ຫວ່າງມໍ່ໆມານີ້, ເລື່ອງລາວກ່ຽວກັບລົດເມສາຍທີ 252 ທີ່ອຳນວຍຄວາມສະດວກໃຫ້ແກ່ຊາວກະສິກອນ ທີ່ເປີດບໍລິການໃໝ່ຢູ່ນະຄອນກຸ້ຍຢາງ ແຂວງກຸ້ຍໂຈວ່ຂອງຈີນ ໄດ້ຮັບຄວາມສົນໃຈ ແລະ ຍ້ອງຍໍຊົມເຊີຍຈາກຊາວເນັດຈີນ. ລົດເມດັ່ງກ່າວໄດ້ຫຼຸດຜ່ອນຄວາມຫຍຸ້ງຍາກ ດ້ານການເດີນທາງໄປຂາຍຜັກໃນເມືອງຂອງຊາວກະສິກອນໃຫ້ໜ້ອຍລົງ ທັງໄດ້ນຳເອົາຄວາມສົດ ແລະ ຄວາມສະດວກມາໃຫ້ແກ່ປະຊາຊົນໃນຕົວເມືອງອີກດ້ວຍ.

    6 ໂມງເຊົ້າແຕ່ລະມື້, ລົດເມສາຍທີ 252 ແລ່ນອອກຈາກອູ່ ກໍຈະເຫັນຊາວກະສິກອນທີ່ເປ້ກະພາ ແລະ ເອົາສໍາພາລະມາລຽນແຖວຖ້າໄວ້ແລ້ວ. ພໍແຕ່ລົດເມຈອດເປັນທີ່ຮຽບຮ້ອຍແລ້ວ, ຊາວກະສິກອນທັງຫຼາຍກໍຊ່ວຍກັນຂົນຜັກ ແລະ ໝາກໄມ້ຂຶ້ນລົດ.

    ໃນເມື່ອກ່ອນ, ຊາວກະສິກອນສ່ວນຫຼາຍແມ່ນຂາຍຜັກຢູ່ເຂດຊານນະຄອນກຸ້ຍຢາງເປັນຫຼັກ. ພາຍຫຼັງມາ, ຊາວກະສິກອນທັງຫຼາຍກໍເລີ່ມໄປຂາຍຜັກຢູ່ໃນເມືອງ, ເຮັດໃຫ້ລົດເມສາຍທີ 252 ທີ່ເປັນລົດເມລະຫວ່າງຊານເມືອງ ແລະ ໃຈກາງເມືອງນັ້ນ ນັບມື້ນັບແອອັດຂຶ້ນ, ການຂົນສົ່ງຜູ້ໂດຍສານທົ່ວໄປ ແລະ ສິນຄ້າແບບປະປົນກັນ ກໍມີຄວາມສ່ຽງດ້ານຄວາມປອດໄພ.

    ເພື່ອຕອບສະໜອງຄວາມຕ້ອງການຂອງກຸ່ມຄົນຕ່າງໆ, ວັນທີ 1 ມິຖຸນາ 2024, ບໍລິສັດລົດເມສາທາລະນະນະຄອນກຸ້ຍຢາງໄດ້ເປີດລົດເມສະເພາະເພື່ອອຳນວຍຄວາມສະດວກໃຫ້ແກ່ຊາວກະສິກອນ. ລົດເມສາຍນີ້ໄດ້ຕິດຕັ້ງຮາວວາງເຄື່ອງໂດຍສະເພາະ ເພື່ອອຳນວຍຄວາມສະດວກໃຫ້ແກ່ຊາວກະສິກອນໃນດ້ານການວາງກະຕ່າຜັກ ແລະ ເຮັດໃຫ້ເຄື່ອງໝັ້ນຄົງ ທັງສາມາດຮັບປະກັນຄວາມປອດໄພຂອງຜູ້ໂດຍສານ ແລະ ສິນຄ້າໄດ້ນຳອີກ.

    ລົດເມສາຍນີ້ຕ້ອງແລ່ນ 30 ກວ່າກິໂລແມັດ, ຄ່າປີ້ກໍໄດ້ສະແດງໃຫ້ເຫັນເຖິງການອຳນວຍຄວາມສະດວກໃຫ້ແກ່ຊາວກະສິກອນເຊັ່ນດຽວກັນ. ຄ່າປີ້ຂອງຜູ້ໂດຍສານແມ່ນ 2 ຢວນ (ປະມານ 6,500 ກີບ). ສ່ວນຄ່າຂົນສົ່ງສິນຄ້າແມ່ນ, ບໍ່ເກີນ 30 ກິໂລແມ່ນ 3 ຢວນ  (ປະມານ 10,000 ກີບ), 30 ກິໂລຂຶ້ນໄປແມ່ນ 5 ຢວນ (ປະມານ 16,500 ກີບ). ໝາຍຄວາມວ່າ, ຊາວກະສິກອນຂີ່ລົດເມສາຍນີ້, ສູງສຸດຕ້ອງຈ່າຍ 7 ຢວນ (ປະມານ 23,000 ກີບ) .

    ຊາວກະສິກອນທັງຫຼາຍລົມກັນຢ່າງມ່ວນຊື່ນ, ຫຼັງຈາກແລ່ນໄປໄດ້ 40 ນາທີແລ້ວ, ລົດເມກໍມາຮອດສະຖານີສຸດທ້າຍ ກໍຄືຈຸດໝາຍປາຍທາງຂອງຊາວກະສິກອນ; ຢູ່ເຂດທີ່ມໍ່ກັບສະຖານີ ມີບໍລິເວນທີ່ໃຫ້ຊາວກະສິກອນຄ້າຂາຍໂດຍສະເພາະ.

    ຕອນເຊົ້າມີປະຊາຊົນຈຳນວນຫຼາຍໄປຊື້ຜັກ, ຜູ້ພັກອາໄສຢູ່ອ້ອມຄ້າງຍ້ອງວ່າ: ຜັກຂອງຊາວກະສິກອນເຫຼົ່ານີ້ທັງສົດທັງຖືກ, ຢາກຊື້ຫຼາຍໜ້ອຍໜຶ່ງແດ່, ຊາວກະສິກອນກໍສາມາດກັບເມືອບ້ານພັກຜ່ອນໂດຍໄວ.

    ປັດຈຸບັນນີ້, ຕົວເມືອງນັບມື້ນັບຫຼາຍຂຶ້ນເລື້ອຍໆ ທັງໄດ້ເປີດລົດເມອຳນວຍຄວາມສະດວກໃຫ້ແກ່ຊາວກະສິກອນ, ຕົວເມືອງແຫ່ງໜຶ່ງຄວນເຕັມໄປດ້ວຍຄວາມຫວັງຂອງຜູ້ລ່າຝັນ ກໍຄວນສ້າງໂອກາດທຳມາຫາກິນໃຫ້ແກ່ຊາວກະສິກອນ, ມີຄວາມທັນສະໄໝ ກໍຕ້ອງມີຄວາມອົບອຸ່ນໄປພ້ອມ.