ພິທີມອບຮັບໂຄງການສິ່ງກໍ່ສ້າງສັງລວມທ່າຫາປາການາທີ່ຈີນຊ່ວຍສ້າງນັ້ນ1ໄດ້ຈັດຂຶ້ນຢູ່ນະຄອນຫຼວງອັກຄຣາຂອງການາໃນຫວ່າງມໍ່ໆມານີ້, ໂຄງການນີ້ຈະປັບປຸງສິ່ງແວດລ້ອມການເຮັດວຽກ ແລະດຳລົງຊີວິດຂອງຊາວຫາປາທ້ອງຖິ່ນໃຫ້ດີຂຶ້ນຢ່າງຫຼວງຫຼາຍ, ຊຸກຍູ້ການພັດທະນາເສດຖະກິດແລະສັງຄົມການາ.

   ທ່ານນານາ ອາຄູໂຟ ອັດໂດ ປະທານາທິບໍດີການາໄດ້ສະແດງຄວາມຂອບໃຈຕໍ່ລັດຖະບານຈີນທີ່ຊ່ວຍສ້າງທ່າຫາປາແລະໃຫ້ຄວາມສະໜັບສະໜູນຕໍ່ການພັດທະນາເສດຖະກິດ-ສັງຄົມການາໃນຫຼາຍສິບປີຜ່ານມາ. ທ່ານກ່າວຕື່ມວ່າ: ໂຄງການນີ້ຈະຊຸກຍູ້ການປະກອບອາຊີບ, ປັບປຸງຊີວິດການເປັນຢູ່ຂອງຊາວຫາປາໃຫ້ດີຂຶ້ນ, ທັງເພີ່ມພະລັງຊີວິດໃຫ້ເສດຖະກິດຂອງການາ. ການສ້າງທ່າຫາປາດັ່ງກ່າວແມ່ນມີຄວາມໝາຍສຳຄັນຕໍ່ການາ, ຄວາມຝັນໃນຫຼາຍສິບປີຂອງປະຊາຊົນການາໄດ້ບັນລຸຜົນເປັນຈິງແລ້ວ.

   ທ່ານທົງເຕີຟ່າ ເອກອັກຄະລັດຖະທູດຈີນປະຈຳການາກ່າວວ່າ: ຈີນໄດ້ຖືເອົາການພັດທະນາຄວາມສາມັກຄີແລະການຮ່ວມມືກັບປະເທດອາຟຣີກາເປັນພື້ນຖານສຳຄັນໃນນະໂຍບາຍຕໍ່ຕ່າງປະເທດຂອງຕົນຢ່າງສະເໝີຕົ້ນສະເໝີປາຍ. ໂຄງການດັ່ງກ່າວແມ່ນຫຼັກໝາຍທາງອີກແຫ່ງໜຶ່ງຂອງມິດຕະພາບຈີນ-ການາ, ສະແດງໃຫ້ເຫັນເຖິງສອງປະເທດເກາະແຂນກັນຊຸກຍູ້ການສ້າງຄວາມທັນສະໄໝ, ສ່ອງແສງໃຫ້ເຫັນເຖິງຄວາມໝັ້ນໃຈອັນເດັດດ່ຽວຂອງປະເທດພາກໃຕ້ທົ່ວໂລກສາມັກຄີກັນແລະຮ່ວມມືກັນຢ່າງແຂງແຮງ.