ວັນທີ 22 ສິງຫານີ້, ທ່ານຟູຊົງ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ປະກອບຄຳເຫັນໃນກອງປະຊຸມເປີດເຜີຍກ່ຽວກັບບັນຫາປາເລັດສະຕິນກັບອິດສະຣາແອນ ໂດຍກ່າວເນັ້ນວ່າ: ການຫຼົງເຊື່ອຕໍ່ການບັນລຸ “ໄຊຊະນະຢ່າງສິ້ນເຊີງ” ຢູ່ເຂດກາຊາ ໂດຍຜ່ານວິທີທາງການທະຫານ ມີແຕ່ຈະເຮັດໃຫ້ປະຊາຊົນຜູ້ບໍລິສຸດເສຍຊີວິດ ແລະ ບາດເຈັບຫຼາຍກວ່າເກົ່າ, ຈະບໍ່ສາມາດສ້າງເງື່ອນໄຂໃຫ້ແກ່ການຊ່ວຍເຫຼືອຜູ້ທີ່ຖືກກັກຕົວ ແລະ ຈະບໍ່ສາມາດນຳເອົາສັນຕິພາບ ແລະ ຄວາມສະຫງົບມາໃຫ້ແກ່ອິດສະຣາແອນ ແລະ ພາກພື້ນ. ການເຈລະຈາຢຸດຍິງ ແລະ ການແກ້ໄຂທາງການເມືອງຈິ່ງແມ່ນເສັ້ນທາງພື້ນຖານໃນການແກ້ໄຂບັນຫາປາເລັດສະຕິນແລະອິດສະຣາແອນ.

ທ່ານຟູຊົງກ່າວຕື່ມວ່າ: ບັນຫາມະນຸດສະທຳບໍ່ຄວນຖືກຫັນເປັນບັນຫາການເມືອງ, ບໍ່ຄວນນຳໃຊ້ບັນຫາຄວາມອຶດຫິວເປັນອາວຸດ, ຊີວິດຂອງປະຊາຊົນກໍບໍ່ຄວນກາຍເປັນເບ້ຍຕໍ່ລອງຂອງການເຈລະຈາ. ມີແຕ່ຍຶດໝັ້ນທັດສະນະ ຄວາມໝັ້ນຄົງຮ່ວມກັນ ຈິ່ງຈະສາມາດບັນລຸຄວາມໝັ້ນຄົງຢ່າງຕໍ່ເນື່ອງ. ສັນຕິພາບຂອງພາກພື້ນຕ້ອງໃຫ້ບັນດາຝ່າຍຮ່ວມກັນສ້າງດ້ວຍທ່າທີຮັບຜິດຊອບ. ການບັນລຸການສ້າງຕັ້ງປະເທດປາເລັດສະຕິນທີ່ເປັນເອກະລາດ ແລະ ຈັດຕັ້ງປະຕິບັດ “ແຜນການສອງປະເທດ” ຈິ່ງແມ່ນເສັ້ນທາງເປັນໄປໄດ້ພຽງໜຶ່ງດຽວ ໃນການແກ້ໄຂບັນຫາປາເລັດສະຕິນແລະອິດສະຣາແອນໂດຍຜ່ານຊ່ອງທາງການເມືອງ.