ວັນທີ 31 ສິງຫາແລ້ວນີ້, ສະຖານທູດຈີນປະຈໍາຟິລິບປິນໄດ້ອອກແຈ້ງການເຕືອນໃຫ້ຊາວຈີນຢູ່ຟິລິບປິນຈົ່ງເອົາໃຈໃສ່ໃນການປ້ອງກັນເຊື້ອພະຍາດເອັມພອກ.

   ແຈ້ງການສະບັບດັ່ງກ່າວລະບຸວ່າ: ໃນຫວ່າງມໍ່ໆມານີ້ໄດ້ປາກົດມີຜູ້ຕິດເຊື້ອພະຍາດເອັມພອກເພີ່ມຂຶ້ນຢູ່ຟິລິບປິນ, ກະຊວງສາທາລະນະສຸກຟິລິບປິນໄດ້ຮຽກຮ້ອງໃຫ້ປະຊາຊົນຈົ່ງມີສະຕິສະວັງຕົວ, ນໍາໃຊ້ມາດຕະການປ້ອງກັນເພື່ອສະກັດກັ້ນການແພ່ລະບາດຂອງເຊື້ອພະຍາດ, ພ້ອມທັງກໍານົດໃຫ້ຜູ້ໂດຍສານທີ່ເຂົ້າເມືອງຟິລິບປິນຕ້ອງເປັນເຈົ້າການແຈ້ງສະພາບສຸຂະພາບທີ່ກ່ຽວຂ້ອງ. ໃນເດືອນສິງຫາແລ້ວນີ້, ອົງການອະນາໄມໂລກໄດ້ຖືເອົາການແພ່ລະບາດຂອງເຊື້ອພະຍາດເອັມພອກເຂົ້າໃນ “ເຫດການສຸກເສີນດ້ານສາທາລະນະສຸກທີ່ສາກົນໃຫ້ຄວາມສົນໃຈ” ອີກເທື່ອໜຶ່ງ.