ວັນທີ 4 ກັນຍານີ້, ອົງການການຄ້າໂລກໄດ້ເຜີຍແຜ່ບົດລາຍງານໂດຍລະບຸວ່າ, ໃນໄຕມາດທີ 3 ປີ 2024 ນີ້, ການຄ້າສິນຄ້າປະເພດຈັບຕ້ອງໄດ້ທົ່ວໂລກໄດ້ຮັກສາທ່ວງທ່າຟື້ນຄືນໃໝ່ຢ່າງໝັ້ນທ່ຽງ

ອົງການການຄ້າໂລກໄດ້ເຜີຍແຜ່ “ບາໂຣມີເຕີການຄ້າສິນຄ້າປະເພດຈັບຕ້ອງໄດ້” ສະບັບຫຼ້າສຸດ ໂດຍສະແດງໃຫ້ເຫັນວ່າ, ຕົວຊີ້ວັດທ່ວງທ່າການຄ້າສິນຄ້າປະເພດຈັບຕ້ອງໄດ້ຂອງໂລກແມ່ນ 103, ສູງກວ່າ ຈຸດພື້ນຖານທີ່ເປັນ 100, ເພີ່ມຂຶ້ນໜ້ອຍໜຶ່ງເມື່ອທຽບໃສ່ 100.6 ຕົວເລກທີ່ປະກາດໃນເດືອນ ມີນາປີນີ້. ຕົວຊີ້ວັດດັ່ງກ່າວສະແດງໃຫ້ເຫັນວ່າ, ຍອດມູນຄ່າ ການຄ້າສິນຄ້າປະເພດຈັບຕ້ອງໄດ້ທົ່ວໂລກໃນໄຕມາດທີ 2 ແລະ ໄຕມາດທີ 3 ປີ 2024 ນີ້ຍັງຮັກສາການເຕີບໂຕ.

ເນື້ອໃນບົດລາຍງານລະບຸຕື່ມວ່າ, ໃນໄຕມາດທີ 1 ປີ 2024, ຍອດມູນຄ່າການຄ້າສິນຄ້າປະເພດຈັບຕ້ອງໄດ້ທົ່ວໂລກໄດ້ເພີ່ມຂຶ້ນ 1.4% ເມື່ອທຽບໃສ່ໄລຍະດຽວກັນຂອງປີ 2023, ແລະເພີ່ມຂຶ້ນ 1.0%ເມື່ອທຽບໃສ່ໄຕມາດທີ 4 ປີ 2023. ຕົວເລກຂໍ້ມູນ ໃນໄລຍະມໍ່ໆມານີ້ສະແດງໃຫ້ເຫັນວ່າ, ການເຕີບໂຕດ້ານການຄ້າຢູ່ເອີຣົບແມ່ນຕ່ຳກວ່າການຄາດຄະເນ, ຂະນະທີ່ການເຕີບໂຕດ້ານການຄ້າຂອງພາກພື້ນອື່ນແມ່ນສູງກວ່າການຄາດຄະເນ.