ວັນທີ23ສິງຫາ2024, ກົມການເມືອງສູນກາງພັກຄອມມູນິດຈີນໄດ້ຈັດກອງປະຊຸມເພື່ອຄົ້ນຄວ້າພິຈາລະນາບາງມາດຕະການ ແລະ ນະໂຍບາຍກ່ຽວກັບການຊຸກຍູ້ການພັດທະນາພາກຕາເວັນຕົກຕື່ມອີກໃຫ້ກາຍເປັນສະພາບການໃໝ່ພາຍໃຕ້ການເປັນປະທານຂອງທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນ.

ກອງປະຊຸມໄດ້ຊີ້ໃຫ້ເຫັນວ່າ: ຕ້ອງລົງເລິກຊຸກຍູ້ການສ້າງພາກຕາເວັນຕົກທີ່ສວຍງາມ, ຊຸກຍູ້ການພັດທະນາແບບກາກບອນຕ່ຳຕາມທິດສີຂຽວ, ພ້ອມທັງໄດ້ເນັ້ນໜັກໃຫ້ຊຸກຍູ້ການກໍ່ສ້າງຖານພະລັງງານສະອາດ.

ສີຂຽວ ເປັນສີສັນພື້ນຖານທີ່ໂດດເດັ່ນຂອງຄວາມທັນສະໄໝແບບຈີນ. ການລົງເລິກຄວາມຮັບຮູ້ຕໍ່ພະລັງງານສະອາດ, ຄົ້ນຫາຊ່ອງທາງການພັດທະນາພະລັງງານສະອາດຢ່າງມີຄຸນນະພາບສູງ ເຊິ່ງມີຄວາມໝາຍສຳຄັນສຳລັບຈີນໃນການຊຸກຍູ້ໃຫ້ເສດຖະກິດ-ສັງຄົມຫັນປ່ຽນໄປເປັນແບບກາກບອນຕ່ຳຕາມທິດສີຂຽວ, ເພື່ອບັນລຸການພັດທະນາທີ່ມີຄຸນນະພາບສູງ.

ທ່ານສີຈິ້ນຜິງໄດ້ໃຫ້ຄວາມສຳຄັນເປັນຢ່າງສູງຕໍ່ວຽກງານພັດທະນາພະລັງງານສະອາດ, ໂດຍເພິ່ນໄດ້ເນັ້ນໜັກມາຫຼາຍເທື່ອວ່າ: “ຕ້ອງຖືເອົາການສົ່ງເສີມການພັດທະນາພະລັງງານໃໝ່ ແລະ ພະລັງງານສະອາດໄວ້ຢູ່ໃນຖານະພົ້ນເດັ່ນກວ່າເກົ່າ.” “ຕັ້ງໜ້າພັດທະນາພະລັງງານສະອາດ, ຊຸກຍູ້ໃຫ້ເສດຖະກິດ-ສັງຄົມຫັນປ່ຽນໄປເປັນແບບກາກບອນຕ່ຳຕາມທິດສີຂຽວ.”

ພະລັງງານສະອາດຍັງເອີ້ນເປັນ ພະລັງງານສີຂຽວ, ເຊິ່ງໝາຍເຖິງພະລັງງານຈຳພວກທີ່ບໍ່ລະບາຍ ຫຼື ລະບາຍສານພິດໜ້ອຍທີ່ສຸດໃນຂະບວນການຜະລິດ ແລະ ການນຳໃຊ້ພະລັງງານເຫຼົ່ານີ້ ເຊິ່ງລວມທັງ ພະລັງງານລົມ, ພະລັງງານນ້ຳ, ພະລັງງານແສງຕາເວັນ ແລະອື່ນໆ. ສ່ວນຖານພະລັງງານສະອາດ ແມ່ນໝາຍເຖິງເຂດແຄວ້ນທີ່ໂຮມສູນພັດທະນາ ແລະ ນຳໃຊ້ຊັບພະຍາກອນພະລັງງານສະອາດ. ຈຸດປະສົງໃນການສ້າງຖານພະລັງງານສະອາດແມ່ນເພື່ອສົ່ງເສີມການຜະລິດ ແລະ ນຳໃຊ້ພະລັງງານໝູນວຽນ, ຊຸກຍູ້ການຫັນປ່ຽນໂຄງປະກອບດ້ານພະລັງງານຕາມທິດສີຂຽວ.

