ໃນຊຸມປີຜ່ານມາ, ຄຽງຄູ່ກັບທົ່ວໂລກໃຫ້ຄວາມສຳຄັນຕໍ່ການອະນຸລັກສິ່ງແວດລ້ອມນິເວດ ແລະ ການພັດທະນາແບບຍືນຍົງ, ລົດໃຊ້ພະລັງງານໄຟຟ້າ ທີ່ເປັນຕົວແທນຂອງພາຫະນະທີ່ໃຊ້ພະລັງງານໃໝ່ ກຳລັງໄດ້ຮັບຄວາມນິຍົມຊົມຊອບຢູ່ອາຟຣິກາ. ອີງຕາມບົດລາຍງານທີ່ກ່ຽວຂ້ອງຄາດຄະເນວ່າ: ຂະໜາດຂອງລົດໃຊ້ພະລັງງານໄຟຟ້າຂອງອາຟຣິກາໃນປີ 2027 ຈະບັນລຸເຖິງ 21,4 ຕື້ໂດລາ, ອັດຕາເຕີບໂຕສະເລ່ຍຕໍ່ປີລະຫວ່າງປີ 2022 ຫາ 2027 ອາດຈະບັນລຸເຖິງ 10,2%. ຕະຫຼາດລົດໃຊ້ພະລັງງານໄຟຟ້າຂອງອາຟຣິກາກຳລັງປະສົບກັບການປ່ຽນແປງ ແລະ ການພັດທະນາຢ່າງວ່ອງໄວແບບບໍ່ເຄີຍມີມາກ່ອນ.

ໃນນັ້ນ, ວິສາຫະກິດລົດໃຊ້ພະລັງງານໄຟຟ້າຂອງຈີນໄດ້ເຂົ້າສູ່ຕະຫຼາດອາຟຣິການັບມື້ນັບຫຼາຍຂຶ້ນ, ລົດໃຊ້ພະລັງງານໄຟຟ້າຂອງຈີນໄດ້ຮັບຄວາມນິຍົມຊົມຊອບຈາກລູກຄ້າ ແລະ ລັດຖະບານບັນດາປະເທດອາຟຣິກາ ຍ້ອນມີຄຸນນະພາບດີ ແຕ່ລາຄາບໍ່ແພງ. ອີງຕາມຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ໃນປີ 2023, ຈີນສົ່ງອອກລົດໃຊ້ພະລັງງານໄຟຟ້າໄປອາຟຣິກາໄດ້ເພີ່ມຂຶ້ນ 291% ເມື່ອທຽບໃສ່ປີ 2022. ໃນຂະນະດຽວກັນ, ວິສາຫະກິດຜະລິດລົດຈຳນວນບໍ່ໜ້ອຍຂອງຈີນກໍໄດ້ເລືອກລົງທຶນສ້າງທຸລະກິດຢູ່ອາຟຣິກາ, ເປີດກວ້າງການຮ່ວມມືກັບວິສາຫະກິດທ້ອງຖິ່ນໃນຂົງເຂດລົດໃຊ້ພະລັງງານໄຟຟ້າ, ຊຸກຍູ້ການປ່ຽນເປັນລົດໃຊ້ພະລັງງານໄຟຟ້າຢູ່ອາຟຣິກາ.

ຢູ່ປະເທດການາ, ລົດເກັງ, ລົດ SUV , ລົດບັນທຸກຂະໜາດນ້ອຍ ແລະ ລົດໃຊ້ພະລັງງານໄຟຟ້າປະເພດອື່ນໆຈຳນວນ 20 ກວ່າລຸ້ນທີ່ຜະລິດໂດຍວິສາຫະກິດຈີນກຳລັງຈຳໜ່າຍໄດ້ດີຫຼາຍຢູ່ໃນຕະຫຼາດ; ຢູ່ປະເທດຊິມບາເວ ແລະ ປະເທດເຄັນຢາ, ລົດບັນທຸກໃຊ້ພະລັງງານໄຟຟ້າ BYD ໄດ້ຖືກນຳໃຊ້ເຂົ້າໃນການຈໍລະຈອນສິນຄ້າ ແລະ ຂະແໜງການຂົນສົ່ງ.

