ວັນທີ 5 ກັນຍານີ້, ກອງປະຊຸມສຸດຍອດເວທີເປິກສາຫາລືການຮ່ວມມືຈີນ-ອາຟຣິກາປີ 2024 ໄດ້ຈັດຂຶ້ນຢູ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ເຂົ້າຮ່ວມ ແລະ ກ່າວຄຳປາໄສໃນພິທີໄຂກອງປະຊຸມ  ໂດຍໄດ້ສະເໜີໃຫ້ຍົກລະດັບການພົວພັນສອງຝ່າຍລະຫວ່າງຈີນກັບບັນດາປະເທດອາຟຣິກາທີ່ໄດ້ສ້າງຕັ້ງສາຍພົວພັນທາງການທູດກັບຈີນຂຶ້ນເປັນການພົວພັນຍຸດທະສາດ, ໄດ້ຍົກລະດັບການພົວພັນຈີນ-ອາຟຣິກາຂຶ້ນເປັນປະຊາຄົມຮ່ວມຊາຕາກຳຈີນ-ອາຟຣິກາໃນທຸກສະພາບການໃນຍຸກໃໝ່. ໃນຂະນະດຽວກັນ, ຈີນສະເໜີໃຫ້ສອງຝ່າຍຈີນແລະອາຟຣິກາຮ່ວມກັນສ້າງ “ຄວາມທັນສະໄໝໃຫຍ່ໃນ 6 ດ້ານ” ແລະ ໄດ້ປະກາດ 10 ແຜນປະຕິບັດງານລະຫວ່າງເພື່ອນມິດ ເຊິ່ງເປັນການກຳນົດທິດທາງຄວາມພະຍາຍາມ ແລະ ຊ່ອງທາງບັນລຸໄດ້ໃຫ້ແກ່ຈີນ ແລະ ອາຟຣິກາໃນການຮ່ວມກັນຊຸກຍູ້ການສ້າງຄວາມທັນສະໄໝ.

ແຜນຜັງໄດ້ວາງອອກແລ້ວ, ຈະຈັດຕັ້ງປະຕິບັດຄືແນວໃດ? ຈີນສະເໜີວ່າ: ໃນ 3 ປີຂ້າງໜ້າ, ຈີນຍິນດີປະຕິບັດ 10 ແຜນປະຕິບັດງານເພື່ອນມິດກັບອາຟຣິກາ ເຊິ່ງລວມທັງການຮຽນຮູ້ເຊິ່ງກັນແລະກັນດ້ານອະລິຍະທຳ, ການສ້າງຄວາມຈະເລີນຮຸ່ງເຮືອງດ້ານການຄ້າ, ການຮ່ວມມືດ້ານຕ່ອງໂສ້ອຸດສາຫະກຳ, ການເຊື່ອມຈອດກັນ, ການຮ່ວມມືດ້ານການພັດທະນາ, ສາທາລະນະສຸກ, ການສ້າງຄວາມຈະເລີນຮຸ່ງເຮືອງໃຫ້ຊົນນະບົດແລະສ້າງຜົນປະໂຫຍດໃຫ້ແກ່ຊາວກະສິກອນ, ການແລກປ່ຽນດ້ານວັດທະນະທຳ, ການພັດທະນາແບບສີຂຽວ ແລະ ການສ້າງຄວາມໝັ້ນຄົງຮ່ວມກັນເປັນຕົ້ນ. ມັນມີລັກສະນະພິເສດທີ່ພົ້ນເດັ່ນ ນັ້ນກໍຄື: ໄດ້ພິຈາລະນາເຖິງຄວາມຮຽກຮ້ອງຕ້ອງການໂດຍກົງທີ່ສຸດ ແລະ ຮີບດ່ວນທີ່ສຸດຂອງປະເທດອາຟຣິກາ, ທັງກຳໄດ້ທ່າອຽງໃຫຍ່ຂອງຍຸກສະໄໝ ເພື່ອເສີມຂະຫຍາຍທ່າແຮງຂອງການຮ່ວມມືທີ່ຊ່ວຍຊູຍູ້ໜູນກັນລະຫວ່າງຈີນ ແລະ ອາຟຣິກາ.

ຈີນ ແລະ ອາຟຣິກາຮ່ວມກັນຊຸກຍູ້ການສ້າງຄວາມທັນສະໄໝ, ຈະສ້າງຜົນປະໂຫຍດໃຫ້ແກ່ປະຊາຊົນສອງຝ່າຍນັບມື້ນັບຫຼາຍຂຶ້ນ ແລະ ນຳພາການພັດທະນາ ແລະ ການສ້າງຄວາມຈະເລີນຮຸ່ງເຮືອງຂອງພາກໃຕ້ໂລກ ພ້ອມທັງເພີ່ມພະລັງທີ່ສ້າງສັນຫຼາຍກວ່າເກົ່າໃຫ້ແກ່ສັນຕິພາບ ແລະ ການພັດທະນາຂອງໂລກ.