ຂ່າວສານປາແລັດສະຕິນລາຍງານໃນວັນທີ 7 ກັນຍານີ້ວ່າ: ມື້ດຽວກັນ, ກອງທັບອິດສະຣາແອນໄດ້ຖິ້ມລະເບີດໃສ່ຫຼາຍບ່ອນຢູ່ເຂດກາຊາ, ເຮັດໃຫ້ມີຜູ້ເສຍຊີວິດ 17 ຄົນ.

ຕາມຂ່າວລາຍງານວ່າ: ຢູ່ພາກເໜືອເຂດກາຊາ, ກອງທັບອິດສະຣາແອນໄດ້ຖິ້ມລະເບີດໃສ່ໂຮງຮຽນແຫ່ງໜຶ່ງຢູ່ເຂດຈາບານຢາ, ເຮັດໃຫ້ມີຜູ້ເສຍຊີວິດ 8 ຄົນ ແລະ ອີກ 15 ຄົນໄດ້ຮັບບາດເຈັບ. ຢູ່ພາກກາງເຂດກາຊາ, ກອງທັບອິດສະຣາແອນໄດ້ຖິ້ມລະເບີດໃສ່ສູນອົບພະຍົບສອງແຫ່ງ, ເຮັດໃຫ້ມີຜູ້ເສຍຊີວິດຕື່ມອີກ 9 ຄົນ.

ອີງຕາມຕົວເລກຂໍ້ມູນຈາກພາກສ່ວນສາທາລະນະສຸກເຂດກາຊາປາແລັດສະຕິນເຜີຍແຜ່ໃນວັນທີ 7 ກັນຍານີ້ໃຫ້ຮູ້ວ່າ: ນັບແຕ່ເກີດການປະທະກັນລະຫວ່າງປາແລັດສະຕິນ-ອິດສະຣາແອນຮອບໃໝ່ເມື່ອເດືອນຕຸລາປີກາຍນີ້ເປັນຕົ້ນມາ, ການເຄື່ອນໄຫວທາງການທະຫານຂອງອິດສະຣາແອນຢູ່ເຂດກາຊາໄດ້ເຮັດໃຫ້ຊາວປາແລັດສະຕິນເສຍຊີວິດແລ້ວເກືອບ 41.000 ຄົນ  ແລະ ຫຼາຍກວ່າ 94.000 ຄົນໄດ້ຮັບບາດເຈັບ.