“ບົດລາຍງານສະພາບການກ່ຽວກັບອາເມຣິກາປະຕິບັດພັນທະກະຕິກາອົງການການຄ້າໂລກ” ທີ່ກະຊວງການຄ້າຈີນເປີດເຜີຍໃນຫວ່າງມໍ່ໆມານີ້ຊີ້ອອກວ່າ: ໜຶ່ງປີຜ່ານມາ, ອາເມຣິກາບໍ່ເອົາຫົວຊາຕໍ່ຄວາມຄອງຄອຍຂອງສະມາຊິກ, ໄດ້ປະຕິບັດມາດຕະການລົງໂທດແຕ່ຝ່າຍດຽວເລື້ອຍໆ, ໄດ້ປະຕິບັດມາດຕະການລັກສະນະຈຳແນກເລື້ອຍໆ, ຍົກກຳແພງພາສີໃຫ້ສູງຂຶ້ນຢ່າງຕໍ່ເນື່ອງ ເຊິ່ງໄດ້ເປັນສິ່ງທ້າທາຍອັນຂ້ຽວຂາດຕໍ່ຂອບການຄ້າຫຼາຍຝ່າຍ. ອີງຕາມບົດລາຍງານສະບັບນີ້, ໂທລະພາບສາກົນຈີນ ຫຼື CGTN ຂອງວິທະຍຸໂທລະພາບສູນກາງຈີນ ຫຼື CMG ໄດ້ຢາຍໃບສຳພາດຕໍ່ຊາວເນັດທົ່ວໂລກ, ມີຜູ້ຕອບສຳພາດ 90,53% ກ່າວຕຳໜິອາເມຣິກາໄດ້ປະຕິບັດມາດຕະການລັດທິຝ່າຍດ່ຽວ ແລະ ມາດຕະການປົກປ້ອງການຄ້າ ເຊິ່ງໄດ້ຢຽບຢ່ຳກະຕິກາອົງການການຄ້າໂລກຢ່າງໜັກໜ່ວງ.

ນັບແຕ່ການສ້າງຕັ້ງອົງການການຄ້າໂລກເປັນຕົ້ນມາ, ຄະດີກ່າວຟ້ອງອາເມຣິກາມີເຖິງ 159 ຄະດີ, ໃນນັ້ນ, ຄະດີທີ່ເກີດຄວາມຂັດແຍ້ງຍ້ອນການຕັດສິນບໍ່ໄດ້ຜົນມີ 28 ຄະດີ ເຊິ່ງກວມ 20% ຂອງຄະດີທີ່ຖືກກ່າວຟ້ອງ. ໃນຜູ້ຕອບການສຳພາດມີ 95,45% ເຫັນວ່າ: ອາເມຣິກາເລືອກການປະຕິບັດຕາມການຕັດສິນຂອງອົງການການຄ້າໂລກເປັນການກະທຳ “ສອງມາດຕະຖານແບບອາເມຣິກາ” ທີ່ແທ້ຈິງ.

ນອກຈາກທຳລາຍກະຕິກາຂອງອົງການການຄ້າໂລກແລ້ວ, ອາເມຣິ້ກາຍັງໄດ້ປະຕິບັດລັດທິຝ່າຍດຽວ ແລະ “ສອງມາດຕະຖານ” ໃນນະໂຍບາຍອຸດສາຫະກຳ. ນັບມາຮອດເດືອນພຶດສະພາປີນີ້, ມີ 2868 ອົງກອນໃນ 91 ປະເທດແລະເຂດແຄວ້ນທົ່ວໂລກຖືກອາເມຣິກາຈັດເຂົ້າໃນບັນຊີລົງໂທດ, ອາເມຣິກາໄດ້ກາຍເປັນປະເທດທີ່ໄດ້ປະຕິບັດມາດຕະການລົງໂທດຝ່າຍດຽວທີ່ຫຼາຍທີ່ສຸດໃນໂລກ. ຕໍ່ເລື່ອງນີ້, ມີຜູ້ຕອບການສຳພາດ 91,55% ເຫັນວ່າ: ອາເມຣິກາໄດ້ປະຕິບັດການລົງໂທດຝ່າຍດຽວ ໄດ້ທຳລາຍຄວາມໝັ້ນຄົງຂອງຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງທົ່ວໂລກຢ່າງໜັກໜ່ວງ. ມີຜູ້ຕອບການສຳພາດ 95,24% ເຫັນວ່າ: ອາເມຣິກາໄດ້ປະຕິບັດລັດທິຝ່າຍດຽວຕາມລຳພັງໃຈດ້ວຍມະໂນພາບຄວາມໝັ້ນຄົງແຫ່ງຊາດ.