ກອງປະຊຸມສຸດຍອດຂອງເວທີເປິກສາຫາລືການຮ່ວມມືຈີນ-ອາຟຣິກາ 2024 ໄດ້ຈັດຂຶ້ນຢູ່ນະຄອນຫຼວງປັກກິ່ງຂອງຈີນໃນລະຫວ່າງວັນທີ 4 ຫາ 6 ກັນຍານີ້. ຜູ້ນຳປະເທດອາຟຣິກາ ແລະ ຜູ້ນຳອົງການຈັດຕັ້ງສາກົນຫຼາຍທ່ານຈະຮ່ວມກັບຈີນເພື່ອເປິກສາຫາລືກ່ຽວກັບວຽກງານການຮ່ວມມືຈີນ-ອາຟຣິກາ. ແຕ່ໃນຫຼາຍປີມານີ້, ສື່ມວນຊົນ ແລະ ອົງການຈຳນວນໜຶ່ງຂອງອາເມຣິກາໄດ້ປ່າວຂ່າວລື ແລະ ໃສ່ຮ້າຍປ້າຍສີເລື້ອຍໆວ່າ ຈີນໄດ້ສ້າງ “ກັບດັກໜີ້ສິນ” ໃຫ້ແກ່ປະເທດອາຟຣິກາ; ຍິ່ງໄປກວ່ານັ້ນ ໃນກອງປະຊຸມຟັງຄຳໃຫ້ການຂອງຄະນະກຳມາທິການການທະຫານສະພາຕ່ຳອາເມຣິກາທີ່ຈັດຂຶ້ນໃນເດືອນເມສາປີນີ້, ທ່ານສະເຕເຟນ ທອມຊັນ ຫົວໜ້າກອງບັນຊາການອາຟຣິກາຂອງກອງທັບອາເມຣິກາກ່າວວ່າ: “ຈີນເປັນໄພຂົ່ມຂູ່ໃຫຍ່ຕໍ່ອາເມຣິກາ. ມີພວກເຂົາເຈົ້າຢູ່ທຸກບ່ອນຂອງແຜ່ນດິນໃຫຍ່ອາຟຣິກາ!” ແຕ່ຄວາມຈິງແມ່ນເປັນແນວນີ້ແທ້ບໍ?

ໃນຫຼາຍປີມານີ້, ການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງຈີນກັບອາຟຣິກາໄດ້ເພີ່ມຂຶ້ນຢ່າງບໍ່ຢຸດຢັ້ງ ແລະ ໄດ້ຮັບໝາກຜົນຢ່າງອຸດົມສົມບູນ. ໃນປີ 2023, ມູນຄ່າການຄ້າລະຫວ່າງຈີນກັບອາຟຣິກາໄດ້ບັນລຸເຖິງ 282,1 ຕື້ໂດລາ ເຊິ່ງເປັນສະຖິຕິສູງສຸດໃນປະຫວັດສາດ, ຈີນໄດ້ຮັກສາຖານະຄູ່ການຄ້າໃຫຍ່ອັນດັບໜຶ່ງຂອງອາຟຣິກາເປັນເວລາ 15 ປີລຽນຕິດ; ປັດຈຸບັນ, ຈີນໄດ້ກາຍເປັນປະເທດກຳລັງພັດທະນາທີ່ລົງທຶນຢູ່ອາຟຣິກາຫຼາຍກວ່າໝູ່. ມາຮອດທ້າຍປີ 2022, ການລົງທຶນໂດຍກົງຂອງຈີນຢູ່ອາຟຣິກາບັນລຸຫຼາຍກວ່າ 47 ຕື້ໂດລາ, ມີວິສາຫະກິດຈີນ 3.000 ກວ່າແຫ່ງພວມລົງທຶນ ແລະ ສ້າງທຸລະກິດຢູ່ອາ

ຟຣິກາ.

