ວັນທີ 22 ສິງຫານີ້, ທ່ານນາງມາວນິງ ໂຄສົກກະຊວງການຕ່າງປະເທດຈີນໄດ້ຈັດກອງປະຊຸມຖະແຫຼງຂ່າວ. ມີນັກຂ່າວຖາມວ່າ: ຕາມຂ່າວລາຍງານວ່າ, ວັນທີ 20 ສິງຫານີ້, ໂດຍແນໃສ່ຄະນະກຳມາທິການສະຫະພາບເອີຣົບໄດ້ເປີດເຜີຍຮ່າງແຜນການເກັບພາສີຕໍ່ລົດໄຟພະລັງງານໄຟຟ້າຂອງຈີນ, ສະພາການຄ້າຈີນປະຈຳສະຫະພາບເອີຣົບໄດ້ສະແດງຄວາມບໍ່ພໍໃຈຢ່າງຮຸນແຮງ ແລະ ຄັດຄ້ານຢ່າງເດັດດ່ຽວຕໍ່ການກະທຳແບບລັດທິປົກປ້ອງການຄ້າຂອງຄະນະກຳມາທິການສະຫະພາບເອີຣົບ ໂດຍກ່າວວ່າ: ມາດຕະການດັ່ງກ່າວຈະເຮັດໃຫ້ການພົວພັນດ້ານການຄ້າລະຫວ່າງຈີນກັບສະຫະພາບເອີຣົບທີ່ເຄັ່ງຕຶງຢູ່ແລ້ວນັ້ນຮ້າຍແຮງຂຶ້ນຕື່ມອີກ ແລະ ຍັງຈະສົ່ງສັນຍານດ້ານລົບທີ່ໜັກໜ່ວງຕໍ່ການຮ່ວມມື ແລະ ການພັດທະນາສີຂຽວທົ່ວໂລກ. ຂໍຖາມວ່າ ກະຊວງການຕ່າງປະເທດຈີນມີຄວາມເຫັນແນວໃດຕໍ່ເລື່ອງນີ້?

ທ່ານນາງມາວນິງກ່າວວ່າ: ມື້ວານນີ້, ຂ້າພະເຈົ້າໄດ້ກ່າວຫຼັກໝັ້ນຂອງຝ່າຍຈີນຢ່າງຈະແຈ້ງແລ້ວ. ນີ້ເປັນລັດທິປົກປ້ອງ ແລະ ການກະທຳທີ່ປະຕິບັດຕາມຫຼັກການການເມືອງທີ່ແທ້ຈິງ ເຊິ່ງຈະທຳລາຍຂະບວນການຫັນປ່ຽນໄປຕາມທິດທາງສີຂຽວຂອງສະຫະພາບເອີຣົບ ແລະ ຄວາມພະຍາຍາມການຮັບມືກັບການປ່ຽນແປງຂອງດິນຟ້າອາກດຂອງທົ່ວໂລກ. ຄວາມເຫັນຂອງວົງການອຸດສາຫະກຳ ແລະ ສະພາການຄ້າຄວນໄດ້ຮັບຄວາມເອົາໃຈໃສ່. ຈີນທວງໃຫ້ສະຫະພາບເອີຣົບຈົ່ງຮັບຟັງຄວາມເຫັນທີ່ພາວະວິໄສຂອງວົງການຕ່າງໆຢ່າງຈິງຈັງ, ດັດແກ້ການກະທຳທີ່ຜິດພາດໃນທັນທີ, ຮ່ວມແຮງຮ່ວມໃຈກັນ, ເປິກສາຫາລືແຜນການແກ້ໄຂບັນຫາທີ່ສົມເຫດສົມຜົນ ເພື່ອຫຼີກເວັ້ນບໍ່ໃຫ້ຄວາມຂັດແຍ້ງດ້ານການຄ້າລະຫວ່າງສອງຝ່າຍດຸເດືອດຂຶ້ນຕື່ມອີກ.