ລະຫວ່າງຕອນບ່າຍວັນທີ 10 ຫາ ຕອນເຊົ້າວັນທີ 11 ກັນຍາ 2024, ທ່ານສີຈິ້ນຜິງ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ນະຄອນປາວຈີ່ ແຂວງສ້ານຊີ່ ແລະ ນະຄອນທຽນສຸຍແຂວງກ່ານຊູ້ ທາງພາກຕາເວັນຕົກສຽງເໜືອຂອງຈີນຕາມລຳດັບ, ໃນການເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້, ເພິ່ນໄດ້ເດີນທາງໄປຢ້ຽມຢາມສະຖານທີ່ສັນຍາລັກດ້ານວັດທະນະທຳສາມແຫ່ງເປັນການສະເພາະ.

ຫໍພິພິທະພັນເຄື່ອງທອງສຳລິດປາວຈີ່ 

ຫໍພິພິທະພັນເຄື່ອງທອງສຳລິດປາວຈີ່ ເປັນບ່ອນທຳອິດທີ່ທ່ານສີຈິິ້ນຜິງ ຢ້ຽມຢາມ. ຫໍພິພິທະພັນແຫ່ງນີ້ຕົ້ນຕໍແມ່ນທ້ອນໂຮມເກັບຮັກສາ ແລະ ວາງສະແດງເຄື່ອງທອງສຳລິດໃນສະໄໝລາຊະວົງຊ່າງ（ກ່ອນຄສ1600—ກ່ອນຄສ1046） ແລະ ລາຊະວົງໂຈ່ວ ແລະ ລາຊະວົງຈິນ  (ກ່ອນຄສ 1046——ກ່ອນຄສ 207) ເຊິ່ງເປັນຫໍພິພິທະພັນດ້ານວັດທະນະທຳທອງສຳລິດທີ່ຕັ້ງຊື່ເປັນເຄື່ອງທອງສຳລິດແຫ່ງທຳອິດຂອງຈີນ. ທ່ານສີຈິ້ນຜິງໄດ້ຢ້ຽມຊົມການວາງສະແດງຈຳນວນ 4 ພາກຢູ່ໃນຫໍພິພິທະພັນເຊັ່ນ: “ແດນແຫ່ງເຄື່ອງທອງສຳລິດ” ແລະ “ຈາຍຈື່ຈົ່ງໂກວ” ເປັນຕົ້ນ, ໃນນີ້ ຄຳວ່າ “ຈາຍຈື່ຈົ່ງໂກວ” ມີຄວາມໝາຍວ່າ: “ຂ້າພະເຈົ້າຕ້ອງໃຊ້ຊີວິດຢູ່ໃຈກາງຂອງໂລກ”, ເຊິ່ງເປັນການບັນທຶກທີ່ເປັນລາຍລັກອັກສອນຂອງຄໍາວ່າ "ປະເທດຈີນ" ເປັນຄັ້ງທຳອິດໃນປະຫວັດສາດ.

ໃນເວລາຢ້ຽມຊົມການວາງສະແດງໃນພາກທີ່ມີຫົວຂໍ້ວ່າ: “ຈາຍຈື່ຈົ່ງໂກວ”, ທ່ານສີຈິ້ນຜິງໄດ້ຢຸດແລະສັງເກດເບິ່ງຢ່າງລະອຽດຢູ່ຕໍ່ໜ້າ ເຄື່ອງທອງສຳລິດທີ່ມີຊື່ວ່າ: “ເຫີຈວຸ່ນ” ເຊິ່ງເປັນສິ່ງປະເສີດທີ່ສຸດຂອງຫໍພິພິທະພັນແຫ່ງນີ້. "ເຫີຈວຸ່ນ" ເປັນພາຊະນະບັນຈຸເຫຼົ້າໃນສະໄໝລາຊະວົງໂຈ່ວຕາເວັນຕົກຂອງຈີນກ່ອນໜ້ານີ້ 3.000 ກວ່າປີ, ໃນນາມເປັນວັດຖຸບູຮານທີ່ເປັນຫຼັກຖານຕົວຈິງທີ່ໄດ້ຈາລຶກຕົວໜັງສືຄຳວ່າ “ປະເທດຈີນ” ເປັນຄັ້ງທຳອິດໃນປະຫວັດສາດນັ້ນ, ໄດ້ປາກົດຕົວຢູ່ໃນການເຄື່ອນໄຫວຢ້ຽມຢາມທ້ອງຖິ່ນ ແລະ ການເຄື່ອນໄຫວດ້ານການຕ່າງປະເທດຂອງທ່ານສີຈິ້ນຜິງມາເປັນເວລາຫຼາຍເທື່ອ.

