ຄຳບູຮານຈີນກ່າວວ່າ: ການມັກຊອກຮູ້ຮ່ຳຮຽນໃນຍາມເຍົາໄວ ກໍປຽບເໝືອນຕາເວັນຂຶ້ນທີ່ສ່ອງແສງສະຫວ່າງສະໄຫວ. ການຮ່ຳຮຽນບໍ່ພຽງແຕ່ເປັນຄວາມຕ້ອງການດ້ານການພັດທະນາຕົນເອງຂອງຊາວໜຸ່ມເຍົາວະຊົນເທົ່ານັ້ນ ຫາກຍັງເປັນຄວາມຮຽກຮ້ອງຂອງຍຸກສະໄໝຕື່ມອີກ.

ກ່ຽວກັບການຮຽນ, ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນເຄີຍກ່າວໃນໂອກາດພົບປະໂອ້ລົມກັບຄູອາຈານ ແລະ ນັກສຶກສາຢູ່ມະຫາວິທະຍາໄລປັກກິ່ງ ເມື່ອເດືອນພຶດສະພາປີ2014ວ່າ: “ຕ້ອງດຸໝັ່ນໃນການຮ່ຳຮຽນ, ສະດຸ້ງໄວໃນການຊອກຮູ້, ເອົາໃຈໃສ່ເຊື່ອມຊຶມຄວາມຮູ້ທີ່ໄດ້ຮຽນມາໃຫ້ເຂົ້າເຖິງຈິດໃຈ ແລ້ວເຮັດໃຫ້ກາຍເປັນທັດສະນະແລະຄວາມຄິດຂອງຕົນເອງ, ບໍ່ພຽງແຕ່ຕ້ອງເຈາະຈົງສຶກສາຄົ້ນຄວ້າ ແລະ ຮ່ຳຮຽນໃຫ້ມີຄວາມຮູ້ກວ້າງຂວາງເທົ່ານັ້ນ, ຫາກຍັງຕ້ອງເອົາໃຈໃສ່ປະເທດຊາດ, ເອົາໃຈໃສ່ປະຊາຊົນ ແລະເອົາໃຈໃສ່ໂລກ, ຮຽນຮູ້ແບກຫາບຄວາມຮັບຜິດຊອບທາງສັງຄົມນຳອີກ. ” ຄຳເວົ້າຂອງທ່ານສີຈິ້ນຜິງໄດ້ຊີ້ໃຫ້ເຫັນວິທີການຮຽນແບບລົງເລິກຢ່າງມີປະສິດທິພາບສູງ ແລະ ຍັງໄດ້ຊີ້ແຈ້ງເຖິງຈຸດປະສົງທີ່ຖືກຕ້ອງໃນການຊອກຮູ້ຮ່ຳຮຽນຕື່ມອີກ.

ໃນຍຸກກະສິກຳສະໄໝບູຮານ, ຄົນຜູ້ໜຶ່ງຂໍພຽງແຕ່ຮຽນໜັງສືພຽງບໍ່ເທົ່າໃດປີເທົ່ານັ້ນກໍຈະຄຸ້ມຄ່າໃຊ້ໄປໄດ້ຕະຫຼອດຊີວິດ. ແຕ່ວ່າໃນຍຸກປັດຈຸບັນ, ການປັບປຸງໃໝ່ຂອງ ຄວາມຮູ້ພວມເລັ່ງໄວຂຶ້ນຢູ່ເລື້ອຍໆ, ການແບ່ງງານໃນສັງຄົມນັບມື້ນັບລະອຽດຂຶ້ນ, ເຕັກນິກໃໝ່, ຮູບແບບທຸລະກິດໃໝ່ ແລະ ຮູບແບບອຸດສາຫະກຳໃໝ່ໄດ້ກາກົດຂຶ້ນຢ່າງບໍ່ຢຸດຢັ້ງ, ພວກເຮົາຈຳເປັນຕ້ອງຮັກສາພາວະດຸໝັ່ນຮ່ຳຮຽນຢູ່ສະເໝີ ຈຶ່ງຈະສາມາດທ່ວງທັນກັບຍຸກສະໄໝໄດ້.

