ສື່ມວນຊົນອິດສະຣາແອນ ແລະ ອາເມຣິກາລາຍງານໃຫ້ຮູ້ໃນວັນທີ 27 ສິງຫານີ້ວ່າ: ການເຈລະຈາຢຸດຍິງຢູ່ເຂດກາຊາຈະສືບຕໍ່ຈັດຂຶ້ນຢູ່ນະຄອນຫຼວງໂດຮາຂອງປະເທດກາຕາໃນຫຼາຍມື້ຕໍ່ໜ້າ.

ປັດຈຸບັນ, ອິດສະຣາແອນ ແລະ ກຸ່ມຮາມາສມີຄວາມເຫັນທີ່ແຕກຕ່າງກັນໃນຫຼາຍດ້ານເຊັ່ນ: ແຜນການຢຸດຍິງ, ການແລກປ່ຽນຕົວປະກັນ, ການຟື້ນຟູເຂດກາຊາຄືນໃໝ່ ແລະອື່ນໆ. ກຸ່ມຮາມາສເຄີຍໃຫ້ຮູ້ວ່າ: ນັບມາຮອດປັດຈຸບັນ, ອິດສະຣາແອນແມ່ນໄດ້ແກ່ຍາວເວລາດ້ານການເຊັນສັນຍາຢຸດຍິງ, ກຸ່ມຕົນຈະບໍ່ຮັບເອົາເງື່ອນໄຂເພີ່ມໃໝ່ທີ່ອິດສະຣາແອນສະເໜີອອກໃນການເຈລະຈາຢຸດຍິງ. ເຈົ້າໜ້າທີ່ຮາມາສ ກ່າວວ່າ: ຄວາມເວົ້າຂອງອາເມຣິກາທີ່ອ້າງມາຫຼາຍເທື່ອກ່ຽວກັບສັນຍາຢຸດຍິງຈະໄດ້ຮັບຜົນສຳເລັດແມ່ນຂ່າວປອມ, ແມ່ນຂ່າວລືທີ່ອາເມຣິກາປ່າວປະກາດເພື່ອບັນລຸເປົ້າໝາຍການເລືອກຕັ້ງປະທານາທິບໍດີອາເມຣິກາ.