ວັນທີ 17 ກັນຍານີ້, ຢູ່ກອງປະຊຸມຖະແຫຼງຂ່າວທີ່ຈັດຂຶ້ນຢູ່ ນະຄອນສະຕຣາສບວກຂອງຝຣັ່ງ, ທ່ານນາງເອີຊູລາ ວອນເດີເລເຢນ ປະທານຄະນະກຳມາທິການສະຫະພາບເອີຣົບໄດ້ປະກາດບັນຊີລາຍຊື່ຜູ້ຖືກສະເໜີຊື່ເປັນສະມາຊິກຄະນະກຳມາທິການສະຫະພາບເອີຣົບຊຸດໃໝ່.

ວັນທີ 18 ກໍລະກົດ 2024, ທ່ານນາງ ວອນເດີເລເຢນໄດ້ຮັບເລືອກຕັ້ງເປັນປະທານຄະນະກຳມາທິການສະຫະພາບເອີຣົບອີກສະໄໝໜຶ່ງໂດຍຜ່ານການປ່ອນບັດຂອງລັດຖະສະພາເອີຣົບ. ຫຼັງຈາກນັ້ນ, ທ່ານໄດ້ດຳເນີນການສ້າງຕັ້ງຄະນະກຳມາທິການສະຫະພາບເອີຣົບຊຸດໃໝ່. ອີງຕາມຂໍ້ກຳນົດທີ່ກ່ຽວຂ້ອງຂອງສະຫະພາບເອີຣົບແລ້ວ, ສະມາຊິກທຸກປະເທດຄວນສະເໜີຊື່ຜູ້ໜຶ່ງເປັນສະມາຊິກຄະນະກຳມາທິການສະຫະພາບເອີຣົບ. ນອກຈາກທ່ານນາງວອນເດີເລເຢນແລ້ວ, ທຸກຄົນທີ່ຖືກສະເໜີຊື່ຕ້ອງໄດ້ຮັບການອະນຸມັດຈາກລັດຖະສະພາເອີຣົບ, ແລະຜ່ານການທາບທາມຈາກລັດຖະສະພາເອີຣົບ ພ້ອມທັງຜ່ານການປ່ອນບັດຢືນຢັນແລ້ວຈຶ່ງສາມາດຂຶ້ນດຳລົງຕຳແໜ່ງໄດ້.

ເຈົ້າໜ້າທີ່ການທູດສະຫະພາບເອີຣົບກ່າວວ່າ, ເມື່ອເບິ່ງຈາກສະພາບການໃນປັດຈຸບັນແລ້ວເຫັນວ່າ, ການສ້າງຕັ້ງຄະນະນຳຂອງຄະນະກຳມາທິການສະຫະພາບເອີຣົບຊຸດໃໝ່ອາດຈະເລື່ອນເວລາອອກໄປຊ້າກວ່າຕົ້ນເດືອນພະຈິກຕາມແຜນການເດີມ.