ໂດຍຕອບສະໜອງຕາມຄຳເຊີນຂອງທ່ານສີຈິ້ນຜິງ ປະທານປະເທດຈີນ, ປະມຸກລັດ ຫົວໜ້າ ແລະ ຜູ້ຕາງໜ້າລັດຖະບານຈາກ 50 ກວ່າປະເທດສະມາຊິກເວທີເປິກສາຫາລືການຮ່ວມມືຈີນ-ອາຟຣິກາ, ປະທານຄະນະກຳມະການສະຫະພາບອາຟຣິກາ, ເລຂາທິການໃຫຍ່ອົງການສະຫະປະຊາຊາດ, ພ້ອມດ້ວຍຜູ້ຮັບຜິດຊອບອົງການຈັດຕັ້ງສາກົນຫຼາຍອົງການຈະເຂົ້າຮ່ວມກອງປະຊຸມສຸດຍອດເວທີເປິກສາຫາລືການຮ່ວມມືຈີນ-ອາຟຣິກາປີ 2024 ທີ່ຈັດຂຶ້ນຢູ່ນະຄອນຫຼວງປັກກິ່ງ. ນີ້ບໍ່ພຽງແຕ່ເປັນງານມະໂຫລານຂອງຈີນ ແລະ ອາຟຣິກາເທົ່ານັ້ນ, ແຕ່ຍັງເປັນເຫດການສຳຄັນສຳລັບ “ພາກໃຕ້ໂລກ” ແລະ ປະຊາຄົມທົ່ວໂລກອີກດ້ວຍ.

ເປັນຫຍັງການຮ່ວມມືຈີນ-ອາຟຣິກາສາມາດຮັກສາການພັດທະນາທີ່ດີມາຢ່າງຍາວນານ? ຄຳຕອບນັ້ນກໍຄືຄຳເວົ້າຂອງທ່ານ ສີຈິ້ນຜິງ ປະທານປະເທດຈີນທີ່ວ່າ: “ຈີນໄດ້ຖືເອົາການພັດທະນາຄວາມສາມັກຄີ ແລະ ການຮ່ວມມືກັບປະເທດອາຟຣິກາ ເປັນພື້ນຖານສຳຄັນໃນນະໂຍບາຍການຕ່າງປະເທດຂອງຈີນຢ່າງສະເໝີຕົ້ນສະເໝີປາຍ. ຈີນຈະປະຕິບັດຕາມທັດສະນະທີ່ຈິງໃຈ ຕິດແທດຕົວຈິງ  ແລະສະໜິດສະໜົມ, ເພີ່ມທະວີການຮ່ວມມືບົນຈິດໃຈມິດຕະພາບກັບປະເທດອາຟຣິກາ ແລະ ສະໜັບສະໜູນເຊິ່ງກັນ ແລະ ກັນ.”

ເສັ້ນທາງລົດໄຟມົມບາຊາ-ໄນໂຣບີໄດ້ເຊື່ອມຕໍ່ກັບທ່າກຳປັ່ນໃຫຍ່ທີ່ສຸດຂອງອາຟຣິກາຕາເວັນອອກ ແລະ ນະຄອນຫຼວງໄນໂຣບີປະເທດເຄັນຢາ, ມີໄລຍະຍາວທັງໝົດປະມານ 480 ກິໂລແມັດ, ເປັນເສັ້ນທາງລົດໄຟແບບທັນສະໄໝຂອງອາຟຣິກາທີ່ໄດ້ໃຊ້ມາດຕະຖານຂອງຈີນ ເຕັກໂນໂລຊີຂອງຈີນ ແລະ ເຄື່ອງອຸປະກອນຂອງຈີນ. ເມື່ອຮ້ອຍປີກ່ອນ, ພວກລ່າເມືອງຂຶ້ນຕາເວັນຕົກເຄີຍສ້າງທາງລົດໄຟທີ່ເປັນລາງຂະໜາດ 1 ແມັດຢູ່ເຄັນຢາເສັ້ນໜຶ່ງ, ເພື່ອເພີ່ມທະວີການລ່າເອົາຫົວເມືອງຂຶ້ນຢູ່ອາຟຣິກາຕາເວັນອອກ. ປັດຈຸບັນ, ພາຍໃຕ້ຄວາມພະຍາຍາມຮ່ວມກັນຢ່າງຕັ້ງໜ້າຂອງຈີນ ແລະ ເຄັນຢາ, ເສັ້ນທາງລົດໄຟສາຍນີ້ໄດ້ກາຍເປັນໂຄງການຕົວແບບ ແລະ ຍັງເປັນແບບຢ່າງຂອງຄວາມສຳເລັດລະຫວ່າງຈີນ ແລະ ເຄັນຢາຮ່ວມກັນສ້າງ “ໜຶ່ງແລວໜຶ່ງເສັ້ນທາງ”. ການກໍ່ສ້າງ ແລະ ບໍລິຫານ ເສັ້ນທາງລົດໄຟມົມບາຊາ-ໄນໂຣບີ, ໄດ້ສ້າງໂອກາດດ້ານການປະກອບອາຊີບຫຼາຍກວ່າ 74.000 ຕຳແໜ່ງໃຫ້ແກ່ເຄັນຢາ, ໄດ້ບຳລຸງສ້າງນັກວິຊາການ ແລະ ພະນັກງານບໍລິຫານທີ່ມີຄຸນນະພາບສູງເຖິງ 2800 ກວ່າຄົນ. ຕາມການຄາດຄະເນຂອງຜູ້ຊ່ຽວຊານເຫັນວ່າ, ໂຄງການດັ່ງກ່າວໄດ້ມີອັດຕາປະກອບສ່ວນສູງກວ່າ 2% ຕໍ່ຍອດມູນຄ່າການຜະລິດພາຍໃນຂອງປະເທດເຄັນຢາ.