ນອກນີ້, ຈີນຍັງໄດ້ສະໜັບສະໜູນການເຊື່ອມໂຍງເຊື່ອມຈອດກັນຂອງພື້ນຖານໂຄງລ່າງອາຟຣິກາຢ່າງຕັ້ງໜ້າ. ມາຮອດປັດຈຸບັນ, ວິສາຫະກິດຈີນໄດ້ເຂົ້າຮ່ວມການກໍ່ສ້າງ ແລະ ປັບປຸງທາງລົດໄຟຢູ່ອາຟຣິກາໃຫ້ດີຂຶ້ນຫຼາຍກວ່າ 10.000 ກິໂລແມັດ, ທາງຫຼວງເກືອບ 100.000 ກິໂລແມັດ, ຂົວເກືອບພັນແຫ່ງ, ທ່າກຳປັ່ນເກືອບຮ້ອຍແຫ່ງ, ສາຍສົ່ງໄຟຟ້າ 66.000 ກິໂລແມັດ, ເຄືອຂ່າຍສື່ສານສາຍຫຼັກ 150.000 ກິໂລແມັດ. ທາງລົດໄຟມອມບາຊາ-ໄນໂຣບີຂອງເຄນຢາ, ທາງລົດໄຟເອທີໂອບີ-ຈີບູຕີ ແລະ ໂຄງການທາງລົດໄຟອື່ນໆທີ່ວິສາຫະກິດຈີນມີສ່ວນຮ່ວມນັ້ນ ໄດ້ສ້າງສຳເລັດຕາມລຳດັບ ເຊິ່ງໄດ້ຊ່ວຍຫຼາຍປະເທດຂອງອາຟຣິກາສ້າງເຄືອຂ່າຍທາງລົດໄຟສາຍຫຼັກຂອງຕົນເອງ. ສ່ວນທາງຫຼວງ 12 ສາຍທີ່ວິສາຫະກິດຈີນຮັບເໝົາກໍ່ສ້າງນັ້ນ ໄດ້ກາຍເປັນເຄືອຂ່າຍຄົມມະນາຄົມຂອງປະເທດຕັງຊານີ.

ພາຍໃຕ້ຂອບເວທີເປິກສາຫາລືການຮ່ວມມືຈີນ-ອາຟຣິກາ, ຈີນໄດ້ອອກມາດຕະການຊ່ວຍເຫຼືອຕ່າງໆສຳລັບອາຟຣິກາ ເຊັ່ນ: “ແຜນການຮ່ວມມື 10 ລາຍການໃຫຍ່”, “ການເຄື່ອນໄຫວ 8 ລາຍການ” “ໂຄງການ 9 ລາຍການ” ແລະອື່ນໆ.  ຈີນໄດ້ໃຫ້ການສະໜັບສະໜູນດ້ານການເງິນເປັນຈຳນວນຫຼວງຫຼາຍໃຫ້ແກ່ອາຟຣິກາໂດຍຜ່ານການຊ່ວຍເຫຼືອລ້າ, ເງິນກູ້ທີ່ບໍ່ມີດອກເບ້ຍ, ເງິນກູ້ດອກເບ້ຍຕ່ຳ ແລະອື່ນໆ.

