ວັນທີ 20 ສິງຫານີ້, ສະຫະພາບເອີຣົບໄດ້ເປີດເຜີຍຜົນການຕັດສິນສຸດທ້າຍກ່ຽວກັບການສຳຫຼວດກໍລະນີຕ້ານການອຸດໜູນຕໍ່ລົດໃຊ້ພະລັງງານໄຟຟ້າຂອງຈີນ ໂດຍຈະເກັບພາສີຕ້ານການອຸດໜູນລາຄາ 17% ຫາ 36,3% ຕໍ່ວິສາຫະກິດການຄ້າຂາອອກຂອງຈີນ. ຕໍ່ກັບເລື່ອງນີ້, ປະຊາຄົມໂລກໃຫ້ຄວາມສົນໃຈໃນລະດັບສູງ, ຫຼາຍປະເທດສະມາຊິກສະຫະພາບເອີຣົບ, ອົງການຈັດຕັ້ງ ແລະ ວິສາຫະກິດອຸດສາຫະກຳລົດ, ຄັງປັນຍາ ແລະ ນັກວິຊາການໄດ້ພາກັນສະແດງທ່າທີຂອງຕົນ ໂດຍຊີ້ອອກວ່າ: ການຕ້ານການອຸດໜູນລາຄາເທື່ອນີ້ແມ່ນເພື່ອປະຕິບັດລັດທິປົກປ້ອງດ້ວຍຂໍ້ອ້າງ “ການຄ້າສະເໝີພາບ”.

ທີ່ຈິງແລ້ວ, ເພື່ອບັນລຸຄວາມມຸ່ງໝັ້ນ “ຄວາມເປັນກາງທາງກາກບອນ” ຂອງມວນມະນຸດຮ່ວມກັນ, ໃນຫຼາຍປີມານີ້, ຫຼາຍປະເທດໄດ້ຖືເອົາ “ຜະລິດຕະພັນໃໝ່ 3 ຢ່າງ” ຄື ຜະລິດຕະພັນທີ່ໃຊ້ໃນການຜະລິດໄຟຟ້າດ້ວຍແສງຕາເວັນ, ລົດໃຊ້ພະລັງງານໄຟຟ້າ ແລະ ໝໍ້ໄຟລີທຽມ ເປັນລາຍການບຸລິມະສິດໃນການພັດທະນາອຸດສາຫະກຳ ແລະ ຕ່າງກໍໄດ້ໃຫ້ການອຸດໜູນດ້ານການເງິນຕໍ່ລົດໃຊ້ພະລັງງານໄຟຟ້າ. “ກົດໝາຍຫຼຸດເງິນເຟີ້” ຂອງອາເມຣິກາໄດ້ກຳນົດວ່າ: ລົດໃຊ້ພະລັງງານໄຟຟ້າແຕ່ລະຄັນສາມາດໄດ້ຮັບເງິນອຸດໜູນສູງສຸດ 7.500 ໂດລາ. ກ່ອນໜ້ານີ້ຫຼາຍປີ, ລັດຕ່າງໆຂອງອາເມຣິກາກໍໄດ້ໃຫ້ການອຸດໜູນດ້ານການເງິນແກ່ລົດໃຊ້ພະລັງງານໄຟຟ້າຂອງຕົນໃນລະດັບທີ່ຕ່າງກັນ, ໃນນັ້ນ, ລັດກາລີໂຟເນຍໄດ້ໃຫ້ເງິນອຸດໜູນຫຼາຍກວ່າໝູ່ ເຊິ່ງເງິນອຸດໜູນຕໍ່ຄັນບັນລຸຫຼາຍກວ່າ 10.000 ໂດລາ.

ເມື່ອທຽບກັບອາເມຣິກາ, ສະຫະພາບເອີຣົບໃຫ້ການອຸດໜູນຕໍ່ພະລັງງານໄຟຟ້າຈະມີຫຼາຍກວ່າ. ສະຫະພາບເອີຣົບເລີ່ມປະຕິບັດນະໂຍບາຍໃຫ້ການອຸດໜູນດ້ານການເງິນໃນປີ 2019 ແລະ ໄດ້ເພີ່ມອຸດໜູນໃນປີ 2020, ມຸນຄ່າເງິນອຸດໜູນຂອງປະເທດສະມາຊິກສ່ວນໃຫຍ່ຂອງສະຫະພາບເອີຣົບສະເລ່ຍແລ້ວແມ່ນ 3,000 ເອີໂຣ ຫາ 6,000 ເອີໂຣຕໍ່ຄັນ, ໃນນັ້ນ ເຢຍລະມັນມີຫຼາຍກວ່າ 6,000 ເອີໂຣ, ຝຣັ່ງ 5,000 ເອີໂຣ, ອີຕາລີ 3,000 ເອີໂຣ, ສ່ວນໂກຣອາຊີມີເຖິງ 9,291 ເອີໂຣ. ນອກນີ້, ປະເທດສະມາຊິກສະຫະພາບເອີຣົບສ່ວນໃຫຍ່ຍັງໄດ້ໃຫ້ການອຸດໜູນຕໍ່ການຕິດຕັ້ງເສົາສາກໄຟຢູ່ເຮືອນພັກສ່ວນຕົວ ແລະ ເຂດສາທາລະນະ, ອັດຕາເງິນອຸດໜູນແມ່ນຢູ່ລະຫວ່າງ 50% ຫາ 75%.

