ລົດຈັດເປັນພາຫະນະຄົມມະນາຄົມທີ່ນິຍົມໃຊ້ກັນຫຼາຍຢູ່ປະເທດຕ່າງໆຂອງອາຊີຕາເວັນອອກສຽງໃຕ້. ໂດຍສະເພາະຢູ່ຫວຽດນາມທີ່ ມີປະຊາກອນບໍ່ຮອດ 100 ລ້ານຄົນນັ້ນ, ແຕ່ພັດມີລົດຈັກເຖິງ 45 ລ້ານຄັນ, ໝາຍຄວາມວ່າເກືອບທຸກ 2 ຄົນມີລົດຈັກຄັນໜຶ່ງ. ຢູ່ອິນໂດເນເຊຍ ໄທ ມະເລເຊຍ ແລະ ລາວກໍມີ ຜູ້ໃຊ້ລົດຈັກເປັນພາຫະນະຈຳນວນມະຫາສານ.

ເພື່ອຮັບມືກັບຜົນກະທົບຈາກການປ່ຽນແປງຂອງດິນຟ້າອາກາດ, ລັດຖະບານປະເທດຕ່າງໆຂອງອາຊີຕາເວັນອອກສຽງໃຕ້ໄດ້ຕັ້ງໜ້າຊຸກຍູ້ການຫັນປ່ຽນຈາກລົດທີ່ໃຊ້ນ້ຳມັນເຊື້ອໄຟໃນປັດຈຸບັນໄປເປັນລົດໄຟຟ້າແທນ. ອິນໂດເນເຊຍ ໄທ ແລະ ຫວຽດນາມໄດ້ອອກນະໂຍບາຍຕ່າງໆເພື່ອຊ່ວຍສະໜັບສະໜູນການ “ຫັນປ່ຽນລົດໃຊ້ນ້ຳມັນເຊື້ອໄຟໃຫ້ເປັນລົດໄຟຟ້າ” ເທື່ອລະກ້າວ, ສົ່ງເສີມໃຫ້ປະຊາຊົນຊື້ລົດຈັກໄຟຟ້າ ດ້ວຍການເບີກເງິນອຸດໜູນ ແລະ ຮູບແບບອື່ນໆ, ເພື່ອຫຼຸດປະລິມານລົດຈັກທີ່ໃຊ້ນ້ຳມັນເຊື້ອໄຟລົງເທື່ອລະກ້າວ. ຍີ່ຫໍ້ລົດຈັກໃນອາຊີຕາເວັນອອກສຽງໃຕ້ກຳລັງກ້າວເຂົ້າສູ່ການນຳໃຊ້ພະລັງງານໃໝ່ ໂດຍຮ່ວມມືກັບບໍລິສັດສາກົນເຊິ່ງລວມທັງບໍລິສັດຈີນ, ຫຼື ອອກແບບຜະລິດລົດລຸ້ນໃໝ່ດ້ວຍຕົນເອງ. ໃນປີ 2019, ລົດໄຟຟ້າຍີ່ຫໍ້ yadea ຂອງຈີນໄດ້ໄປພັດທະນາຢູ່ອາຊີຕາເວັນອອກສຽງໃຕ້, ໂດຍໄດ້ສ້າງໂຮງງານຂຶ້ນຢູ່ຕ່າງປະເທດເປັນແຫ່ງທຳອິດຢູ່ຫວຽດນາມ. ໃນເດືອນພຶດສະພາປີນີ້, ບໍລິສັດ yadea ໄດ້ສ້າງໂຮງງານແຫ່ງໃໝ່ຢູ່ອິນໂດເນເຊຍ, ຄາດວ່າຈະລົງທຶນຫຼາຍກວ່າ 150 ລ້ານໂດລາ. ບໍລິສັດ Aima ທີ່ເປັນບໍລິສັດລົດຈັກໄຟຟ້າລາຍໃຫຍ່ອີກແຫ່ງໜຶ່ງຂອງຈີນກໍໄດ້ສ້າງຖານຜະລິດຢູ່ອິນໂດເນເຊຍໂດຍໄດ້ເລີ່ມຕົ້ນຜະລິດຢ່າງເປັນທາງການໃນເດືອນມີນາປີນີ້. ຢູ່ປະເທດລາວ, ວິສາຫະກິດຈີນທີ່ຜະລິດລົດຈັກໄຟຟ້າກໍໄດ້ສ້າງຊ່ອງທາງຈຳໜ່າຍກັບຄູ່ຮ່ວມມືທ້ອງຖິ່ນ.