ການພັດທະນາພາກຕາເວັນຕົກ ເປັນນະໂຍບາຍຍຸດທະສາດອັນສຳຄັນທີ່ສູນກາງພັກຄອມມູນິດຈີນວາງອອກ. ວັນທີ23ເມສາ2024, ທ່ານສີຈິ້ນຜິງໄດ້ເປັນປະທານກອງປະຊຸມສຳມະນາການຊຸກຍູ້ການພັດທະນາພາກຕາເວັນຕົກໃນຍຸກໃໝ່ພ້ອມທັງກ່າວຄຳປາໄສສຳຄັນໂດຍເພີ່ນໄດ້ເນັ້ນໜັກໃຫ້ຜັນຂະຫຍາຍ ແລະ ຈັດຕັ້ງປະຕິບັດນະໂຍບາຍ ແລະ ມາດຕະການຂອງສູນກາງພັກກ່ຽວກັບການຊຸກຍູ້ການພັດທະນາພາກຕາເວັນຕົກໃຫ້ເປັນຮູບປະທຳ ແລະ ເກີດປະສິດທິຜົນຢ່າງສະເໝີຕົ້ນສະເໝີປາຍ, ຍຶດໝັ້ນປະສົມປະສານລະຫວ່າງການພັດທະນາ ແລະ ຄວາມໝັ້ນຄົງໃຫ້ເປັນເອກະພາບກັນ, ຍົກສູງຄວາມສາມາດຮັບປະກັນຄວາມໝັ້ນຄົງຂອງຂົງເຂດສຳຄັນຕ່າງໆເຊັ່ນ: ຊັບພະຍາກອນພະລັງງານ ແລະອື່ນໆ.

ໂຄງການຜະລິດໄຟຟ້າພະລັງງານແສງຕາເວັນຂອງແຂວງຊິງໄຫ ທາງພາກຕາເວັນຕົກຂອງຈີນ

ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ14 ແລະ ໂຄງຮ່າງເປົ້າໝາຍວິໄສທັດຮອດປີ2035 ຂອງຈີນໄດ້ສະເໜີເປົ້າໝາຍກໍ່ສ້າງ ຖານພະລັງງານສະອາດໃຫຍ່ 9 ແຫ່ງ, ໃນນັ້ນ ມີ 7 ແຫ່ງຕັ້ງຢູ່ເຂດພາກຕາເວັນຕົກຄື: ຖານພະລັງງານສະອາດຍ່ານເໜືອແມ່ນ້ຳຈິ່ນຊ່າ, ຖານພະລັງງານສະອາດຍ່ານໃຕ້ແມ່ນ້ຳຈິ່ນຊ່າ, ຖານພະລັງງານສະອາດລ່ອງແມ່ນ້ຳຢາໂຫຼງ, ຖານພະລັງງານສະອາດຍ່ານເໜືອແມ່ນ້ຳເຫຼືອງ, ຖານພະລັງງານສະອາດຢູ່ບ່ອນຄົດລ້ຽວທີ່ສຸດຂອງແມ່ນ້ຳເຫຼືອງ, ຖານພະລັງງານສະອາດແລວເຫີຊີ່ ແລະ ຖານພະລັງງານສະອາດຊິ່ນຈ່ຽງ. ແຜນຍຸດທະສາດນີ້ແມ່ນ ພົວພັນກັນຢ່າງສະໜິດແໜ້ນ ກັບທ່າແຮງດ້ານຊັບພະຍາກອນ ແລະ ທີ່ຕັ້ງພູມສາດຂອງເຂດພາກຕາເວັນຕົກຂອງຈີນ.

