ເມື່ອບໍ່ດົນມານີ້, ກຸ່ມບໍລິສັດຜະລິດລົດ Volkswagen ຂອງເຢຍລະມັນໄດ້ອອກຖະແຫຼງການວ່າ: ເພື່ອຫຼຸດລາຍຈ່າຍຕື່ມອີກ, ທາງບໍລິສັດກຳລັງພິຈາລະນາຈະປິດໂຮງງານຜະລິດລົດແຫ່ງໜຶ່ງ ແລະ ໂຮງງານຜະລິດເຄື່ອງອາໄຫຼ່ແຫ່ງໜຶ່ງຢູ່ພາຍໃນປະເທດເຢຍລະມັນ. ຖ້າວ່າແຜນການດັ່ງກ່າວໄດ້ຮັບການຈັດຕັ້ງປະຕິບັດຢ່າງແທ້ຈິງ ກໍຈະເປັນຄັ້ງທຳອິດທີ່ບໍລິສັດ Volkswagen ປິດໂຮງງານພາຍໃນປະເທດນັບແຕ່ສ້າງຕັ້ງຂຶ້ນຢູ່ເຢຍລະມັນເປັນຕົ້ນມາ. ສ່ວນເລື່ອງທີ່ກົງກັນຂ້າມນັ້ນກໍຄື ໃນເດືອນເມສາປີນີ້, Volkswagen ຫາກໍໄດ້ປະກາດຈະລົງທຶນ 2,5 ຕື້ເອີໂຣຢູ່ຈີນ ເພື່ອເປີດກວ້າງຖານການຜະລິດ ແລະ ສູນການປະດິດສ້າງໃໝ່ຢູ່ນະຄອນເຫີເຝີຍຂອງຈີນ.

ທີ່ຈິງແລ້ວ, ບໍ່ພຽງແຕ່ບໍລິສັດ Volkswagen ເທົ່ານັ້ນ, ຍັງມີວິສາຫະກິດຜະລິດລົດຂະໜາດໃຫຍ່ອີກຫຼາຍແຫ່ງຂອງເອີຣົບກຳລັງເລືອກທີ່ຈະ “ພັດທະນາກິດຈະການຢູ່ປະເທດຈີນ” ແລະ ເພີ່ມການລົງທຶນຢູ່ຈີນ ເພື່ອຮັບມືກັບສະພາບການໃໝ່. ໂຄງການຊຸບເປີໂຮງງານຜະລິດໝໍ້ໄຟຂອງບໍລິສັດ Tesla ທີ່ນະຄອນຊຽງໄຮ້ຂອງຈີນໄດ້ລົງມືກໍ່ສ້າງໃນປີ 2023 ທີ່ຜ່ານມາ ເຊິ່ງໄດ້ກາຍເປັນໂຮງງານຜະລິດໝໍ້ໄຟແຫ່ງທຳອິດຂອງບໍລິສັດ Tesla ທີ່ຕັ້ງຢູ່ນອກປະເທດອາເມຣິກາ; ກຸ່ມບໍລິສັດ BMW ໄດ້ເພີ່ມການລົງທຶນ 20 ຕື້ຢວນເຂົ້າໃນການຍົກລະດັບຂະໜາດ ແລະ ການປະດິດສ້າງໃໝ່ດ້ານເຕັກໂນໂລຊີຂອງໂຮງງານທີ່ນະຄອນເສີນຢາງຂອງຈີນ; ກຸ່ມບໍລິສັດ Mercedes-Benz ໄດ້ປະກາດໃນເດືອນກັນຍານີ້ວ່າ ຈະຮ່ວມກັບຄູ່ຮ່ວມມືຂອງຈີນລົງທຶນຫຼາຍກວ່າ 14 ຕື້ຢວນ ເພື່ອເພີ່ມການຜະລິດລົດຕູ້ຢູ່ຈີນຕື່ມອີກ……ໃນຂະນະທີ່ນັກການເມືອງຈຳນວນໜຶ່ງຂອງເອີຣົບ ແລະ ອາເມຣິກາສ້າງເລື່ອງຍຸແຍ່ “ການຕັດສາຍພົວພັນທາງການຄ້າກັບຈີນ”, ແຕ່ວິສາຫະກິດຕ່າງປະເທດຈຳນວນຫຼວງຫຼາຍພັດພາກັນເລື່ອກ “ໄປພັດທະນາກິດຈະການຢູ່ປະເທດຈີນ” ເຊິ່ງເປັນການທັບມ້າງຖ້ອຍຄຳທີ່ໄຮ້ເຫດຜົນດັ່ງກ່າວ.

ວິສາຫະກິດຜະລິດລົດຕ່າງປະເທດເລືອກ “ໄປພັດທະນາກິດຈະການຢູ່ປະເທດຈີນ” ແມ່ນຍ້ອນວ່າ ຈີນມີຕະຫຼາດການບໍລິໂພກຢ່າງເປັນຂະໜາດໃຫຍ່. ຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ປະລິມານການຜະລິດ ແລະ ຈຳໜ່າຍລົດຂອງຈີນໄດ້ຄອງອັນດັບໜຶ່ງໃນໂລກເປັນ 15 ປີລຽນຕິດ. ຄຽງຄູ່ກັບລາຍໄດ້ຂອງປະຊາຊົນຈີນເພີ່ມຂຶ້ນເລື້ອຍໆ, ຄວາມຕ້ອງການບໍລິໂພກຕໍ່ລົດຂອງຈີນກໍຈະເພີ່ມຂຶ້ນຢ່າງແຂງແຮງກວ່າເກົ່າ.  ອີງຕາມໜັງສືພິມ NZZ ຂອງສະວິດລາຍງານວ່າ: ວິສາຫະກິດຜະລິດລົດຂອງເຢຍລະມັນໄດ້ປະສົບຜົນສຳເລັດຢ່າງສູງຢູ່ຈີນທີ່ເປັນຕະຫຼາດລົດໃຫຍ່ທີ່ສຸດໃນທົ່ວໂລກ, ການຈຳໜ່າຍລົດຢູ່ຈີນແມ່ນກວມເອົາ 1/3 ຂອງປະລິມານການຈຳໜ່າຍລົດທັງໝົດຂອງເຂົາເຈົ້າ.