ໃນຊຸມປີຜ່ານມານີ້, ຄຽງຄູ່ກັບຕະຫຼາດພະລັງງານໃໝ່ຂອງອາຊີຕາເວັນອອກສຽງໃຕ້ພັດທະນາຢ່າງວ່ອງໄວ, ລົດຈັກໄຟຟ້າຂອງຈີນນັບມື້ນັບຮັບຄວາມນິຍົມຊົມຊອບຢູ່ບັນດາປະເທດອາຊີຕາເວັນອອກສຽງໃຕ້. ໃນເວລາບໍ່ທໍ່ໃດປີມານີ້, ຮ້ານຂາຍລົດຈັກໄຟຟ້າທີ່ຜະລິດໂດຍຈີນກໍໄດ້ເປີດບໍລິການຢູ່ປະເທດຕ່າງໆເຊິ່ງລວມທັງຫວຽດນາມ. ໃນນັ້ນ, ເຄືອຂ່າຍບໍລິການຂອງບໍລິສັດ yadea ຢູ່ຫວຽດນາມມີຫຼາຍກວ່າ 700 ຮ້ານ. ລົດຈັກໄຟຟ້າຫຼາຍລຸ້ນໄດ້ກາຍເປັນຍານພາຫະນະທີ່ໄດ້ຮັບຄວາມນິຍົມຫຼາຍໃນການຮັບສົ່ງລູກໄປໂຮງຮຽນ ຢູ່ຫຼາຍປະເທດອາຊີຕາເວັນອອກສຽງໃຕ້, ຢູ່ອ້ອມຂ້າງໂຮງຮຽນ ແລະ ຖະໜົນຫົນທາງ ຈະມັກເຫັນປະຊາຊົນຂີ່ລົດຊ້ອນລູກດ້ວຍລົດຈັກໄຟຟ້າຈີນ. ສາມາດເວົ້າໄດ້ວ່າ ການເດີນທາງໂດຍລົດຈັກໄຟຟ້າທີ່ຜະລິດໂດຍຈີນນັ້ນໄດ້ກາຍເປັນຄວາມນິຍົມໃໝ່ຢູ່ປະເທດອາຊີຕາເວັນອອກສຽງໃຕ້.

ລົດຈັກໄຟຟ້າຂອງຈີນໄດ້ກາຍເປັນທີ່ຍອມຮັບຈາກຜູ້ບໍລິໂພກຢູ່ປະເທດອາຊີຕາເວັນອອກສຽງໃຕ້, ຕົ້ນຕໍແມ່ນຍ້ອນວ່າ ວິສາຫະກິດຈີນມີທ່າແຮງຫຼາຍດ້ານ. ລົດຈັກໄຟຟ້າຂອງຈີນມີຕ່ອງໂສ້ອຸດສາຫະກຳທີ່ຄົບຖ້ວນ ແລະ ສົມບູນ, ວິສາຫະກິດຢູ່ຍ່ານໃຕ້ ແລະ ຍ່ານເໜືອສາມາດສະໜັບສະໜູນກຳລັງການຜະລິດທີ່ແຂງແຮງ. ກຳລັງການຜະລິດອັນໃຫຍ່ຫຼວງເຫຼົ່ານີ້ສາມາດຫຼຸດຜ່ອນຕົ້ນທຶນຕື່ມອີກ, ເຮັດໃຫ້ລາຄາຈຳໜ່າຍມີກຳລັງແຂ່ງຂັນຫຼາຍ.

