ພາຍຸໄຕ້ຝຸ່ນຢະກິໄດ້ພັດຜ່ານລາວ, ມຽນມາ, ຫວຽດນາມ ແລະ ໄທໃນທ້າຍສັບປະດາແລ້ວນີ້, ໄດ້ເຮັດໃຫ້ຝົນຕົກໜັກ, ພາໃຫ້ເກີດໄພນໍ້າຖ້ວມ ແລະ ດິນພູເຈື່ອນ, ເຊິ່ງໄດ້ເຮັດໃຫ້ມີຜູ້ເສຍຊີວິດ ແລະ ບາດເຈັບຈຳນວນຫຼາຍຄົນ ແລະ ມີຜົນເສຍຫາຍທາງເສດຖະກິດຈຳນວນຫຼວງຫຼາຍ.

    ນັບມາຮອດຕອນເຊົ້າວັນທີ 15 ກັນຍານີ້, ພາຍຸໄຕ້ຝຸ່ນຢະກິໄດ້ເຮັດໃຫ້ຫວຽດນາມມີຜູ້ເສຍຊີວິດ 281 ຄົນ, 67 ຄົນຫາຍສາບສູນ. ຜູ້ເສຍຊີວິດຢູ່ມຽນມາເພີ່ມຂຶ້ນຮອດ 74 ຄົນ ແລະ ຍັງມີ 89 ຄົນຫາຍສາບສູນ, ຈຳນວນປະຊາຊົນປະສົບໄພເກືອບ 240.000 ຄົນ. ປັດຈຸບັນ,  ເຂດປະສົບໄພນ້ຳຖ້ວມສ່ວນໃຫຍ່ຢູ່ມຽນມາຍັງມີສະພາບໜັກໜ່ວງ,  ລະບົບການສື່ສານ ແລະ ການຄົມມະນາຄົມຖືກຕັດຂາດ.