ໃນຂະນະດຽວກັນ, ຢູ່ຕາມແຜ່ນດິນໃຫຍ່ອາຟຣິກາທີ່ກວ້າງຂວາງນັ້ນ, ເຕັກນິກເຂົ້ານາພັນປະສົມຂອງຈີນໄດ້ແກ້ໄຂບັນຫາ ການຂາດແຄນສະບຽງອາຫານຂອງຫຼາຍປະເທດອາຟຣິກາ, ເຕັກນິກໃນການປູກພືດຈຸ້ນຊາວຂອງຈີນໄດ້ບຸກເບີກອະນາຄົດໃໝ່ທີ່ກຳລັງກ້າວໄປສູ່ການສ້າງຄວາມຮັ່ງມີຫຼາຍຂຶ້ນ, ຫ້ອງປະຕິບັດງານຫຼູປ່ານເຮັດໃຫ້ຊາວໜຸ່ມອາຟຣິກາໄດ້ເຂົ້າມາຮຽນຮູ້ສີມືວິຊາຊີບໃໝ່ຫຼາຍກວ່າເກົ່າ. ບົດຮຽນຂອງຈີນ ເຕັກນິກຂອງຈີນ ແລະ ແຜນການຂອງຈີນນັບມື້ນັບຫຼາຍໄດ້ສະໜອງທາງເລືອກໃໝ່ໃຫ້ປະເທດອາຟຣິກາບັນລຸການພັດທະນາແບບຍືນຍົງຢ່າງເປັນເຈົ້າຕົນເອງ, ແລະ ຊຸກຍູ້ພາລະກິດການຫັນເປັນທັນສະໄໝ.

ປັດຈຸບັນ, ສຽງແຫ່ງຄວາມດີໃຈຂອງອາຟຣິກາທີ່ສະໜັບສະໜູນການຮ່ວມມືຈີນ-ອາຟຣິກາມີຄວາມໜັກແໜ້ນຍິ່ງໆຂຶ້ນ ແລະ ດັງກ້ອງຍິ່ງໆຂຶ້ນ. “ຈີນຍຶດໝັ້ນໃຫ້ ການຊ່ວຍເຫຼືອມອບປາໃຫ້ ແລະ ໃນຂະນະດຽວກັນ ກໍໄດ້ສອນວິທີຫາປາດ້ວຍຕົນເອງໃຫ້. ພວກເຮົາຫວັງວ່າຈະຮຽນຮູ້ການຕຶກເບັດດ້ວຍຕົນເອງພາຍໃຕ້ການຊ່ວຍເຫຼືອຂອງຈີນ” “ມີບາງຄົນມັກຊີ້ໄມ້ຊີ້ມືໃສ່ພວກເຮົາເລື້ອຍໆ, ສຳລັບຈີນແມ່ນໄດ້ໃຊ້ການກະທຳຕົວຈິງເພື່ອຊ່ວຍເຫຼືອພວກເຮົາຊຸກຍູ້ການພັດທະນາເສດຖະກິດສັງຄົມ”.