ກົງກັນຂ້າມ, ອາເມຣິກາພັດມັກແຕ່ສ້າງຖານທັບຢູ່ອາຟຣິກາຫຼາຍຂຶ້ນກວ່າເກົ່າ ເພື່ອຮັບມືກັບອິດທິພົນຂອງຈີນຢູ່ອາຟຣິກາທີ່ນັບມື້ນັບເພີ່ມຂຶ້ນ ແລະ ສາມາດຄວບຄຸມອາຟຣິກາໄດ້ຢ່າງເຕັມທີ່. ສຳນັກງານໃຫຍ່ທີ່ເປັນກອງບັນຊາການອາຟຣິກາຂອງກອງທັບອາເມຣິກາຕັ້ງຢູ່ນະຄອນສະຕຸດກາດຂອງເຢຍລະມັນ, ຮັບຜິດຊອບໜ້າທີ່ການສູ້ຮົບຢູ່ຫຼາຍກວ່າ 50 ປະເທດໃນອາຟຣິກາ; ຄ້າຍເລມອນເນຍ ທີ່ເປັນຖານທັບອາເມຣິກາທີ່ໃຫຍ່ທີ່ສຸດປະຈຳອາຟຣິກາໄດ້ຂະຫຍາຍເນື້ອທີ່ອອກຕື່ມຫຼາຍກວ່າ 5 ເທົ່ານັບແຕ່ປີ 2007 ເປັນຕົ້ນມາ ໂດຍກິນເນື້ອທີ່ເຖິງ 33 ກວ່າເຮັກຕາ ແລະ ມີທະຫານປະຈຳການປະມານ 4.000 ຄົນ, ໄດ້ກາຍເປັນຈຸດຍຸດທະສາດຂອງກອງທັບອາເມຣິກາໃນການຄວບຄຸມພາກພື້ນຕາເວັນອອກກາງ ແລະ ອາຟຣິກາ. ໃນຫຼາຍປີມານີ້, ການໃຊ້ງົບປະມານດ້ານການທະຫານຂອງອາເມຣິກາຢູ່ອາຟຣິກາໄດ້ເພີ່ມຂຶ້ນຢ່າງຫຼວງຫຼາຍ. ອີງຕາມບົດລາຍງານຂອງກະຊວງປ້ອງກັນປະເທດອາເມຣິກາສະແດງໃຫ້ເຫັນວ່າ: ໃນປີ 2021, ກອງບັນຊາການອາຟຣິກາຂອງກອງທັບອາເມຣິກາໄດ້ປະຕິບັດການເຄື່ອນໄຫວທາງການທະຫານເກືອບ 600 ຄັ້ງຢູ່ອາຟຣິກາ, ເພີ່ມຂຶ້ນ 7% ເມື່ອທຽບໃສ່ປີ 2020. ພວກເຮົາສາມາດສັງເກດເຫັນໄດ້ວ່າ: ຄວາມຜາສຸກຂອງປະຊາຊົນອາຟຣິກາບໍ່ໄດ້ເປັນເລື່ອງທີ່ອາເມຣິກາຈະໄປສົນໃຈນຳ.

ການຮ່ວມມືຈະນຳມາເຊິ່ງຜົນປະໂຫຍດ, ການຕໍ່ຕ້ານກັນຈະນຳມາເຊິ່ງຜົນເສຍຫາຍ, ມີແຕ່ການຮ່ວມມືເທົ່ານັ້ນຈຶ່ງຈະສາມາດນຳມາເຊິ່ງຜົນປະໂຫຍດ ແລະ ໂອກາດການພັດທະນາ. ຈີນໄດ້ປະຕິບັດຕາມທັດສະນະການຮ່ວມມືຕົວຈິງຖານຄວາມຮັກແພງ ແລະ ຈິງໃຈຕໍ່ກັນ, ພັດທະນາການຮ່ວມມືກັບບັນດາປະເທດອາຟຣິກາຢ່າງຕັ້ງໜ້າ, ສ້າງຜົນປະໂຫຍດໃຫ້ແກ່ປະຊາຊົນບັນດາປະເທດອາຟຣິກາຢ່າງແທ້ຈິງ. ອາຟຣິກາເປັນແຜ່ນດິນທີ່ເຕັມໄປດ້ວຍຄວາມມີຊີວິດຊີວາ, ຄວນກາຍເປັນເວທີການຮ່ວມມືສາກົນ, ແຕ່ບໍ່ຄວນກາຍເປັນ “ສະໜາມສູ້ຮົບ” ທີ່ຝ່າຍໜຶ່ງຕໍ່ຕ້ານກັບອິດທິພົນຂອງອີກຝ່າຍໜຶ່ງ.