ເຄື່ອງທອງສຳລິດ “ເຫີຈວຸ່ນ” 

ຕົວຢ່າງ: ປີ2019, ໃນເວລາຢ້ຽມຊົມຫໍພິພິທະພັນແຫ່ງຊາດຈີນ, ເຄື່ອງທອງສຳລິດ “ເຫີຈວຸ່ນ” ທີ່ມີຮູບຊົງໜາ ມີຄວາມໜັກ ແລະ ມີຄວາມປານີດສວຍງາມນັ້ນ ໄດ້ດຶງດູດຄວາມສົນໃຈຂອງທ່ານສີຈິ້ນຜິງ, ເພິ່ນໄດ້ຮັບຟັງການບັນຍາຍຂອງພະນັກງານ ພ້ອມທັງຊື່ນຊົມດ້ວຍຄວາມຕັ້ງໃຈ. ປີ2020, ໃນເວລາລົງເຄື່ອນໄຫວຢ້ຽມແລະ ເຮັດວຽກຢູ່ແຂວງສ້ານຊີ່, ເພິ່ນໄດ້ຍົກໃຫ້ເຫັນວ່າ: ຄຳວ່າ “ປະເທດຈີນ” ແມ່ນປາກົດອອກເປັນຄັ້ງທຳອິດຢູ່ເທິງເຄື່ອງທອງສຳລິດ “ເຫີຈວຸ່ນ” ທີ່ໄດ້ຂຸດຄົ້ນເຫັນຢູ່ແຂວງສ້ານຊີ່ ເພື່ອຫວນຄືນປະຫວັດສາດ,ຕີລາຄາປາກົດການ ແລະ ບັນຫາໃນປັດຈຸບັນ. ປີ2022,ຫໍພິພິທະພັນສິ່ງພິມແລະ ວັດທະນະທຳແຫ່ງຊາດຈີນ ເຊິ່ງເປັນໂຄງການທີ່ທ່ານສີຈິ້ນຜິງອະນຸມັດການກໍ່ສ້າງດ້ວຍຕົນເອງນັ້ນໄດ້ເປີດບໍລິການຢ່າງເປັນທາງການ, ຢູ່ໃນຫໍພິພິທະພັນແຫ່ງນີ້ແມ່ນໄດ້ວາງສະແດງເຄື່ອງທອງສຳລິດ “ເຫີຈວຸ່ນ”.

ໃນການເຄື່ອນໄຫວດ້ານການຕ່າງປະເທດ, ທ່ານສີຈິ້ນຜິງ ປະທານປະເທດຈີນກໍໄດ້ເວົ້າເຖິງເຄື່ອງທອງສຳລິດ “ເຫີຈວຸ່ນ”ຢູ່ເລື້ອຍໆ ເພື່ອສະແດງໃຫ້ຊາວໂລກໄດ້ເຫັນເຖິງຄວາມເປັນມາຂອງປະເທດຈີນ. ກ່ອນພິທີໄຂກອງປະຊຸມສົນທະນາອະລິຍະທຳອາຊີ2019, ທ່ານສີຈິ້ນຜິງພ້ອມດ້ວຍບັນດາຜູ້ນຳຕ່າງປະເທດທີ່ເຂົ້າຮ່ວມກອງປະຊຸມໄດ້ຊົມການວາງສະແດງວັດຖຸບູຮານ ແລະ ໄດ້ຮັບຟັງ ການບັນຍາຍກ່ຽວກັບ “ເຫີຈວຸ່ນ” ຢ່າງລະອຽດ. ປີ2023, ໃນກອງປະຊຸມສຸດຍອດຈີນ-ອາຊີກາງ, ເຄື່ອງທີ່ລະນຶກ  “ເຫີຈວຸ່ນ” ໄດ້ຖືກຄັດເລືອກເປັນໜຶ່ງໃນບັນດາຂອງຂວັນສຳລັບມອບໃຫ້ປະມຸກລັດປະເທດອາຊີກາງ.