ຄືດັ່ງທ່ານສີຈິ້ນຜິງໄດ້ເວົ້າວ່າ: “ຖ້າຫາກວ່າ ພວກເຮົາບໍ່ພະຍາຍາມຍົກສູງລະດັບຄວາມຮູ້ໃນດ້ານຕ່າງໆ, ບໍ່ມີຄວາມຕື່ນຕົວໃນການຮຽນເອົາຄວາມຮູ້ວິທະຍາສາດດ້ານຕ່າງໆ, ບໍ່ເປັນເຈົ້າການເລັ່ງຮຽນເອົາຄວາມຮູ້ໃໝ່, ປັບປຸງໂຄງປະກອບດ້ານຄວາມຮູ້, ເປີດສາຍຕາ ແລະ ມູມມອງໃຫ້ກວ້າງອອກ, ກໍຍາກທີ່ຈະເພີ່ມຄວາມຮູ້ຄວາມສາມາດໄດ້ ແລະ ກໍຈະບໍ່ສາມາດຍາດໄດ້ຄວາມເປັນເຈົ້າການ, ຍາດໄດ້ທ່າແຮງ ແລະ ຍາດໄດ້ອະນາຄົດ.”

ຂົງຈື້ ນັກປັດຊະຍາທີ່ມີຊື່ສຽງໃນສະໄໝບູຮານຈີນເຄີຍກ່າວວ່າ: ໄດ້ແຕ່ຮຽນພຽງຢ່າງດຽວ ໂດຍບໍ່ຄົ້ນຄິດຕຶກຕອງ ຈະບໍ່ໄດ້ຮັບຜົນຫຍັງ. ສະນັ້ນ, ມີພຽງແຕ່ເຊື່ອມຊຶມຄວາມຮູ້ທີ່ໄດ້ຮຽນມານັ້ນໃຫ້ເຂົ້າເຖິງຈິດໃຈ ເຮັດໃຫ້ກາຍເປັນທັດສະນະ ແລະ ຄວາມຄິດຂອງຕົນເອງເທົ່ານັ້ນ, ຈຶ່ງຈະສາມາດໝູນໃຊ້ຄວາມຮູ້ໃຫ້ເປັນປະໂຫຍດແກ່ຕົນເອງໄດ້. ຕອນໄວໜຸ່ມ, ທ່ານສີຈິ້ນຜິງເຄີຍອ່ານປຶ້ມ “ທິດສະດີວ່າດ້ວຍທຶນ” ຂອງທ່ານກາກ ມາກ, ເພິ່ນໄດ້ເຊື່ອມຊຶມຈຸດສຸມຕ່າງໆຈາກ ປຶ້ມ “ທິດສະດີວ່າດ້ວຍທຶນ” ສະບັບພາສາຈີນທີ່ແຕກຕ່າງກັນຫຼາຍສະບັບ ພ້ອມທັງໄດ້ຂຽນບົດບັນທຶກການຮຽນຫົວໃຫຍ່ທັງໝົດ 18 ຫົວ. ເປັນຍ້ອນການຮຽນທິດສະດີ ພ້ອມທັງປະຕິບັດຕົວຈິງໄປພ້ອມຄືແບບນີ້, ຈຶ່ງເຮັດໃຫ້ເພິ່ນສາມາດເສີມຂະຫຍາຍລັດທິມາກໃຫ້ອຸດົມສົມບູນຂຶ້ນ, ໝູນໃຊ້ທິດສະດີວິທະຍາສາດ, ທັດສະນະຫຼັກໝັ້ນ ແລະ ວິທີການຂອງລັດທິມາກເພື່ອຮັບຮູ້ ແລະ ດັດສ້າງປະເທດຈີນ.

ໃນໂອກາດຢ້ຽມຢາມມະຫາວິທະຍາໄລປະຊາຊົນຈີນ, ທ່ານສີຈິ້ນຜິງເຄີຍໄດ້ແບ່ງປັນວິທີການປະສົມປະສານລະຫວ່າງທິດສະດີ ກັບ ພຶດຕິກຳຕົວຈິງໃຫ້ກັບຄູອາຈານ ແລະ ນັກສຶກສາຂອງມະຫາວິທະຍາໄລແຫ່ງນີ້ວ່າ: “ສິ່ງຕົວຈິງກັບສິ່ງທີ່ຮຽນມາຈາກປຶ້ມແບບຮຽນ ແລະ ສິ່ງທີ່ຢູ່ໃນຄວາມຄິດມັນແຕກຕ່າງກັນໄດ໋!”

