ພາຍຫຼັງເກີດການປະທະກັນລະຫວ່າງປາແລັດສະຕິນ-ອິດສະຣາແອນຮອບນີ້ເປັນຕົ້ນມາ, ອິດສະຣາແອນ ແລະ ກຸ່ມຮາມາສໄດ້ດໍາເນີນການເຈລະຈາກັນຫຼາຍຮອບພາຍໃຕ້ການໄກ່ເກ່ຍຈາກຫຼາຍຝ່າຍເຊັ່ນ: ອາເມຣິກາ, ເອຢິບ ແລະ ກາຕາເປັນຕົ້ນ. ແນວໃດກໍຕາມ, ນັບມາຮອດປັດຈຸບັນ, ການເຈລະຈາຢຸດຍິງຍັງບໍ່ທັນມີຄວາມຫວັງຈະບັນລຸຜົນສໍາເລັດເທື່ອ.

   ອີງຕາມສື່ມວນຊົນອິດສະຣາແອນຫຼາຍສໍານັກເປີດເຜີຍໃຫ້ຮູ້ວ່າ: ບັນຫາສິດຄຸ້ມຄອງ “ລະບຽງຟິລາເດວເຟຍ” ເຊິ່ງເປັນເຂດຍາວ ແລະ ແຄບທີ່ມີລວງຍາວ 14 ກິໂລແມັດຕັ້ງຢູ່ຊາຍແດນລະຫວ່າງເຂດກາຊາ ແລະ ເອຢິບ ນັ້ນເປັນບັນຫາທີ່ເຮັດໃຫ້ການເຈລະຈາຢຸດຍິງໃນປັດຈຸບັນບໍ່ສາມາດຕົກລົງກັນໄດ້, ອາເມຣິກາສະເໜີໃຫ້ອິດສະຣາແອນສົ່ງທະຫານໄປປະຈໍາການຢູ່ “ລະບຽງຟິລາເດວເຟຍ” ຢ່າງຕໍ່ເນື່ອງດ້ວຍ “ຮູບການໃດໜຶ່ງ”, ແຕ່ສິ່ງນີ້ເຮັດໃຫ້ກຸ່ມຮາມາສບໍ່ສາມາດຮັບຮອງເອົາໄດ້.

   ນອກນີ້, ອີງຕາມໜັງສືພິມອໍກາສ (al quads) ຂອງປາແລັດສະຕິນລາຍງານໃຫ້ຮູ້ໃນຫວ່າງມໍ່ໆມານີ້ວ່າ: ໂດຍພິຈາລະນາເຖິງຜົນປະໂຫຍດຕົວເອງ ແລະ ການເມືອງພາຍໃນປະເທດແລ້ວ, ອາເມຣິກາໄດ້ເຂົ້າຂ້າງຝ່າຍອິດສະຣາແອນໃນບັນຫາປາແລັດສະຕິນ-ອິດສະຣາແອນມາເປັນເວລາດົນນານແລ້ວ, ເຮັດໃຫ້ສະຖານະການຢູ່ພາກພື້ນຕາເວັນອອກກາງມີຄວາມເຄັ່ງຕຶງ ແລະ ຮຸນແຮງຂຶ້ນ, ອະນາຄົດຂອງການເຈລະຈາຢຸດຍິງລະຫວ່າງປາແລັດສະຕິນ-ອິດສະຣາແອນຍັງຍາກທີ່ຈະຄອງຄອຍໄດ້.