ໃນຊຸມປີຜ່ານມາ, ສະຫະພາບເອີຣົບໄດ້ປະຕິບັດ “ນະໂຍບາຍໃໝ່ສີຂຽວເອີຣົບ” “ຍຸດທະສາດໃໝ່ດ້ານອຸດສາຫະກຳເອີຣົບ” ແລະ “ແຜນການອຸດສາຫະກຳນະໂຍບາຍໃໝ່ສີຂຽວ” ໂດຍໄດ້ສຸມໃສ່ການພັດທະນາພະລັງງານສີຂຽວ ພ້ອມທັງປະຕິບັດນະໂຍບາຍອຸດໜູນຢ່າງຮອບດ້ານ ໂດຍຜ່ານກອງທຶນອຸດໜູນຢ່າງໜ້ອຍ 11 ປະເພດ ເຊັ່ນ: “ກອງທຶນຟື້ນຟູ ແລະ ຄວາມແໜ້ນໜຽວ” ແມ່ນແກນກາງຂອງແຜນການ “ສະຫະພາບເອີຣົບຮຸ່ນໃໝ່” ເຊິ່ງຂອບເຂດທີ່ເໝາະໃຊ້ໄດ້ກວມເອົາ 6 ເສົາຄ້ຳນະໂຍບາຍໃຫຍ່ ລວມທັງການຫັນປ່ຽນຕາມທິດທາງສີຂຽວ, ຕົ້ນຕໍຈະສະໜອງທຶນໃຫ້ແກ່ມາດຕະການທີ່ກ່ຽວຂ້ອງຂອງປະເທດສະມາຊິກສະຫະພາບເອີຣົບ ທີ່ປະຕິບັດລະຫວ່າງເດືອນກຸມພາປີ 2020 ຫາວັນທີ 31 ທັນວາປີ 2026, ງົບປະມານທັງໝົດມີເຖິງ 723 ຕື້ເອີໂຣ, ໃນນັ້ນ, ມີ 338 ຕື້ເອີໂຣແມ່ນບໍລິຈາກໃຫ້ປະເທດສະມາຊິກໂດຍກົງ ແລະ ອີກ 385 ຕື້ເອີໂຣແມ່ນສະໜອງໃນຮູບແບບເງິນກູ້.

ໃນຂະນະດຽວກັນ, ຢູ່ຈີນ, ຄວາມຕ້ອງການຂອງຜູ້ບໍລິໂພກຕໍ່ລົດໃຊ້ພະລັງງານໄຟຟ້າພວມຈາກການນຳພາດ້ວຍນະໂຍບາຍຫັນມາເປັນການນຳພາດ້ວຍຕະຫຼາດຢ່າງໜັກແໜ້ນ. ນະໂຍບາຍອຸດໜູນການຊື້ລົດໃຊ້ພະລັງງານໃໝ່ຂອງຈີນໄດ້ປັບຫຼຸດເງິນອຸດໜູນເປັນເວລາຫຼາຍປີ ແລະ ໄດ້ຖອນອອກຈາກຕະຫຼາດໃນວັນທີ 31 ທັນວາປີ 2022 ໃນທີ່ສຸດ. ແຕ່ກຸ່ມເສດຖະກິດຕ່າງໆຂອງອາເມຣິກາແລະເອີຣົບ ຍັງໄດ້ຊຸກຍູ້ການພັດທະນາອຸດສາຫະກຳລົດໃຊ້ພະລັງງານໃໝ່ ໂດຍຜ່ານຈາກນະໂຍບາຍຫຼຸດພາສີ ຫຼື ໃຫ້ເງິນອຸດໜູນໃນເວລາຊື້ລົດໃຊ້ພະລັງງານໃໝ່.

