ກອງປະຊຸມສໍາມະນາ “RCEP: ອະນາຄົດໃໝ່ຂອງເສດຖະກິດອາຊີ” ພາຍໃຕ້ການເປັນເຈົ້າພາບຮ່ວມຂອງສະຖາບັນຄົ້ນຄວ້າການປະຕິຮູບ ແລະ ການພັດທະນາຈີນ(ໄຫຫຼໍາ) ແລະ ກອງເລຂາເວທີເປິກສາຫາລືອາຊີໂປອາວ ໄດ້ໄຂຂຶ້ນຢູ່ນະຄອນຫຼວງບາງກອກປະເທດໄທໃນວັນທີ 27 ສິງຫານີ້.

   ກອງປະຊຸມຄັ້ງນີ້ໄດ້ເປິກສາຫາລືໂດຍສຸມໃສ່ຫົວຂໍ້ສັນຍາການພົວພັນຄູ່ຮ່ວມເສດຖະກິດຮອບດ້ານລະດັບພາກພື້ນ ຫຼື RCEP ແລະ ອະນາຄົດໃໝ່ຂອງເສດຖະກິດອາຊີ. ຜູ້ຊ່ຽວຊານ 50 ກວ່າຄົນຈາກຄັງປັນຍາຂອງປະເທດຕ່າງໆ ເຊັ່ນ: ລາວ, ມາເລເຊຍ, ອິນໂດເນເຊຍ, ຟິລິບປິນ ແລະ ໄທເປັນຕົ້ນໄດ້ເຂົ້າຮ່ວມກອງປະຊຸມ.

   ໃນໂອກາດນີ້, ທ່ານ ຈ່າງຈວິ່ນ ເລຂາທິການໃຫຍ່ເວທີເປິກສາຫາລືອາຊີໂປອາວໄດ້ມີຄໍາເຫັນໃນພິທີໄຂກອງປະຊຸມວ່າ: RCEP ເປັນການຈັດສັນທາງດ້ານລະບຽບການທີ່ສໍາຄັນໃນການເຊື່ອມໂຍງເຂົ້າກັນຂອງພາກພື້ນອາຊີປາຊິຟິກ ເຊິ່ງສອດຄ່ອງກັບຜົນປະໂຫຍດຮ່ວມຂອງປະເທດໃນອາຊີ. ປັດຈຸບັນ, ປະເທດສະມາຊິກຕ່າງໆຄວນສ້າງສະພາບແວດລ້ອມດ້ານນະໂຍບາຍທີ່ດີໃຫ້ແກ່ການດໍາເນີນງານຂອງ RCEP; ຄວນສະໜອງສິ່ງຄໍ້າປະກັນຂັ້ນພື້ນຖານທີ່ດີເພື່ອຮັບປະກັນໃຫ້ຕ່ອງໂສ້ອຸດສາຫະກໍາ ແລະ ຕ່ອງໂສ້ການສະໜອງມີຄວາມໝັ້ນທ່ຽງ ແລະ ໂລ່ງລ່ຽນ; ຄວນສ້າງກົນໄກ RCEP ໃຫ້ປາກົດຜົນເປັນຈິງ ແລະ ຄວນຊຸກຍູ້ RCEP ໃຫ້ກ້າວໄປສູ່ສັນຍາການຄ້າເສລີທີ່ມີລະດັບສູງກວ່າເກົ່າ.