ວັນທີ 29 ສິງຫານີ້, ຢູ່ນະຄອນຫຼວງປັກກິ່ງປະເທດຈີນ, ທ່ານສີຈິ້ນຜີງ ປະທານປະເທດຈີນ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ແຈັກ ຊູລິແວນ ຜູ້ຊ່ວຍວຽກຄວາມໝັ້ນຄົງແຫ່ງຊາດຂອງປະທານາທິບໍດີອາເມຣິກາ. ທ່ານສີຈິ້ນຜິງກ່າວເນັ້ນໜັກວ່າ: ໃນການໄປມາຫາສູ່ກັນລະຫວ່າງຈີນ ແລະ ອາເມຣິກາ, ສິ່ງທີ່ສຳຄັນທີ່ສຸດກໍຄືຕ້ອງສ້າງຄວາມຮັບຮູ້ທາງຍຸດທະສາດອັນຖືກຕ້ອງ, ກ່ອນອື່ນຕ້ອງຕອບຄຳຖາມໂດຍລວມໃຫ້ດີ ນັ້ນກໍຄື ຈີນ ແລະ ອາເມຣິກາແມ່ນຄູ່ແຂ່ງ ຫຼື ຄູ່ຮ່ວມມືກັນແທ້; ຫວັງວ່າອາເມຣິກາຈະພະຍາຍາມໄປຕາມທິດທາງອັນດຽວກັນກັບຈີນ, ສະແຫວງຫາຊ່ອງທາງຢູ່ຮ່ວມກັນອັນຖືກຕ້ອງລະຫວ່າງຈີນກັບອາເມຣິກາ ທີ່ເປັນສອງປະເທດທີ່ມີອະລິຍະທຳ, ລະບອບ ແລະ ເສັ້ນທາງທີ່ແຕກຕ່າງກັນ.

ມີການວິເຄາະຊີ້ອອກວ່າ: ຈີນໄດ້ຊີ້ແຈງຫຼັກໝັ້ນຂອງຕົນກ່ອນທ່ານ ແຈັກ ຊູລິແວນ ເດີນທາງມາຢ້ຽມຢາມຈີນ ໂດຍມີຈຸດປະສົງເພື່ອກ່າວເຕືອນອາເມຣິກາຈົ່ງເຄົາລົບຜົນປະໂຫຍດແກນກາງຂອງຈີນຢ່າງແທ້ຈິງ, ຢ່າທຳລາຍການພົວພັນຈີນ-ອາເມຣິກາຍ້ອນເຫດຜົນທາງດ້ານການເມືອງຢູ່ພາຍໃນປະເທດອາເມຣິກາ ເພື່ອຮັບປະກັນການພົວພັນຈີນ-ອາເມຣິກາໃຫ້ພັດທະນາຕາມທິດທາງທີ່ໝັ້ນທ່ຽງ ແລະ ສາມາຄາດຄະເນໄດ້.

ໃນການສົນທະນາທາງຍຸດທະສາດລະຫວ່າງຈີນກັບອາເມຣິກາຮອບນີ້, ຈີນໄດ້ບັນຍາຍຫຼັກໝັ້ນ ແລະ ຈຸດຢືນຕ່າງໆຂອງຕົນອີກເທື່ອໜຶ່ງ ກ່ຽວກັບຈີນ ແລະ ອາເມຣິກາຈະເຮັດແນວໃດເພື່ອຢູ່ຮ່ວມກັນຢ່າງຖືກຕ້ອງ, ສະເໜີໃຫ້ “ຈີນ ແລະ ອາເມຣິກາຄວນຮັກສາທິດທາງອັນຖືກຕ້ອງ, ຂໍ້ກຸນແຈແມ່ນຢູ່ນຳປະມຸກລັດສອງປະເທດຕ້ອງເປັນຜູ້ນຳທາງ” “ຈີນ ແລະ ອາເມຣິກາຈະຫຼີກເວັ້ນການປະທະກັນ ແລະ ການເປັນປໍລະປັກກັນ, ຂໍ້ກຸ່ນແຈແມ່ນຕ້ອງປະຕິບັດຕາມຖະແຫຼງການຮ່ວມ 3 ສະບັບ” “ຈີນ ແລະ ອາເມຣິກາຈະດຳເນີນການໄປມາຫາສູ່ກັນຢ່າງສະດວກ, ຂໍ້ກຸນແຈແມ່ນຕ້ອງປະພຶດຕໍ່ກັນຢ່າງສະເໝີພາບ” “ການພົວພັນຈີນ-ອາເມຣິກາຈຶ່ງຈະກ້າວໄປໄກຢ່າງໜັກແໜ້ນ, ຂໍ້ກຸນແຈແມ່ນຢູ່ນຳການປັບປຸງພື້ນຖານປະຊາມະຕິໃຫ້ດີຂຶ້ນ” “ຈີນ ແລະ ອາເມຣິກາຈະບັນລຸການຢູ່ຮ່ວມກັນໂດຍສັນຕິ, ຂໍ້ກຸນແຈແມ່ນຕ້ອງສ້າງຄວາມຮັບຮູ້ອັນຖືກຕ້ອງ”. “ຂໍ້ກຸນແຈ 5 ຂໍ້” ດັ່ງກ່າວໄດ້ສ່ອງແສງໃຫ້ເຫັນເຖິງສະຕິທີ່ຄຳນຶງເຖິງສະພາບລວມ ແລະ ແນວຄິດອັນສົມເຫດສົມຜົນຂອງຈີນໃນດ້ານການພັດທະນາການພົວພັນຈີນ-ອາເມຣິກາ.

ວົງການພາຍນອກໄດ້ສັງເກດເຫັນແລ້ວວ່າ: ໃນການຢ້ຽມຢາມຈີນເທື່ອນີ້, ທ່ານ ແຈັກ ຊູລິແວນ ໄດ້ເນັ້ນໜັກຈຸດຢືນຂອງອາເມຣິກາ, ເຫັນດີຄວນປະພຶດຕໍ່ກັນຢ່າງສະເໝີພາບ, ອາເມຣິກາ ແລະ ຈີນຈະຢູ່ຮ່ວມກັນໂດຍສັນຕິຢ່າງຖາວອນຢູ່ໃນໂລກໜ່ວຍນີ້ ແລະອື່ນໆ. ການສະແດງທ່າທີເຫຼົ່ານີ້ມີລັກສະນະຕັ້ງໜ້າ ແຕ່ສິ່ງທີ່ສຳຄັນທີ່ສຸດກໍຄື ອາເມຣິກາຄວນປະຕິບັດຕາມຄຳໝັ້ນສັນຍາເຫຼົ່ານີ້ຢ່າງແທ້ຈິງ, ລຶບລ້າງບັນຫາຄົງຄ້າງທີ່ເວົ້າຢ່າງໜຶ່ງ ແຕ່ເຮັດອີກຢ່າງໜຶ່ງ.