ເມື່ອປຽບທຽບຕົວເລກໃນອະດີດແລະປັດຈຸບັນແລ້ວ, ພວກເຮົາຍັງສາມາດເຫັນໄດ້ວ່າ: ອີງຕາມຕົວເລກສະຖິຕິຂອງກະຊວງອຸດສາຫະກຳແລະເຕັກໂນໂລຊີຂໍ້ມູນຂ່າວສານຈີນ, ລັດຖະບານຈີນໄດ້ປ່ອຍເງິນອຸດໜູນລົດໃຊ້ພະລັງງານໄຟຟ້າທັງໝົດຫຼາຍກວ່າ 150 ຕື້ຢວນ, ບວກກັບເງິນອຸດໜູນຂອງອົງການປົກຄອງທ້ອງຖິ່ນ, ເງິນອຸດໜູນທັງໝົດຂອງຈີນຕໍ່ລົດໃຊ້ພະລັງງານໃໝ່ມີປະມານ 200 ຕື້ຫາ 250 ຕື້ຢວນ. ແຕ່ວ່າ, “ກົດໝາຍຫຼຸດຜ່ອນເງິນເຟີ້” ຂອງອາເມຣິກາໄດ້ກຳນົດຢ່າງຈະແຈ້ງວ່າ: ອາເມຣິກາໃຫ້ເງິນອຸດໜູນແກ່ອຸດສາຫະກຳລົດໃຊ້ພະລັງງານມີຫຼາຍກວ່າ 300 ຕື້ໂດລາ, ເຖິງວ່າປັດຈຸບັນ, ຍັງບໍ່ສາມາດຄິດໄລ່ຍອດມູນຄ່າເງິນອຸດໜູນຂອງສະຫະພາບເອີຣົບກໍຕາມ, ແຕ່ເງິນອຸດໜູນຂອງລັດຖະບານເຢຍລະມັນພຽງປະເທດດຽວທີ່ໄດ້ໃຫ້ແກ່ລົດໃຊ້ພະລັງງານໃໝ່ແຕ່ປີ 2021 ຫາປີ 2022 ກໍມີຫຼາຍກວ່າ 5 ຕື້ໂດລາແລ້ວ. ສະນັ້ນ, ເມື່ອສັງເກດຈາກຕົວເລກອຸດໜູນແລ້ວເຫັນວ່າ, ເງິນອຸດໜູນອງຈີນແມ່ນບໍ່ຫຼາຍ, ນອກຈາກນີ້ແລ້ວ, ປັດຈຸບັນ, ສະຫະພາບເອີຣົບຍັງໄດ້ສືບຕໍ່ເພີ່ມເງິນອຸດໜູນຕື່ມອີກ.

ດ້ານໜຶ່ງ, ສະຫະພາບເອີຣົບໄດ້ໃຫ້ເງິນອຸດໜູນແກ່ການຊື້ລົດໃຊ້ພະລັງງານໃໝ່, ອີກດ້ານໜຶ່ງ, ພັດເກັບພາສີນຳເຂົ້າຕ້ານການອຸດໜູນຢ່າງສູງຕໍ່ລົດໃຊ້ພະລັງງານໄຟຟ້າຂອງຈີນ, ນີ້ແມ່ນລັດທິປົກປ້ອງການຄ້າທີ່ແທ້ຈິງ ແລະ ໄດ້ສ່ອງແສງໃຫ້ເຫັນເຖິງສອງມາດຕະຖານຂອງສະຫະພາບເອີຣົບ, ຈະບໍ່ມີຫຼັກອ້າງອີງດ້ານກົດໝາຍ ແລະ ສິນທຳ. ຈີນທວງໃຫ້ສະຫະພາບເອີຣົບຈົ່ງຮັບຟັງຄວາມເຫັນທີ່ພາວະວິໄສຂອງ ວົງການຕ່າງໆຢ່າງຈິງຈັງ, ດັດແກ້ການກະທຳທີ່ຜິດພາດໃນທັນທີ, ຮ່ວມແຮງຮ່ວມໃຈກັນ, ເປິກສາຫາລືແຜນການແກ້ໄຂບັນຫາທີ່ສົມເຫດສົມຜົນ ເພື່ອຫຼີກເວັ້ນບໍ່ໃຫ້ຄວາມຂັດແຍ້ງດ້ານການຄ້າລະຫວ່າງສອງຝ່າຍດຸເດືອດຂຶ້ນຕື່ມອີກ. ຖ້າບໍ່ດັ່ງນັ້ນ, ຈີນຈະປະຕິບັດທຸກມາດຕະການທີ່ຈຳເປັນ ເພື່ອປົກປ້ອງສິດແລະຜົນປະໂຫຍດທີ່ຊອບທຳຂອງວິສາຫະກິດຈີນຢ່າງເດັດດ່ຽວ.