ໃນຖານະເປັນເວທີສຳຄັນທີ່ປະຊາຊົນຈີນ ແລະ ອາຟຣິກາປັບປຸງມິດຕະພາບອັນເປັນມູນເຊື້ອ ແລະ ຊຸກຍູ້ການພັດທະນາພ້ອມກັນ, ທ່ານປະທານສີຈິ້ນຜິງໄດ້ຖືທ່າທີອັນຈິງໃຈຢ່າງສະເໝີຕົ້ນສະເໝີປາຍ, ຜ່ານຈາກເວທີເປິກສາຫາລືການຮ່ວມມືຈີນ-ອາຟຣິກາ, ຮ່ວມກັບບັນດາປະເທດອາຟຣິກາ ເປິກສາຫາລືການຮ່ວມມືທີ່ຕິດແທດຕົວຈິງ ແລະ ຮ່ວມກັນວາດພາບການພັດທະນາ. ປີ 2015, ຜູ້ນຳປະເທດອາຟຣິກາຫຼາຍທ່ານຫວັງວ່າຍົກລະດັບກອງປະຊຸມລະດັບລັດຖະມົນຕີຂອງເວທີເປິກສາຫາລືການຮ່ວມມືຈີນ-ອາຟຣິກາ ຂຶ້ນເປັນກອງປະຊຸມສຸດຍອດ, ທ່ານປະທານສີຈິ້ນຜິງໄດ້ຍິນດີຊົມຊື່ນດ້ວຍຄວາມພາກພູມໃຈ. ປີ 2018, ກອງປະຊຸມສຸດຍອດປັກກິ່ງຂອງເວທີເປິກສາຫາລືຈີນ-ອາຟຣິກາໄດ້ຮັບສຽງຕອບຮັບເປັນຢ່າງດີຈາກຝ່າຍຕ່າງໆ ໂດຍມີຜູ້ນຳປະເທດອາຟຣິກາ 50 ກວ່າທ່ານ ແລະ ປະທານຄະນະກຳມະການສະຫະພາບອາຟຣິກາໄດ້ນຳພາຄະນະຜູ້ແທນເດີນທາງມາເຕົ້າໂຮມກັນຢູ່ນະຄອນຫຼວງປັກກິ່ງ ເພື່ອເປິກສາຫາລືກ່ຽວກັບການຮ່ວມມືຕົວຈິງ. ວັນທີ 24 ສິງຫາ 2023, ໃນເວລາພົບປະກັບບັນດາຜູ້ນຳປະເທດອາຟຣິກາຢູ່ໂຈຮານເນັສເບີກຂອງອາຟຣິກາໃຕ້, ທ່ານປະທານສີຈິ້ນຜິງປະກາດວ່າ, ຈີນຍິນດີສະເໜີ “ຂໍ້ລິເລີ່ມທີ່ສະໜັບສະໜູນອາຟຣິກາໃນການຫັນເປັນທັນສະໄໝ”, ຈັດຕັ້ງປະຕິບັດ “ແຜນການທີ່ຈີນຊ່ວຍເຫຼືອກະສິກຳອາຟຣິກາຫັນເປັນທັນສະໄໝ”, ປະຕິບັດ “ແຜນການຮ່ວມມືການບຳລຸງສ້າງຜູ້ມີຄວາມຮູ້ຄວາມສາມາດລະຫວ່າງຈີນ-ອາຟຣິກາ”, ເພື່ອຊຸກຍູ້ໃຫ້ການເຊື່ອມໂຍງເຂົ້າເປັນອັນໜຶ່ງອັນດຽວກັນຂອງອາຟຣິກາ ແລະ ພາລະກິດການຫັນເປັນທັນສະໄໝກ້າວເຂົ້າສູ່ເສັ້ນທາງທີ່ໄວຂຶ້ນກວ່າເກົ່າ.

ວັນທີ 4 ກັນຍານີ້, ກອງປະຊຸມສຸດຍອດເວທີເປິກສາຫາລືການຮ່ວມມືຈີນ-ອາຟຣິກາຄັ້ງໃໝ່ຈະຈັດຂຶ້ນຢ່າງຍິ່ງໃຫຍ່ຢູ່ນະຄອນຫຼວງປັກກິ່ງ, ວົງຄະນາຍາດແຫ່ງການຮ່ວມມືຈີນ-ອາຟຣິກາຈະມາເຕົ້າໂຮມກັນອີກເທື່ອໜຶ່ງ, ພາຍໃຕ້ການນຳພາຮ່ວມກັນຂອງທ່ານປະທານສີຈິ້ນຜິງ ແລະ ຜູ້ນຳປະເທດອາຟຣິກາ, ຈີນ ແລະ ປະເທດອາຟຣິກາຮ່ວມມືກັນຊຸກຍູ້ການຫັນເປັນທັນສະໄໝ, ຮ່ວມກັນສ້າງຄູ່ຮ່ວມຊາຕາກຳຈີນ-ອາຟຣິກາໃນລະດັບສູງ, ຍ່ອມຈະຂຽນໜ້າໃໝ່ທີ່ມີສີສັນອັນຂຸ້ນຂ້ຽວໃນປະຫວັດສາດທີ່ປະເທດພວມພັດທະນາຜະຫງາກຂຶ້ນພ້ອມກັນ ແລະ ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.