ການໄດ້ຮັບການບຸກທະລຸທີ່ສຳຄັນໃນຂົງເຂດເຕັກໂນໂລຊີທີ່ເປັນຫົວໃຈ ສຳຄັນເປັນສິ່ງວິເສດອີກຢ່າງໜຶ່ງຂອງວິສາຫະກິດລົດຈັກໄຟຟ້າຂອງຈີນ. ບໍລິສັດ yadea ບໍລິສັດAima ບໍລິສັດNinebot ແລະ ບໍລິສັດNiu Technologies ໄດ້ຄົ້ນຄວ້າໃນຂົງເຂດລົດຈັກໄຟຟ້າເປັນເວລາດົນນານແລ້ວ, ມີຊັບສິນທາງປັນຍາຂອງຕົນໃນຂົງເຂດສຳຄັນຕ່າງໆ, ເຊັ່ນ: ເຕັກນິກໝໍ້ໄຟຟ້າ ລະບົບຄວບຄຸມຈັກໄຟຟ້າ, ລະບົບອັດສະລິຍະ ແລະອື່ນໆ. ໂດຍຖືບໍລິສັດ yadea ເປັນຕົວຢ່າງ, ລົດຈັກໄຟຟ້າ yadea ລຸ້ນກ້ວນເນີງໄດ້ນຳໃຊ້ເຕັກໂນໂລຊີໝໍ້ໄຟ  Graphene TTFAR ທີ່ຄົ້ນຄວ້າຜະລິດເອງ, ເຊິ່ງໄດ້ເພີ່ມໄລຍະທາງຂອງການແລ່ນລົດ ແລະ ປະສິດທິພາບຂອງການສາກໄຟຢ່າງພົ້ນເດັ່ນ. ໃນດ້ານລະບົບແຮງຈັກຂັບເຄື່ອນ, ບໍລິສັດ Niu Technologies ໄດ້ຜ່ານລະບົບຄວບຄຸມແບບອັດສະລິຍະ, ໄດ້ບັນລຸເປົ້າໝາຍທີ່ນຳໃຊ້ພະລັງງານຢ່າງມີປະສິດທິພາບສູງ ແລະ ຂັບຂີ່ແບບອັດສະລິຍະ.

ລົດຈັກໄຟຟ້າຂອງຈີນຍັງໄດ້ຕອບສະໜອງກັບຄວາມຊິນເຄີຍດ້ານການຊົມໃຊ້ຂອງຜູ້ບໍລິໂພກໃນປະເທດອາຊີຕາເວັນອອກສຽງໃຕ້. ຜູ້ຊົມໃຊ້ຢູ່ປະເທດອາຊີຕາເວັນອອກສຽງໃຕ້ທີ່ຕ້ອງການແລ່ນລົດໃນເສັ້ນທາງອ່າວໄກແດ່, ກໍມີຄວາມຕ້ອງການລົດທີ່ມີຄວາມໄວສູງ ແລະ ແລ່ນໄດ້ໄກສຳລັບການສາກແບັດເຕີຣີເທື່ອໜຶ່ງ. ບໍລິສັດ yadea  ບໍລິສັດAima ແລະ ບໍລິສັດອື່ນໆຂອງຈີນໄດ້ພາກັນນຳສະເໜີຜະລິດຕະພັນລົດຈັກໄຟຟ້າທີ່ມີຄວາມໄວສູງສຸດເຖິງ 50 ກວ່າກິໂລແມັດຕໍ່ຊົ່ວໂມງ, ແລະສາມາດແລ່ນໄດ້ໃນໄລຍະທາງຫຼາຍກວ່າ 100 ກິໂລແມັດຕໍ່ການສາກແບັດເຕິຣີເທື່ອໜຶ່ງ.

ປັດຈຸບັນນີ້, ລົດຈັກໄຟຟ້າຂອງຈີນໄດ້ຊ່ວຍເພີ່ມການສັນຈອນແບບສີຂຽວຢ່າງສະດວກສະບາຍຕໍ່ປະຊາຊົນປະເທດອາຊີຕາເວັນອອກສຽງໃຕ້ນັບມື້ນັບຫຼາຍຂຶ້ນ. ເຊື່ອໝັ້ນວ່າ ຄຽງຄູ່ກັບການພັດທະນາຂອງເຕັກໂນໂລຊີພະລັງງານໃໝ່ ແລະ ຕະຫຼາດ, ການຮ່ວມມືລະຫວ່າງຈີນ ແລະ ບັນດາປະເທດໃນອາຊີຕາເວັນອອກສຽງໃຕ້ໃນຂົງເຂດລົດໄຟຟ້າຈະປະກອບສ່ວນຫຼາຍກວ່າເກົ່າເຂົ້າໃນການພັດທະນາແບບສີຂຽວຂອງທົ່ວໂລກ.