ຈີນມີຄຳບູຮານວ່າ: ສິ່ງທີ່ຕາເຫັນບໍ່ທໍ່ຕີນຍ່າງໄປສຳຫຼວດຕົວຈິງໜ້າເຊື່ອຖືກວ່າ. ຢູ່ຈີນປັດຈຸບັນ, ຊາວໜຸ່ມນັບມື້ນັບຫຼາຍຂຶ້ນໄດ້ຖືເອົາຄວາມຮູ້ທີ່ໄດ້ຮຽນມານັ້ນເຊື່ອມໂຍງເຂົ້າກັບພຶດຕິກຳຕົວຈິງດ້ານການພັດທະນາສັງຄົມ. ຈາກແທ່ນຂຸດເຈາະນ້ຳມັນທາງທະເລ “ເຊີ່ນໄຫ-1” ເຊິ່ງເປັນຖານສະສົມພະລັງງານຂະໜາດໃຫຍ່ ຈົນຮອດໂຄງການກ້ອງສ່ອງໂທລະທັດວິທະຍຸໜ້າໝາກບານທີ່ມີເສັ້ນຜ່າສູນກາງ 500 ແມັດ ຫຼື FAST ເອີ້ນຫຍໍ້ວ່າ “ກ້ອງຊ່ອງຟ້າຈີນ” ຢູ່ແຂວງກຸ້ຍໂຈ່ວ , ສາມາດເວົ້າໄດ້ວ່າ ບໍ່ວ່າ ທ້ອງຟ້າ ຫຼື ທະເລ ລ້ວນແຕ່ເປັນພື້ນທີ່ກວ້າງຂວາງສຳລັບຄົນຈີນຮຸ່ນໜຸ່ມສູ້ຊົນພັດທະນາ. ຈາກທົ່ງໄຮ່ທົ່ງນາຈົນຮອດຮົ້ວສວນຢູ່ຫຼັງເຮືອນ ແລະ ໜ້າເຮືອນ, ໄວໜຸ່ມພວມນຳໃຊ້ຄວາມຮູ້ດ້ານວິທະຍາສາດກະສິກຳສູ້ຊົນເຮັດວຽກຢູ່ຂັ້ນພື້ນຖານເພື່ອສະແຫວງຫາຄວາມໃຝ່ຝັນຂອງຕົນ, ຈາກການອະນຸລັກມໍລະດົກວັດທະນະທຳຢູ່ເມືອງຕຸ່ນຫວງທ່າມກາງທະເລຊາຍ ຈົນຮອດການບຸກບືນສູ້ຊົນຢູ່ສະໜາມແຂ່ງຂັນກິລາໂອລິມປິກ, ແນວພັນແຫ່ງໄວໜຸ່ມທຸກເມັດຕ່າງກໍພວມສະສົມພະລັງແຮງເພື່ອເຕີບໂຕຂຶ້ນ.

ການທີ່ “ເອົາໃຈໃສ່ປະເທດຊາດ, ເອົາໃຈໃສ່ປະຊາຊົນ ແລະເອົາໃຈໃສ່ໂລກ, ຮຽນຮູ້ແບກຫາບຄວາມຮັບຜິດຊອບທາງສັງຄົມ” ໃນຂະບວນການຮ່ຳຮຽນນັ້ນ ເປັນສິ່ງທີ່ຕ້ອງເຮັດໃນການຮຽນຂອງທ່ານສີຈິ້ນຜິງ, ຍັງເປັນຄຳສັ່ງສອນດ້ວຍຄວາມສຳຄັນ ແລະ ຄວາມຫວັງເປັນຢ່າງຍິ່ງທີ່ເພິ່ນຝາກໄວ້ນຳຊາວໜຸ່ມເຍົາວະຊົນຂອງຈີນ.

ໃນຂະນະທີ່ຊາວໜຸ່ມເຍົາວະຊົນຈີນທັງຫຼາຍຜ່ານຈາກການຮຽນເພື່ອຊອກຄົ້ນຫາເສັ້ນທາງແຫ່ງການສ້າງສາປະເທດຊາດໃຫ້ເຂັ້ມແຂງນັ້ນ, ທາງສັງຄົມຈີນກໍໄດ້ສ້າງສະພາບແວດລ້ອມທີ່ມີຄວາມຍຸຕິທຳ ເປັນທຳ, ອົບອຸ່ນ ແລະ ກວມລວມຫຼາຍກວ່າເກົ່າເພື່ອກະຕຸ້ນຈິດໃຈຫ້າວຫັນ ແລະຄວາມມີຊີວິດວາດ້ານການຮຽນຂອງຊາວໜຸ່ມເຍົາວະຊົນ.