ສ່ວນນະຄອນຫຼວງຄີກາລີ ປະເທດລູອັນດາ ກໍໄດ້ນຳເຂົ້າລົດເມໃຊ້ພະລັງງານໄຟຟ້າທີ່ຜະລິດໂດຍຈີນ. ລົດເມໃຊ້ພະລັງງານໄຟຟ້າ 4 ຄັນ ທີ່ຜະລິດໂດຍຈີນດັ່ງກ່າວໄດ້ດຳເນີນການລົດລອງໃຫ້ບໍການເປັນເວລາ 3 ເດືອນ ແລະ ໄດ້ປະສົບຜົນສຳເລັດ. ບໍລິສັດລົດເມຫຼາຍແຫ່ງຢູ່ລູອັນດາໄດ້ຮັບຮູ້ເຖິງລົດເມໃຊ້ພະລັງງານໄຟຟ້າທີ່ມີທ່າແຮງດ້ານການອະນຸລັກສິ່ງແວດລ້ອມນິເວດ ແລະ ໄດ້ສັ່ງຊື້ລົດເມໃຊ້ພະລັງງານໄຟຟ້າ 132 ຄັນໃນທັນທີ.

ປັດຈຸບັນ, ຫຼາຍປະເທດຢູ່ອາຟຣິກາໄດ້ພາກັນວາງນະໂຍບາຍເພື່ອສະໜັບສະໜູນການຫັນເປັນສີຂຽວຂອງປະເທດຕົນ ພ້ອມທັງກໍ່ສ້າງພື້ນຖານໂຄງລ່າງທີ່ກ່ຽວຂ້ອງຢ່າງຕັ້ງໜ້າ ເຊິ່ງໄດ້ສ້າງເງື່ອນໄຂໃຫ້ແກ່ການນຳໃຊ້ລົດໃຊ້ພະລັງງານໄຟຟ້າໃນປະເທດດັ່ງກ່າວ. ຕົວຢ່າງຄື: ລັດຖະບານເອຢິບໄດ້ປະຕິບັດນະໂຍບາຍຍົກເລີກພາສີຕໍ່ລົດໃຊ້ພະລັງງານໄຟຟ້າ ເພື່ອຊຸກຍູ້ການຈຳໜ່າຍລົດໃຊ້ພະລັງງານໄຟຟ້າ. ໃນຂະນະດຽວກັນ, ສະຖານີສາກໄຟຢູ່ພາຍໃນປະເທດເອຢິບກໍໄດ້ເພີ່ມຂຶ້ນຫຼາຍເທົ່າໃນຫຼາຍປີທີ່ຜ່ານມາ.

ນອກນີ້, ລົດໃຊ້ພະລັງງານໄຟຟ້າຂອງຈີນມີທ່າແຮງຫຼາຍດ້ານທີ່ເປັນອັນດັບນຳໜ້າຂອງໂລກ ເຊັ່ນ: ໝໍ້ໄຟຟ້າ, ປັນຍາປະດິດ, ຊັອບແວ, ຕ່ອງໂສ້ອຸດສາຫະກຳອັນຄົບຖ້ວນ, ຕົ້ນທຶນການຜະລິດຕ່ຳ ແລະອື່ນໆ ເຊິ່ງໄດ້ດຶງດູດວິສາຫະກິດອາຟຣິກາຈຳນວນບໍ່ໜ້ອຍເຂົ້າມາຮ່ວມມືກັບວິສາຫະກິດຂອງຈີນ, ນຳເຂົ້າເຕັກນິກ ແລະ ຊຸກຍູ້ການຜະລິດຢູ່ທ້ອງຖິ່ນຕົນ.

ຜະລິດຕະພັນ ແລະ ເຕັກໂນໂລຊີທີ່ນຳເອົາມາໂດຍວິສາຫະກິດຈີນ ກຳລັງຊ່ວຍອາຟຣິກາກ້າວໄປສູ່ອະນາຄົດທີ່ສີຂຽວ ແລະ ແບບຍືນຍົງຫຼາຍກວ່າເກົ່າ. ໃນອະນາຄົດ, ຄຽງຄູ່ກັບການຮ່ວມມືຈີນ-ອາຟຣິກາກ້າວລົງສູ່ລວງເລິກ ແລະ ລັດຖະບານບັນດາປະເທດອາຟຣິກາເພີ່ມທະວີການສະໜັບສະໜູນຕໍ່ອຸດສາຫະກຳລົດໃຊ້ພະລັງງານໄຟຟ້າ ແລະ ການກໍ່ສ້າງພື້ນຖານໂຄງລ່າງໃຫ້ດີຂຶ້ນ, ຕະຫຼາດລົດໃຊ້ພະລັງງານໄຟຟ້າຂອງອາຟຣິກາຈະມີພື້ນທີ່ການພັດທະນາທີ່ກວ້າງຂວາງກວ່າເກົ່າໃນອະນາຄົດ.