ວິສາຫະກິດຜະລິດລົດຕ່າງປະເທດເລືອກ “ໄປພັດທະນາກິດຈະການຢູ່ປະເທດຈີນ” ແມ່ນຍ້ອນວ່າ ນີ້ແມ່ນຊ່ອງທາງທີ່ດີທີ່ສຸດໃນການຍົກລະດັບຄວາມສາມາດດ້ານການແຂ່ງຂັນ ຂອງຕົນໃນທົ່ວໂລກ. ໃນຊຸມປີທີ່ຜ່ານມາ, ຈີນມີທ່ວງທ່າອັນແຂງແຮງໃນດ້ານການປະດິດສ້າງໃໝ່ ແລະ ການພັດທະນາແບບສີຂຽວ. ຈີນແມ່ນຢູ່ແຖວໜ້າຂອງໂລກໃນດ້ານໝໍ້ໄຟພະລັງງານໃໝ່, ເຕັກນິກການຂັບລົດແບບອັດຕະໂນມັດ, ເຕັກນິກການບັນເທິງໃນລົດ ແລະອື່ນໆ. ວິສາຫະກິດເອີຣົບເພີ່ມການລົງທຶນ ແລະ ການຜະລິດຢູ່ຈີນ, ເພີ່ມຄວາມສາມາດຂອງຕົນໃນດ້ານການຄົ້ນຄວ້າພັດທະນາຢູ່ຈີນ ແລະ ປັບຕົວເຂົ້າກັບສະພາບແວດລ້ອມອຸດສາຫະກຳຜະລິດລົດຂອງຈີນ ເປັນທາງເລືອກທີ່ຈຳເປັນເພື່ອຍົກສູງຄວາມສາມາດການແຂ່ງຂັນຂອງຕົນພາຍໃຕ້ກະແສການຫັນເປັນສີຂຽວຂອງທົ່ວໂລກ.

ການ “ໄປພັດທະນາກິດຈະການຢູ່ປະເທດຈີນ” ບໍ່ພຽງແຕ່ແມ່ນທາງເລືອກຂອງອຸດສາຫະກຳຜະລິດລົດເທົ່ານັ້ນ. ໃນຊຸມປີທີ່ຜ່ານມາ,  ວິສາຫະກິດຕ່າງປະເທດໃນຂົງເຂດເອເລັກໂຕຣນິກ, ກົນຈັກ, ຮ້ານຂາຍເຄື່ອງຍ່ອຍ, ການຜະລິດຢາ ແລະອື່ນໆ ຕ່າງກໍໄດ້ເລັ່ງການລົງທຶນຢູ່ຈີນ. ອີງຕາມບົດລາຍງານຈາກສະພາການຄ້າເຢຍລະມັນສະແດງໃຫ້ເຫັນວ່າ: ວິສາຫະກິດເຢຍລະມັນທີ່ໃຫ້ການສຳພາດມີຫຼາຍກວ່າເຄິ່ງໜຶ່ງໄດ້ວາງແຜນຈະເພີ່ມການລົງທຶນຢູ່ຈີນຕື່ມອີກພາຍໃນ 2 ປີ.

ຈາກນີ້ສາມາດເຫັນໄດ້ວ່າ: ການພັດທະນາຂອງຈີນໄດ້ນຳເອົາໂອກາດການພັດທະນາຢ່າງຫຼວງຫຼາຍມາໃຫ້ແກ່ໂລກ. ຈີນເປັນປະເທດທີ່ເປີດປະຕູສູ່ພາຍນອກ ແລະ ມີການປະດິດສ້າງໃໝ່ ທັງເປັນດິນແດນທີ່ເໝາະກັບການລົງທຶນ ແລະ ສ້າງທຸລະກິດ. ຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ໃນລະຫວ່າງເດືອນມັງກອນຫາເດືອນກໍລະກົດປີນີ້, ວິສາຫະກິດຕ່າງປະເທດທີ່ເພີ່ມຂຶ້ນໃໝ່ຢູ່ຈີນມີເຖິງ 31.654 ແຫ່ງ, ເພີ່ມຂຶ້ນ 11,4% ເມື່ອທຽບໃສ່ໄລຍະດຽວກັນຂອງປີກາຍ. ເຊື່ອໝັ້ນວ່າຈະມີວິສາຫະກິດຕ່າງປະເທດເຂົ້າມາລົງທຶນ ແລະ ສ້າງທຸລະກິດຢູ່ຈີນນັບມື້ນັບຫຼາຍກວ່າເກົ່າ ເພື່ອສືບຕໍ່ຂຽນເລື່ອງເລົ່າແຫ່ງການຮ່ວມມື ແລະ ການພັດທະນາ.