ຕົວຢ່າງ: ປີ2023ຜ່ານມາ, ຈີນໄດ້ຈັດສັນງົບປະມານເຂົ້າໃນການວຽກງານການສຶກສາລວມທັງໝົດຈຳນວນມີເຖິງ 6,459 ຕື້ 500 ລ້ານຢວນ, ອັດຕາການເຂົ້າເຖິງການສຶກສາພາກບັງຄັບໄດ້ຮັບການປັບປຸງໃຫ້ໝັ້ນຄົງຢູ່ໃນລະດັບ 95,7%, ອັດຕາການເຂົ້າຮຽນການສຶກສາຊັ້ນສູງບັນລຸເຖິງ 60,2%. ໂຄງການການສຶກສາຕ່າງໆເຊັ່ນ: ການທົດລອງປະຕິຮູບການຮັບເອົານັກສຶກສາວິຊາສາຂາວິທະຍາສາດຂັ້ນພື້ນຖານ(ຫຼືເອີ້ນຫຍໍ້ວ່າ ແຜນການເສີມສ້າງພື້ນຖານ) ແລະ ແຜນການບຳລຸງສ້າງຜູ້ມີຄວາມຮູ້ຄວາມສາມາດຊັ້ນຍອດດ້ານຂະແໜງວິຊາຂັ້ນພື້ນຖານ ເປັນຕົ້ນໄດ້ເລີ່ມປະຕິບັດ, ໄດ້ຊຸກຍູ້ການປະຕິຮູບດ້ານການສຶກສາອົບຮົມວິສະວະກອນດີເດັ່ນຢ່າງຕໍ່ເນື່ອງ. ເວທີການສຶກສາອັດສະລິຍະແຫ່ງຊາດຈີນໄດ້ກາຍເປັນສູນດິຈີຕອນ ແລະ ເວທີບໍລິການດ້ານຊັບພະຍາກອນການສຶກສາອັນດັບໜຶ່ງຂອງໂລກ. ສັງຄົມແຫ່ງການຮຽນຮູ້ ແລະ ປະເທດໃຫຍ່ແຫ່ງການຮຽນຮູ້ທີ່ທຸກຄົນຮ່ຳຮຽນ, ຮຽນໄດ້ຢູ່ທຸກບ່ອນ ແລະ ທຸກເວລາພວມເລັ່ງບັນລຸຄວາມເປັນຈິງຢູ່ຈີນ.  ເດືອນກໍລະກົດປີນີ້, ກອງປະຊຸມຄົບຄະນະຄັ້ງທີ3ຂອງຄະນະກຳມະການສູນກາງພັກຄອມມູນິດຈີນສະໄໝທີ20ໄດ້ກຳນົດເອົາ ການສຶກສາ, ວິທະຍາສາດເຕັກໂນໂລຊີ ແລະ ຜູ້ມີຄວາມຮູ້ຄວາມສາມາດໃຫ້ເປັນສິ່ງຄ້ຳຊູລັກສະນະຂັ້ນພື້ນຖານ ແລະ ລັກສະນະຍຸດທະສາດໃຫ້ແກ່ຄວາມທັນສະໄໝແບບຈີນ, ໂດຍໄດ້ວາງແຜນຢ່າງເປັນລະບົບກ່ຽວກັບການລົງເລິກການປະຕິຮູບແບບສັງລວມດ້ານການສຶກສາ.

ທ່ານສີຈິ້ນຜິງເຄີຍຊີ້ອອກວ່າ: “ຄວາມໃຝ່ຝັນແມ່ນເລີ່ມຈາກການຮຽນ, ການສ້າງພາລະກິດໃຫ້ສຳເລັດຜົນແມ່ນຕ້ອງອາໄສຄວາມຮູ້ຄວາມສາມາດ”.  ເວົ້າສຳລັບຊາວໜຸ່ມເຍົາວະຊົນຈີນແລ້ວ, ຢູ່ບົນຂະບວນການໃໝ່ແຫ່ງການສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ, ແມ່ນມີເວທີອັນກວ້າງໃຫຍ່ໄພສານສຳລັບການເສີມຂະຫຍາຍຄວາມຮູ້ຄວາມສາມາດ. ມີພຽງແຕ່ດຸໝັ່ນໃນການຮ່ຳຮຽນ, ສະດຸ້ງໄວໃນການຊອກຮູ້ເທົ່ານັ້ນ, ຈຶ່ງຈະສາມາດຝຶກຝົນຫຼໍ່ຫຼອມຕົນເອງ, ສ້າງຜົນງານໃນຊີວິດຂອງຕົນ, ຕອບບຸນແທນຄຸນ ແລະ ຮັບໃຊ້ປະເທດຊາດທ່າມກາງຊີວິດທີ່ມີຄວາມຟົດຟື້ນ.