ວັນທີ 23 ສິງຫານີ້, ຂ່າວສານໂຮວາຂອງຕັດຈິກິດສະຖານລາຍງານວ່າ: ວັນທີ 22 ສິງຫານີ້ຢູ່ນະຄອນຫຼວງ ດູຊານເບ ປະເທດຕັດຈິກິດສະຖານ, ທ່ານເອໂມມາລີ ຣາຣ໌ມອນ ປະທານາທິບໍດີຕັດຈິກິດສະຖານ ແລະ ທ່ານຄາຊິມ ໂຈມາດ ໂຕຄາເຢັຟ ປະທານາທິບໍດີກາຊັກສະຖານໄດ້ລົງນາມໃນ “ສົນທິສັນຍາວ່າດ້ວຍສາຍພົວພັນແບບພັນທະມິດລະຫວ່າງສາທາລະນະລັດຕັດຈິກິດສະຖານ ກັບ ສາທາລະນະລັດກາຊັກສະຖານ”.

ເລີ່ມແຕ່ວັນທີ 22 ສິງຫານີ້ເປັນຕົ້ນມາ, ທ່ານຄາຊິມ ໂຈມາດ ໂຕຄາເຢັຟ ປະທານາທິບໍດີກາຊັກສະຖານໄດ້ຢ້ຽມຢາມປະເທດຕັດຈິກິດສະຖານທາງລັດຖະກິດ ເປັນເວລາ 2 ວັນ. ໃນໄລຍະຢ້ຽມຢາມ, ສອງປະເທດໄດ້ເຊັນເອກະສານຮ່ວມມື 16 ສະບັບເຊິ່ງກວມເຖິງຫຼາຍຂົງເຂດເຊັ່ນ: ກະສິກຳ, ພະລັງງານ, ຄົມມະນາຄົມ, ການຫັນເປັນດິຈີຕອນ ແລະອື່ນໆ.