ຫວ່າງມໍ່ໆມານີ້, ທ່ານນັດເຊີ ການານີ ໂຄສົກກະຊວງການຕ່າງປະເທດອີຣານໄດ້ຈັດກອງປະຊຸມຖະແຫຼງຂ່າວ ໂດຍກ່າວວ່າ: ການຂະຫຍາຍສາຍພົວພັນກັບປະເທດຕ່າງໆ ເຊັ່ນ: ຈີນ ແລະ ຣັດເຊຍເປັນຕົ້ນແມ່ນຫົວຂໍ້ບຸລິມະສິດສຳລັບວຽກງານການຕ່າງປະເທດຂອງລັດຖະບານອີຣານຊຸດໃໝ່.

     ທ່ານນັດເຊີ ການານີກ່າວຕື່ມວ່າ: ເຖິງວ່າໃນຫວ່າງມໍ່ໆມານີ້ ອີຣານໄດ້ສະເໜີວ່າຈະແກ້ໄຂຂໍ້ຂັດແຍ້ງກັບອາເມຣິກາ ແລະ ການພົວພັນທີ່ເຄັ່ງຕຶງກັບປະເທດເອີຣົບກໍຕາມ, ແຕ່ລັດຖະບານອີຣານຊຸດໃໝ່ຍັງຄົງຈະເອົາໃຈໃສ່ພິຈາລະນາ ແລະ ຈັດຕັ້ງປະຕິບັດວຽກງານບຸລິມະສິດດັ່ງກ່າວ, ຈະສືບຕໍ່ສ້າງເອກະສານການຮ່ວມມືສະບັບໃໝ່ກັບບັນດາປະເທດເພື່ອນມິດ.