ຫໍໄຫວ້ຟູຊີ

ຫໍໄຫວ້ຟູຊີ ເປັນສະຖານທີ່ສັນຍາລັກດ້ານວັດທະນະທຳບ່ອນທີສອງທີ່ທ່ານສີຈິ້ນຜິງໄປຢ້ຽມຢາມ. ຫໍໄຫວ້ດັ່ງກ່າວຕັ້ງຢູ່ນະຄອນທຽນສຸ້ຍ ແຂວງກ່ານຊູ້ ເຊິ່ງເປັນບ້ານເກີດຂອງຟູຊີ, ຫໍໄຫວ້ແຫ່ງນີ້ເປັນຫໍໄຫວ້ບູຊາຟູຊີທີ່ມີປະຫວັດເກົ່າແກ່ທີ່ສຸດ ແລະໄດ້ຮັບການອະນຸລັກຮັກສາໄວ້ໃຫ້ຄົບຖ້ວນສົມບູນທີ່ສຸດຈົນມາເຖິງປັດຈຸບັນຂອງຈີນ ແລະມີສົມຍານາມວ່າ “ຫໍໄຫວ້ທີໜຶ່ງຂອງຈີນ”.

ຕອນບ່າຍວັນທີ 10 ກັນຍາ 2024 ທ່ານສີຈິ້ນຜິງຢ້ຽມຢາມຫໍໄຫວ້ຟູຊີ

ຟູຊີ ເປັນບັນພະບຸລຸດດ້ານວັດທະນະທຳຈີນ, ເພິ່ນໄດ້ນຳໃຊ້ການປະດິດສ້າງຕ່າງໆນຳພາຄົນຈີນບູຮານອຳລາຄວາມດຶກດຳບັນ ແລ້ວກ້າວໄປສູ່ຄວາມສິວິໄລ. ວັດທະນະທຳຟູຊີ ເປັນວັດທະນະທຳດັ້ງເດີມຂອງປະຊາຊາດຈີນ, ປັດໄຈພື້ນຖານຈຳນວນໜຶ່ງຂອງວັດທະນະທຳຈີນແມ່ນມີປະຫວັດຄວາມເປັນມາຈາກສະໄໝຟູຊີ.

ຖ້ຳຫີນພູມ້າຍຈີ່

ຢູ່ນະຄອນທຽນສຸ້ຍ, ທ່ານສີຈິ້ນຜິງຍັງໄດ້ເດີນທາງໄປຢ້ຽມຢາມສະຖານທີ່ສັນຍາລັກດ້ານວັດທະນະທຳແຫ່ງທີສາມນັ້ນຄື ຖ້ຳຫີນພູມ້າຍຈີ່ ເຊິ່ງເປັນໜຶ່ງໃນຖ້ຳຫີນທີ່ສຳຄັນ4ແຫ່ງຂອງຈີນ. ນັບຕັ້ງແຕ່ສະໄໝ 16 ແຄວ້ນເມື່ອ1.600ປີກ່ອນເປັນຕົ້ນມາ, ນາຍຊ່າງທີ່ມີຄວາມຊຳນິຊຳນານທັງຫຼາຍແມ່ນເລີ່ມຂຸດຖ້ຳຢູ່ເທິງພູມ້າຍຈີ່ເພື່ອສ້າງຮູບປັ້ນ, ຕໍ່ມາ, ຜ່ານຈາກການສ້າງສາ ແລະ ສ້ອມແປງຢ່າງຕໍ່ເນື່ອງດົນເຖິງ 10 ກວ່າລາຊະວົງ ຈຶ່ງໄດ້ສ້າງໃຫ້ເປັນຖ້ຳຫີນພູມ້າຍຈີ່ ເຊິ່ງເປັນໄຂ່ມຸກອັນໃສເຫຼື້ອມສວຍງາມຢູ່ຕາມເສັ້ນທາງສາຍໄໝບູຮານ. ປີ2014, ຖ້ຳຫີນພູມ້າຍຈີ່ໄດ້ຖືກຈັດເຂົ້າໃນບັນຊີລາຍຊື່ມໍລະດົກໂລກ.