ດ້ານໜຶ່ງ, ໃນຖານະເປັນຖານຜະລິດພະລັງງານທີ່ສຳຄັນຂອງຈີນ, ເຂດພາກຕາເວັນຕົກມີດິນແດນອັນກວ້າງໃຫຍ່ໄພສານ ແລະ ອຸດົມສົມບູນໄປດ້ວຍຊັບພະຍາກອນພະລັງງານສະອາດເຊັ່ນ: ພະລັງງານແສງຕາເວັນ, ພະລັງງານລົມ ແລະພະລັງງານນ້ຳເປັນຕົ້ນ, ເຊິ່ງພະລັງງານໝູນວຽນໄດ້ກວມເອົາຍອດປະລິມານຊັບພະຍາກອນທົ່ວປະເທດຫຼາຍກວ່າ70%, ສະນັ້ນຈຶ່ງມີເງື່ອນໄຂສະເພາະຕົວໃນການພັດທະນາຖານພະລັງງານສະອາດຂະໜາດໃຫຍ່.

ອີກດ້ານໜຶ່ງ, ໃນຖານະເປັນປະຕູສຳຄັນຂອງຈີນໄປສູ່ພາກພື້ນອາຊີກາງ ແລະອາຊີຕາເວັນຕົກເປັນຕົ້ນ, ເຂດພາກຕາເວັນຕົກມີຊາຍແດນຕິດກັບ 13 ປະເທດອ້ອມຂ້າງ, ເສັ້ນຊາຍແດນທາງບົກມີຄວາມຍາວເຖິງ 18.000 ກວ່າກິໂລແມັດ, ເປັນເຂດແຄວ້ນທີ່ມີເສັ້ນຊາຍແດນຕິດກັບປະເທດອ້ອມຂ້າງຍາວທີ່ສຸດ ແລະ ເປັນເຂດແຄວ້ນທີ່ມີດ່ານຊາຍແດນຫຼາຍທີ່ສຸດ ຂອງຈີນ. ສະນັ້ນ, ການຊຸກຍູ້ການສ້າງຖານພະລັງງານສະອາດຢູ່ເຂດພາກຕາເວັນຕົກ, ເພີ່ມທະວີຄວາມສາມາດຮັບປະກັນຄວາມໝັ້ນຄົງດ້ານພະລັງງານຂອງເຂດພາກຕາເວັນຕົກ ແມ່ນມີຄວາມໝາຍສຳຄັນທາງຍຸດທະສາດຕໍ່ກັບການປົກປັກຮັກສາຄວາມໝັ້ນຄົງດ້ານພະລັງງານຂອງປະເທດຈີນ.

ຈາກສິ່ງນີ້ຈິ່ງເຫັນໄດ້ວ່າ: ການຊຸກຍູ້ການສ້າງຖານພະລັງງານສະອາດຢູ່ເຂດພາກຕາເວັນຕົກຈະສະໜອງສິ່ງຄ້ຳປະກັນຢ່າງແຂງແຮງໃຫ້ແກ່ເຂດພາກຕາເວັນຕົກໃນການສ້າງໃຫ້ເປັນສະພາບການໃໝ່ແຫ່ງການປົກປັກຮັກສາຢ່າງຂະໜາດໃຫຍ່, ເປີດປະຕູຢ່າງຂະໜາດໃຫຍ່ ແລະ ພັດທະນາທີ່ມີຄຸນນະພາບສູງຕື່ມອີກ, ຍົກສູງກຳລັງແຮງສັງລວມ ແລະ ຄວາມສາມາດດ້ານການພັດທະນາແບບຍືນຍົງຂອງເຂດພາກຕາເວັນຕົກ.

ພະລັງງານເປັນພື້ນຖານ ແລະ ບໍ່ເກີດແຮງຂັບເຄື່ອນສຳລັບການພັດທະນາເສດຖະກິດ-ສັງຄົມ, ມີຄວາມສຳຄັນທີ່ສຸດຕໍ່ຄວາມຈະເລີນຮຸ່ງເຮືອງ ແລະ ການພັດທະນາປະເທດຊາດ, ປັບປຸງຊີວິດການເປັນຢູ່ຂອງປະຊາຊົນ ແລະ ຮັກສາຄວາມສະຫງົບຖາວອນຂອງສັງຄົມ.

