ວັນທີ 6 ກັນຍານີ້, ສະມັດຊາໃຫຍ່ອົງການສະຫະຊາຊາດ ຫຼື ສປຊ ໄດ້ຜ່ານມະຕິ ແລະ ປະກາດກຳນົດເອົາ ວັນທີ 6 ກໍລະກົດເປັນວັນພັດທະນາຊົນນະບົດໂລກ ເພື່ອສະແດງໃຫ້ເຫັນເຖິງຄວາມໝາຍຄວາມສຳຄັນຂອງການພັດທະນາ ແລະ ການຫັນປ່ຽນຂອງຊົນນະບົດທີ່ມີຕໍ່ການບັນລຸເປົ້າໝາຍການພັດທະນາແບບຍືນໂຍງຂອງອົງການ ສປຊ.

ມະຕິດັ່ງກ່າວໄດ້ເຊີນຊວນບັນດາປະເທດສະມາຊິກອົງການ ສປຊ, ອົງການຈັດຕັ້ງຕ່າງໆໃນລະບົບອົງການ ສປຊ, ອົງການຈັດຕັ້ງສາກົນ ແລະ ພາກພື້ນອື່ນໆ ພ້ອມດ້ວຍອົງການຈັດຕັ້ງທີ່ບໍ່ແມ່ນລັດຖະບານ, ບຸກຄົນ ແລະ ຝ່າຍທີ່ມີຜົນປະໂຫຍດກ່ຽວຂ້ອງ ເຊິ່ງລວມທັງອົງການຈັດຕັ້ງຊາວກະສິກອນ, ພາກສ່ວນເອກະຊົນ ແລະ ວົງການວິຊາການ ສະເຫຼີມສະຫຼອງວັນພັດທະນາຊົນນະບົດໂລກ ພ້ອມທັງ ຈັດກິດຈະກຳກ່ຽວກັບການພັດທະນາເຂດຊຸມຊົນ ແລະ ເຂດຊົນນະບົດແບບຍືນຍົງຢູ່ໃນປະເທດ ແລະ ເຂດແຄ້ວນຕ່າງໆ.