ຕອນເຊົ້າວັນທີ 11 ກັນຍາ 2024, ທ່ານສີຈິ້ນຜິງ ໄດ້ຢ້ຽມຢາມຖ້ຳຫີນພູມ້າຍຈີ່ 

ຢູ່ໃນວັດຖ້ຳຫີນທັງໝົດຂອງຈີນ, ຖ້ຳຫີນພູມ້າຍຈີ່ແມ່ນໄດ້ຮັກສາຮູບປັ້ນດິນໜຽວທີ່ມີປະຫວັດດົນນານທີ່ສຸດ ແລະ ໄດ້ຮັບການປົກປັກຮັກສາໄວ້ໃຫ້ຄົບຖ້ວນສົມບູນທີ່ສຸດ ເຊິ່ງໄດ້ສ່ອງແສງໃຫ້ເຫັນເຖິງສີມືການແຕ້ມ ແລະ ປັ້ນຮູບທີ່ຍອດຍິ່ງຂອງນາຍຊ່າງບູຮານຈີນ. ຖ້ຳຫີນແຫ່ງນີ້ຍັງເປັນຈຸດບາດລ້ຽວສຳຄັນທີ່ວັດຖ້ຳຫີນຂອງຈີນກ້າວໄປສູ່ການຫັນເປັນແບບພື້ນເມືອງ, ຫັນເປັນແບບຊົນຊາດ ແລະ ຫັນເປັນແບບຈີນ.

ຈາກວັດທະນະທຳທອງສຳລິດທີ່ບົ່ງບອກເຖິງປະຫວັດຄວາມເປັນມາຂອງປະເທດຈີນ, ມາຮອດ ບັນພະບຸລຸດດ້ານວັດທະນະທຳຈີນ, ຕະຫຼອດຮອດສິລະປະຖ້ຳຫີນທີ່ສືບທອດກັນມາເປັນເວລາພັນປີ, ການເຄື່ອນໄຫວເກັບກຳຂໍ້ມູນດ້ານວັດທະນະທຳຢູ່ແຂວງສ້ານຊີ່ ແລະແຂວງກ່ານຊູ້ຂອງທ່ານສີຈິ້ນຜິງຄັ້ງນີ້ໄດ້ພິສູດໃຫ້ເຫັນເຖິງອະລິຍະທຳຈີນທີ່ມີປະຫວັດຄວມເປັນມາອັນດົນນານ ກວມເຖິງວັດທະນະທຳທີ່ມີຄວາມຫຼາກຫຼາຍສີສັນ.

ທ່ານສີຈິ້ນຜິງເຄີຍກ່າວວ່າ: “ຢາກໃຫ້ຕົ້ນໄມ້ເຕີບໃຫຍ່ແມ່ນຕ້ອງຮັກສາຮາກຂອງມັນໃຫ້ໝັ້ນຄົງ, ຢາກໃຫ້ນ້ຳໄຫຼໄປໄກຕ້ອງໄດ້ລວງບໍ່ຂອງມັນໃຫ້ໂລ່ງ.” ທ່ານສີຈິ້ນຜິງເວລາໃດກໍໃຫ້ຄວາມສຳຄັນເປັນຢ່າງສູງຕໍ່ວຽກງານຄົ້ນຫາແຫຼ່ງກຳເນີດວັດທະນະທຳຈີນ ແລະ ວຽກງານບູຮານຄະດີ. ເພິ່ນເນັ້ນໜັກວ່າ: ຊົນຊາດໜຶ່ງ ແລະປະເທດໜຶ່ງ ຕ້ອງຮູ້ຈັກວ່າຕົນເອງແມ່ນໃຜ? ມາຈາກໃສ? ຈະໄປໃສ? ເມື່ອຄິດໃຫ້ເຂົ້າໃຈແລ້ວ ແລະ ຄິດໃຫ້ຖືກຕ້ອງແລ້ວ ກໍຕ້ອງມຸ່ງໜ້າໄປສູ່ເປົ້າໝາຍຢ່າງເດັດດ່ຽວໜຽວແໜ້ນ.

ນັບແຕ່ປີ2012ເປັນຕົ້ນມາ, ທ່ານສີຈິ້ນຜິງໄດ້ໄປຢ້ຽມຢາມມໍລະດົກວັດທະນະທຳປະຫວັດສາດຈຳນວນຮ້ອຍກວ່າແຫ່ງຕາມລຳດັບ, ໂດຍໄດ້ສຸມສາຍຕາໃສ່ບ່ອນເລິກຂອງປະຫວັດສາດອະລິຍະທຳຈີນ.