 ຖານພະລັງງານສະອາດລ່ອງແມ່ນ້ຳຢາໂຫຼງ

ນັບແຕ່ຕົ້ນປີນີ້ມາ, ການກໍ່ສ້າງຖານພະລັງງານສະອາດຢູ່ເຂດພາກຕາເວັນຕົກຂອງຈີນໄດ້ຮັບປະສິດທິຜົນອັນພົ້ນເດັ່ນ, ກຳລັງຕິດຕັ້ງການຜະລິດໄຟຟ້າພະລັງງານໃໝ່ຢູ່ຫຼາຍເຂດແຂວງໄດ້ມີການບຸກທະລຸໃໝ່. ຕົວຢ່າງ: ເຂດປົກຄອງຕົນເອງມົງໂກໃນ ໄດ້ກາຍເປັນເຂດບໍລິຫານລະດັບແຂວງແຫ່ງທຳອິດໃນທົ່ວປະເທດຈີນທີ່ມີກຳລັງຕິດຕັ້ງການຜະລິດໄຟຟ້າພະລັງງານໃໝ່ຫຼາຍກວ່າ 100 ລ້ານກິໂລວັດ. ກຳລັງຕິດຕັ້ງການຜະລິດໄຟຟ້າພະລັງງານໃໝ່ຂອງແຂວງກ່ານຊູ້ ແລະ ແຂວງຊິ່ງໄຫ ໄດ້ກວມເອົາກຳລັງຕິດຕັ້ງການຜະລິດໄຟຟ້າທັງໝົດ ຫຼາຍກວ່າ 60%. ຖານພະລັງງານສະອາດລ່ອງແມ່ນ້ຳຢາໂຫຼງທີ່ເຊື່ອມໂຍງພະລັງານນ້ຳ, ລົມ ແລະແສງຕາເວັນ ທີ່ຕັ້ງຢູ່ແຂວງເສສວນນັ້ນໄດ້ກາຍເປັນຖານພະລັງງານສະອາດໃຫຍ່ທີ່ສຸດຢູ່ໃນໂລກ.

ອີງຕາມອົງການພະລັງງານແຫ່ງຊາດຈີນຄາດຄະເນວ່າ: ປີ2024, ກຳລັງຕິດຕັ້ງການຜະລິດໄຟຟ້າພະລັງງານໃໝ່ຂອງຈີນຈະລື່ນກາຍກຳລັງຕິດຕັ້ງການຜະລິດໄຟຟ້າຖ່ານຫີນເປັນຄັ້ງທຳອິດ. ການທີ່ເລັ່ງກໍ່ສ້າງຖານພະລັງງານເຊິ່ງຖືເຂດພາກຕາເວັນຕົກເປັນຫຼັກນັ້ນຈະສະໜອງແຮງຂັບເຄື່ອນອັນອຸດົມສົມບູນໃຫ້ແກ່ການພັດທະນາພະລັງງານສະອາດຂອງຈີນ.

ຄືດັ່ງທ່ານສີຈິ້ນຜິງໄດ້ເນັ້ນໜັກວ່າ: “ເຂດພາກຕາເວັນຕົກມີຄວາມສຳຄັນທີ່ສຸດໃນສະພາບລວມດ້ານການປະຕິຮູບ, ການພັດທະນາ ແລະ ສະຖຽນລະພາບຂອງທົ່ວປະເທດຈີນ.” ການພັດທະນາຖານພະລັງງານສຳຄັນລະດັບຊາດງວດໜຶ່ງໃຫ້ເຕີບໃຫຍ່ຂະຫຍາຍຕົວ ເຊິ່ງບໍ່ພຽງແຕ່ໄດ້ເພີ່ມພະລັງຊີວິດໃຫ້ແກ່ການຊຸກຍູ້ການພັດທະນາທີ່ມີຄຸນນະພາບສູງຢູ່ເຂດພາກຕາເວັນຕົກເທົ່ານັ້ນ ຍັງໄດ້ສະໜອງສິ່ງຄ້ຳປະກັນອັນສຳຄັນໃຫ້ແກ່ຈີນໃນການເລັ່ງສ້າງລະບົບພະລັງງານແບບໃໝ່ຕື່ມອີກ.