ວັນທີ 12 ກັນຍານີ້, ທ່ານວາລະດີເມຍ ປູຕິນ ປະທານາທິບໍດີຣັດເຊຍ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ວາງຢີ້ ກຳມະການກົມການເມືອງສູນກາງພັກຄອມມູນິດຈີນ ຫົວໜ້າຫ້ອງວ່າການວຽກງານການຕ່າງປະເທດສູນກາງພັກຄອມມູນິດຈີນຢູ່ນະຄອນແຊງປີເຕີສະບວກຂອງຣັດເຊຍ.

    ທ່ານວາລະດີເມຍ ປູຕິນ ໄດ້ຂອບໃຈຈີນທີ່ສະໜັບສະໜູນຣັດເຊຍຮັບໜ້າທີ່ເປັນປະເທດປະທານໝູນວຽນປະເທດບຣິກສ, ຍ້ອງຍໍຊົມເຊີຍວຽກງານການຕ່າງປະເທດຂອງຈີນທີ່ສຸມໃສ່ໄລຍະຍາວ ແລະ ອະນາຄົດຮ່ວມກັນຂອງມວນມະນຸດຢ່າງສະເໝີຕົ້ນສະເໝີປາຍ, ຍິນດີຮ່ວມກັບຈີນເພີ່ມທະວີການປະສານງານ, ສ້າງລະບຽບສາກົນບົນພື້ນຖານຄວາມຍຸຕິທຳ ແລະ ກົດໝາຍສາກົນ.

    ທ່ານ ວາງຢີ້ ກ່າວວ່າ: ກອງປະຊຸມສຸດຍອດກາຊານແມ່ນກອງປະຊຸມຜູ້ນຳຄັ້ງທຳອິດຫຼັງຈາກປະເທດບຣິກສຮັບສະມາຊິກໃໝ່, ຈີນຈະສືບຕໍ່ສຸມກຳລັງເຂົ້າໃນການສະໜັບສະໜູນຣັດເຊຍປະຕິບັດໜ້າທີ່ຂອງປະເທດປະທານ ແລະ ຊຸກຍູ້ໃຫ້ກອງປະຊຸມສຸດຍອດປະສົບຜົນສຳເລັດຢ່າງຈົບງາມ.

    ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບບັນຫາອູແກຣນ. ທ່ານ ວາລະດີເມຍ ປູຕິນຍ້ອງຍໍຊົມເຊີຍຄວາມຮັບຮູ້ທີ່ເປັນເອກະພາບກັນ 6 ຂໍ້ລະຫວ່າງຈີນ-ເບຣຊິນ, ພ້ອມທັງກ່າວຢ້ຳວ່າຣັດເຊຍມີທ່າທີເປີດປະຕູຕໍ່ການເຈລະຈາໂດຍສັນຕິຢ່າງສະເໝີຕົ້ນສະເໝີປາຍ. ທ່ານ ວາງຢີ້ ກ່າວວ່າ: ຈີນສຸມກຳລັງເຂົ້າໃນການຊຸກຍູ້ການແກ້ໄຂວິກິດການຜ່ານທາງການເມືອງ, ຍິນດີຮ່ວມກັບບັນດາຝ່າຍເຕົ້າໂຮມຫາງສຽງຢ່າງພາວະວິໄສ, ມີສະຕິ ແລະ ດຸນດ່ຽງຈາກປະຊາຄົມໂລກ.