ເດືອນຕຸລາປີ2022, ທ່ານສີຈິ້ນຜິງໄດ້ເດີນທາງໄປຢ້ຽມຢາມຮ່ອງຮອຍບູຮານສະຖານຢິ່ນຊວີ່ ທີ່ມີຊື່ສຽງໂດ່ງດັງໄປທົ່ວໂລກຍ້ອນຕົວໜັງສືຈີນເກົ່າແກ່ທີ່ຄວັດໃສ່ອອງເຕົ່າແລະກະດູກສັດ ເຊິ່ງເປັນບ່ອນທີ່ເພິ່ນປາດຖະໜາຢາກໄປມາແຕ່ດົນແລ້ວ. ເພິ່ນຊີ້ໃຫ້ເຫັນວ່າ: ອອງເຕົ່າແລະກະດູກສັດທີ່ຖືກຂຸດຄົ້ນອອກມາຈາກຢິ່ນຊວີ່ໄດ້ຮັກສາຕົວໜັງສືຈີນເມື່ອ3.000ປີກ່ອນ, ເຮັດໃຫ້ປະຫວັດສາດຈີນທີ່ມີຕົວໜັງສືບັນທຶກສາມາດສືບຄືນຫຼັງໄດ້ອີກປະມານ 1000 ປີ.

ເດືອນພຶດສະພາປີ2023, ຢູ່ນະຄອນຢູ້ນເສີງ ແຂວງຊ່ານຊີ່ ເຊິ່ງເປັນໜຶ່ງໃນບັນດາແຫຼ່ງກຳເນີດອະລິຍະທຳຈີນ. ທ່ານສີຈິ້ນຜິງໄດ້ເນັ້ນໜັກໃຫ້ລົງເລິກຈັດຕັ້ງປະຕິບັດໂຄງການຄົ້ນຫາແຫຼ່ງກຳເນີດອະລິຍະທຳຈີນ ເພື່ອນຳພາການສຶກສາຄົ້ນຄວ້າປະຫວັດສາດອະລິຍະທຳຈີນກ້າວໄປສູ່ລວງເລິກ.

ເດືອນກໍລະກົດປີ2023, ຢູ່ຫໍພິພິທະພັນຊ່ານຊິ່ງຕຸ່ຍທີ່ສ້າງຂຶ້ນໃໝ່, ທ່ານສີຈິ້ນຜິງໄດ້ຊີ້ໃຫ້ເຫັນວ່າ:ຜົນງານສຳຫຼວດບູຮານຄະດີຢູ່ຮ່ອງຮອຍບູຮານສະຖານຊ່ານຊິ່ງຕຸ່ຍແມ່ນມີຊື່ສຽງໂດ່ງດັງໄປທົ່ວໂລກ ເຊິ່ງໄດ້ສະແດງໃຫ້ເຫັນເຖິງຜົນງານດ້ານອະລິຍະທຳເມື່ອ4000ກວ່າປີກ່ອນ, ໄດ້ອຳນວຍຫຼັກຖານຕົວຈິງດ້ານບູຮານຄະດີທີ່ເຂັ້ມແຂງກວ່າເກົ່າເພື່ອພິສູດໃຫ້ເຫັນເຖິງອະລິຍະທຳຈີນທີ່ກວມເອົາຫຼາຍເຄົ້າເຊື່ອມໂຍງເຂົ້າກັນ, ອະລິຍະທຳສູບູຮານກັບອະລິຍະທຳພາກກາງຈີນສົ່ງຜົນສະທ້ອນຕໍ່ກັນ ແລະອື່ນໆ.

ການຄົ້ນຫາແຫຼ່ງກຳເນີດອະລິຍະທຳ ໄດ້ສະໜອງແຫຼ່ງຂໍ້ມູນອັນສຳຄັນໃຫ້ແກ່ປະຊາຊົນຈີນໃນການຮັບຮູ້ປະເທດຈີນຈາກວັດທະນະທຳປະຫວັດສາດອັນດົນນານ ແລະຮັບຮູ້ອະລິຍະທຳຈີນທີ່ມີເນື້ອໃນອັນເລິກເຊິ່ງກວ້າງຂວາງ, ພ້ອມທັງໄດ້ສະໜອງສິ່ງຄ້ຳຊູອັນແຂງແຮງໃຫ້ແກ່ປະຊາຊົນຈີນເພີ່ມຄວາມຕື່ນຕົວດ້ານປະຫວັດສາດ ແລະ ເພີ່ມຄວາມໝັ້ນໃຈຕົນເອງດ້ານວັດທະນະທຳຢ່າງເດັດດ່ຽວ.

