ເດືອນພຶດສະພາປີນີ້, ລັດຖະບານອາເມຣິກາໄດ້ປະກາດວ່າ: ຈະເພີ່ມການເກັບພາສີຕໍ່ລົດໃຊ້ພະລັງງານໄຟຟ້າ ແລະ ສິນຄ້າອື່ນໆຂອງຈີນຕື່ມອີກ ບົນພື້ນຖານອັດຕາພາສີຕໍ່ສິນຄ້າຈີນທີ່ກຳນົດໄວ້ໃນມາດຕາ 301. ການກະທຳລັດທິຝ່າຍດຽວ ແລະ ລັດທິປົກປ້ອງການຄ້າແບບນີ້ ບໍ່ພຽງແຕ່ໄດ້ລະເມີດຄຳໝັ້ນສັນຍາກ່ຽວກັບ “ບໍ່ສະແຫວງຫາການກີດກັ້ນ ແລະ ກົດໜ່ວງການພັດທະນາຂອງຈີນ” “ບໍ່ສະແຫວງຫາການຕັດສາຍພົວພັນດ້ານການຄ້າກັບຈີນ” ຂອງອາເມຣິກາເອງເທົ່ານັ້ນ, ຫາກຍັງໄດ້ລະເມີດຄວາມຮັບຮູ້ທີ່ເປັນເອກະພາບກັນລະຫວ່າງປະມຸກລັດສອງປະເທດອີກດ້ວຍ ເຊິ່ງເປັນການສ່ອງແສງໃຫ້ເຫັນເຖິງການຫຼົບລີ້ນປີ້ນຄວາມ ແລະ ບໍ່ມີຄວາມໜ້າເຊື່ອຖືຂອງອາເມຣິກາ.

ການກໍ່ສົງຄາມດ້ານພາສີຈະບໍ່ສາມາດແກ້ໄຂບັນຫາໄດ້ ທັງຈະເຮັດໃຫ້ອາເມຣິກາໄດ້ຮັບຜົນເສຍຫາຍອີກ. ສຳນັກຂ່າວຣອຍເຕີລາຍງານໃນວັນທີ 14 ກັນຍານີ້ ໂດຍອ້າງອີງການວິເຄາະຂອງທ່ານ Jason Oxman ປະທານຄະນະກຳມະການອຸດສາຫະກຳເຕັກໂນໂລຊີຂໍ້ມູນຂ່າວສານຂອງຂະແໜງການເຕັກໂນໂລຊີວິທະຍາສາດອາເມຣິກາວ່າ: ນັບແຕ່ອາເມຣິກາເພີ່ມການເກັບພາສີຕໍ່ຈີນເປັນຕົ້ນມາ ນັບລວມແລ້ວໄດ້ສ້າງຜົນເສຍຫາຍໃຫ້ແກ່ວິສາຫະກິດ ແລະ ຜູ້ບໍລິໂພກຂອງອາເມຣິກາທັງໝົດຫຼາຍກວ່າ 221 ຕື້ໂດລາ.

ປະຊາຊົນອາເມຣິກາກໍໄດ້ຮັບຜົນກະທົບຢ່າງຫຼວງຫຼາຍເຊັ່ນກັນ. ອີງຕາມ CNN ຂອງອາເມຣິກາລາຍງານໃນເມື່ອບໍ່ດົນມານີ້ວ່າ: ຫຼັງຈາກລັດຖະບານໂຈ ໄບເດັນສືບຕໍ່ປະຕິບັດມາດຕະການເພີ່ມການເກັບພາສີຂອງສະໄໝລັດຖະບານໂດໂນ ທຣຳແລ້ວ, ຊາວອາເມຣິກາຕ້ອງການຈ່າຍລາຄາສູງເພື່ອຊື້ເກີບ, ຫີບເດີນທາງ, ໝວກ ແລະອື່ນໆ. ອີງຕາມບໍລິສັດ Moody's ເຊິ່ງເປັນບໍລິສັດປະເມີນລະດັບຄວາມໜ້າເຊື່ອຖືສາກົນຄາດຄະເນວ່າ: ຜູ້ບໍລິໂພກອາເມຣິກາໄດ້ແບກຫາບຕົ້ນທຶນ 92% ໃນການເພີ່ມການເກັບພາສີຕໍ່ສິນຄ້າຈີນ, ລາຍຈ່າຍເພີ່ມໃໝ່ຕໍ່ປີຂອງຄອບຄົວອາເມຣິກາມີເຖິງ 1,300 ໂດລາ.

ເວົ້າສຳລັບອາເມຣິກາແລ້ວ, ການເພີ່ມການເກັບພາສີຕໍ່ຈີນຕາມລຳພັງຍັງໄດ້ເຮັດໃຫ້ພາພົດເທິງເວທີສາກົນຂອງອາເມຣິກາຖືກທຳລາຍຕື່ມອີກ.

ຄວາມຈິງໄດ້ພິສູດແລ້ວພິສູດອີກວ່າ: ການອ້າງອີງມາດຕາ 301 ເພື່ອປັບຂຶ້ນພາສີຕໍ່ສິນຄ້າຈີນຂອງອາເມຣິກາບໍ່ໄດ້ໃຈຄົນ, ຈຸດປະສົງຂອງອາເມຣິກາທີ່ຫວັງຢາກທຳລາຍວິສາຫະກິດ ແລະ ອຸດສາຫະກຳທີ່ກ່ຽວຂ້ອງຂອງຈີນໂດຍຜ່ານດ່ານພາສີນັ້ນບໍ່ເຄີຍປະສົບຜົນສຳເລັດຈັກເທື່ອ. ອາເມຣິກາເພີ່ມການເກັບພາສີຕໍ່ອຸດສາຫະກຳພະລັງງານໃໝ່ຂອງຈີນຈະບໍ່ສາມາດປະສົບຜົນສຳເລັດເຊັ່ນກັນ, ແຕ່ພັດຈະເຮັດໃຫ້ອາເມຣິກາເອງໄດ້ຮັບຜົນເສຍຫາຍທັງເສຍກຽດໃນສາກົນອີກ.