກຄູ່ໜຶ່ງ, ດ່ານທາງລົດໄຟບໍ່ຫານກໍເປັນອີກດ່ານໜຶ່ງທີ່ນຳໃຊ້ນະໂຍບາຍຍົກເວັ້ນວີຊາໃຫ້ຜູ້ໂດຍສານຜ່ານແດນຈີນບໍ່ກາຍ 144 ຊົ່ວໂມງ ແລະ ນະໂຍບາຍຕ່າງໆທີ່ກ່ຽວຂ້ອງ, ບວກກັບການທ່ອງທ່ຽວຂ້າມຊາຍແດນ ແລະ ການທ່ອງທ່ຽວຢູ່ເຂດຊາຍແດນໃນໄລຍະພັກຮຽນລະດູຮ້ອນ, ທັງໝົດເຫຼົ່ານີ້ໄດ້ເຮັດໃຫ້ປະລິມານຜູ້ໂດຍສານເຂົ້າ-ອອກເມືອງຜ່ານດ່ານທາງລົດໄຟບໍ່ຫານເພີ່ມຂຶ້ນຢ່າງບໍ່ຢຸດຢັ້ງ.

ນັບແຕ່ເປີດບໍລິການຂະບວນລົດໄຟໂດຍສານສາກົນຕາມທາງລົດໄຟຈີນ-ລາວເປັນຕົ້ນມາ, ໄດ້ຂົນສົ່ງຜູ້ໂດຍສານ 2 ແສນ 5 ໝື່ນເທື່ອຄົນເຂົ້າ-ອອກເມືອງ, ຈຸດກວດກາຢູ່ດ່ານທາງລົດໄຟບໍ່ຫານໄດ້ກາຍເປັນດ່ານທາງລົດໄຟໃຫຍ່ທີ່ສຸດຂອງຈີນໄປສູ່ອາຊຽນ.

ເພື່ອຮັບມືກັບຜູ້ໂດຍສານຜ່ານດ່ານເປັນຈຳນວຍຫຼວງຫຼາຍ ແລະ ຍົກລະດັບຄວາມສະດວກໃນການຜ່ານດ່ານ, ພາກສ່ວນຄຸ້ມຄອງການເຂົ້າ-ອອກເມືອງຂອງບໍ່ຫານໄດ້ປະຕິບັດການກໍ່ສ້າງດ່ານອັດສະລິຍະ. ໃນດ້ານການກວດກາຄົນເຂົ້າເມືອງ, ພົນລະເມືອງຈີນລຽນແຖວຖ້າແຈ້ງເອກະສານຜ່ານດ່ານບໍ່ກາຍ 30 ນາທີ, ການເປີດ “ຊ່ອງທາງສະເພາະ” ແລະ “ຊ່ອງທາງສຸກເສີນ”, ສ້າງ ແລະ ປັບປຸງກົນໄກແຈ້ງຂໍ້ມູນເຂົ້າ-ອອກເມືອງລ່ວງໜ້າ ແລະ ກວດກາລ່ວງໜ້າ, ປະຕິບັດການຄວບຄຸມຈຳນວນຄົນເຂົ້າ-ອອກເມືອງຕາມສະພາບການ ແລະ ມາດຕະການອື່ນໆ, ເຮັດໃຫ້ປະສິດທິພາບການກວດກາຜູ້ໂດຍສານຢູ່ຕາມດ່ານໄດ້ເພີ່ມຂຶ້ນຫຼາຍກວ່າ 30%.

ທີ່ຈິງແລ້ວ, ຈຳນວນຄົນເຂົ້າ-ອອກເມືອງຜ່ານດ່ານບໍ່ຫານເປັນພາບລວມແບບຫຍໍ້ຂອງການບໍລິການກວດກາຄົນເຂົ້າ-ອອກເມືອງທີ່ມີຄຸນນະພາບສູງຂອງຈີນ. ເວົ້າສຳລັບປະເທດລາວແລ້ວ, ການຍົກລະດັບການບໍລິການກວດຄົນເຂົ້າ-ອອກເມືອງຂອງຕົນ ຈະເຮັດໃຫ້ນັກທ່ອງທ່ຽວຕ່າງປະເທດທີ່ໄປທ່ຽວລາວເພີ່ມຂຶ້ນ. ປັດຈຸບັນ, ຄຽງຄູ່ກັບການຟື້ນຕົວຄືນໃໝ່ຂອງຕະຫຼາດການທ່ອງທ່ຽວສາກົນ ແລະ ເສັ້ນທາງການບິນສາກົນ, ລາວສືບຕໍ່ຈັດກິດຈະກຳປີທ່ອງທ່ຽວ 2024, ການເຂົ້າເມືອງຂອງລາວມີຄວາມສະດວກຫຼາຍຂຶ້ນ, ການໂຄສະນາຢ່າງຕັ້ງໜ້າຂອງຫົວໜ່ວຍທຸລະກິດຢູ່ແຫຼ່ງທ່ອງທ່ຽວຕ່າງໆ, ບວກກັບການຈັດຕັ້ງປະຕິບັດນະໂຍບາຍຕ່າງໆທີ່ມີຜົນປະໂຫຍດ, ຕະຫຼາດການທ່ອງທ່ຽວຂອງລາວຍ່ອມຈະມີອະນາຄົດອັນກວ້າງຂວາງ.