ຜ່ານຈາກຄວາມພະຍາຍາມຢ່າງຕໍ່ເນື່ອງຂອງນັກວິຊາການມາຫຼາຍເຊັ່ນຄົນ, ຜົນງານຄົ້ນຄວ້າຂອງໂຄງການສຳຄັນຕ່າງໆເຊັ່ນ: ໂຄງການຄົ້ນຫາແຫຼ່ງກຳເນີດອະລິຍະທຳຈີນ ໄດ້ພິສູດໃຫ້ເຫັນເຖິງປະຫວັດສາດມະນຸດລ້ານປີ, ປະຫວັດສາດວັດທະນະທຳໝື່ນປີ ແລະ ປະຫວັດສາດອະລິຍະທຳ5.000ກວ່າປີຂອງຈີນ.

ວັດຖຸບູຮານ, ຮ່ອງຮອຍບູຮານສະຖານດ້ານວັດທະນະທຳ ແລະ ສິລະປະວັດທະນະທຳຕ່າງໆໄດ້ສ່ອງແສງໃຫ້ເຫັນເຖິງປະຫວັດສາດວັດທະນະທຳຂອງປະຊາຊາດຈີນ ແລະ ເຊື່ອງຊ້ອນກຳລັງວັດທະນະທຳທີ່ບົ່ງບອກປະຫວັດຄວາມເປັນມາຂອງປະເທດຈີນ. ທ່ານສີຈິ້ນຜິງເອົາໃຈໃສ່ຕໍ່ແຫຼ່ງກຳເນີດອະລິຍະທຳຈີນ ເຊິ່ງໄດ້ສ່ອງແສງໃຫ້ເຫັນເຖິງການຄົ້ນຄິດຢ່າງເລິກເຊິ່ງ ແລະ ຄວາມໝັ້ນໃຈຕົນເອງດ້ານວັດທະນະທຳຂອງເພິ່ນທີ່ມີຕໍ່ການຊຸກຍູ້ການພັດທະນາວັດທະນະທຳໃຫ້ຈະເລີນຮຸ່ງເຮືອງ ແລະ ສ້າງສາປະເທດເຂັ້ມແຂງດ້ານວັດທະນະທຳ.

ໃນການຢ້ຽມຢາມຫໍພິພິທະພັນເຄື່ອງທອງສຳລິດປາວຈີ່ຄັ້ງນີ້, ທ່ານສີຈິ້ນຜິງໄດ້ມີຄຳຊີ້ນຳເປັນພິເສດວ່າ: “ອະລິຍະທຳຈີນທີ່ມີປະຫວັດຄວາມເປັນມາ5.000ກວ່າປີ ຍັງຕ້ອງຂຸດຄົ້ນຕື່ມອີກ, ລົງເລິກສຶກສາຄົ້ນຄວ້າ, ອະທິບາຍເນື້ອໃນ ແລະ ຈິດໃຈຂອງມັນ, ໂຄສະນາເຜີຍແຜ່ສະຕິປັນຍາອັນຍອດຍິ່ງທີ່ເຊື່ອມສານຢູ່ໃນຫັ້ນ, ເພື່ອເຮັດໃຫ້ຄົນທັງຫຼາຍເຄົາລົບນັບຖື ແລະ ມັກຮັກຕື່ມອີກ, ເພີ່ມຄວາມຮູ້ສຶກເອກອ້າງທະນົງໃຈຕໍ່ອະລິຍະທຳຈີນ, ເສີມຂະຫຍາຍນ້ຳໃຈຮັກຊາດ, ສືບທອດວັດທະນະທຳຈີນທີ່ມີມູນເຊື້ອອັນດີງາມຈາກຮຸ່ນສູ່ຮຸ່ນຕະຫຼອດໄປ.”

ບໍ່ຫຼົງລືມປະຫວັດຄວາມເປັນມາ, ຈຶ່ງຈະສາມາດສ້າງອະນາຄົດໄດ້. ນີ້ຄື ພື້ນຖານແຫ່ງຄວາມໝັ້ນໃຈ ແລະ ເປັນແຫຼ່ງກຳເນີດພະລັງແຮງຂອງປະຊາຊົນ.