ໃນຊຸມປີຜ່ານມ

າ, ຄຽງຄູ່ກັບຕະຫຼາດບໍລິໂພກຂອງຈີນໄດ້ເຕີບໃຫຍ່ຂະຫຍາຍຕົວ, ຕຸກກະຕາແຟຊັນທີ່ສາມາດຕອບສະໜອງຄວາມຕ້ອງການດ້ານການຄົບຄ້າສະມາຄົມລະຫວ່າງໄວລຸ້ນ ໄດ້ພັດທະນາຢ່າງວ່ອງໄວຢູ່ຈີນ. ຈຳນວນປະເພດຕຸກກະຕາທີ່ມີຊື່ສຽງແມ່ນນັບມື້ນັບຫຼາຍຂຶ້ນ, ຕຸກກະຕາແຟຊັນຈີນຕ່າງໆ ເຊັ່ນ: ຕຸກກະຕາໃນກັບມືດເປັນຕົ້ນໄດ້ຮັບຄວາມນິຍົມຊົມຊອບຈາກລູກຄ້າ ແລະ ໄດ້ເຜີຍແຜ່ໄປສູ່ຕ່າງປະເທດ.

ຕຸກກະຕາແຟຊັນຂອງຈີນໄດ້ປາກົດຕົວຢູ່ພາກພື້ນອາຊີຕາເວັນອອກສຽງໃຕ້ນັບມື້ນັບຫຼາຍຂຶ້ນ. ນັບແຕ່ໄດ້ເປີດຮ້ານຢູ່ນະຄອນຫຼວງບາງກອກປະເທດໄທໃນເດືອນກັນຍາປີກາຍເປັນຕົ້ນມາ, ຕຸກກະຕາ  LABUBU ຂອງບໍລິສັດ POP MART ຂອງຈີນໄດ້ຂາຍດິບຂາຍດີ ຍ້ອນຮູບຊົງທີ່ໜ້າຮັກ ແລະ ການອອກແບບທີ່ເປັນເອກະລັກພິເສດ. ນາງລີຊາ ດາລາຊື່ດັງຂອງໄທໄດ້ໂພດວິດີໂອຕອນທີ່ລາວກຳລັງໄປຊື້ຕຸກກະຕາຢູ່ຮ້ານ POP MART ຢູ່ວົງສື່ສັງຄົມອອນລາຍເປັນຫຼາຍມື້ລຽນຕິດ, ຈົນເຖິງຂັ້ນເຈົ້າຍິງລາຊະອານາຈັກໄທກໍໄດ້ຫ້ອຍຕຸກກະຕາ LABUBU ຢູ່ກະເປົາຕິດໂຕຂອງຕົນ. ໃນຮ້ານຄ້າໃຫຍ່ແຫ່ງຕ່າງໆຂອງໄທ, ລູກຄ້າທັງຫຼາຍໄດ້ລຽນຄິວເປັນແຖວຍາວໆຢູ່ໜ້າປະຕູຮ້ານ POP MART ເລື້ອຍໆ, ຮ້ານ POP MART ພາຍໃນປະເທດຈີນກໍເຫັນມີຄົນໄທຫຼາຍຄົນມັກເຂົ້າໄປຊື້ຕຸກກະຕາເລື້ອຍໆ. ນອກຈາກໄທແລ້ວ, ບໍລິສັດ POP MART ຍັງໄດ້ເປີດຮ້ານຢູ່ສິງກະໂປ, ມາເລເຊຍ ແລະ ຫວຽດນາມເຊັ່ນດຽວກັນ ແລະ ກໍໄດ້ຮັບຄວາມນິຍົມຊົມຊອບຈາກລູກຄ້າທັງຫຼາຍ.

ນອກຈາກບໍລິສັດ POP MART ແລ້ວ, ນັບແຕ່ບໍລິສັດ 52TOYS ທີ່ເປັນອີກຍີ່ຫໍ້ຕຸກກະຕາແຟຊັນຂອງຈີນໄດ້ເປີດຮ້ານຢູ່ໄທແຕ່ເດືອນທັນວາປີກາຍເປັນຕົ້ນມາ, ກໍມີຜົນງານທີ່ດີເຊັ່ນກັນ, ຫຼາຍຮູບຊົງຕຸກກະຕາຂອງບໍລິສັດດັ່ງກ່າວລ້ວນແຕ່ໄດ້ຮັບຄວາມນິຍົມຊົມຊອບຈາກລູກຄ້າ.

ຕຸກກະຕາ POP MART ໄດ້ຮັບຄວາມນິຍົມຊົມຊອບຈາກລູກຄ້າອາດຈະເປັນເລື່ອງບັງເອີນ, ແຕ່ຕຸກກະຕາແຟຊັນຂອງຈີນກ້າວໄປສູ່ໂລກພັດຈະເປັນເລື່ອງທີ່ຕ້ອງເປັນໄປ. ຄຽງຄູ່ກັບອຸດສາຫະກຳການຜະລິດຂອງຈີນ ແລະ ອິດທິພົນດ້ານວັດທະນະທຳຂອງຈີນໄດ້ຖືກຍົກສູງຂຶ້ນໃນຕະຫຼາດສາກົນ, ພ້ອມທັງທຸລະກິດເອເລັກໂຕຣນິກຂ້າມຊາດຂອງຈີນໄດ້ພັດທະນາຢ່າງວ່ອງໄວ, ຕຸກກະຕາແຟຊັນຂອງຈີນເລີ່ມບຸກເບີກຕະຫຼາດຕ່າງປະເທດທີ່ໃຫຍ່ກວ່າເກົ່າ. ປັດຈຸບັນ, ຍີ່ຫໍ້ຕຸກກະຕາແຟຊັນຕ່າງໆຂອງຈີນໄດ້ເພີ່ມທະວີການລົງທຶນຢູ່ຕະຫຼາດຕ່າງປະເທດນັບມື້ນັບຫຼາຍຂຶ້ນ.

ໃນຖານະເປັນປະເທດໃຫຍ່ດ້ານການຜະລິດເຄື່ອງຫຼິ້ນໃນໂລກ, ຈີນໄດ້ຜະລິດເຄື່ອງຫຼິ້ນປະມານ 70% ຂອງທົ່ວໂລກ ແລະ ເປັນຂອດໜຶ່ງທີ່ສຳຄັນໃນຕ່ອງໂສ້ອຸດສາຫະກຳເຄື່ອງຫຼິ້ນຂອງໂລກ. ຄຽງຄູ່ກັບຂະແໜງການບັນເທີງດ້ານວັດທະນະທຳພາຍໃນປະເທດ ແລະ ວັດທະນະທຳແຟຊັນຈີນໄດ້ເຕີບໃຫຍ່ຂະຫຍາຍຕົວ, ອຸດສາຫະກຳເຄື່ອງຫຼິ້ນຂອງຈີນໄດ້ຈາກການຮັບຈ້າງຜະລິດຕາມທີ່ໄດ້ຮັບມອບໝາຍຈາກລູກຄ້າໃນອະດີດ ພັດທະນາມາເປັນການພັດທະນາດ້ວຍຄຸນນະພາບສູງ ເຊັ່ນ: ການປະດິດສ້າງເນື້ອໃນ, ການສ້າງທຸລະກິດຍີ່ຫໍ້ຂອງຕົນ ແລະ ການສ້າງຍີ່ຫໍ້ໃໝ່ຂອງຕົນ.

ການເຊື່ອມໂຍງເຂົ້າກັບປັດໄຈວັດທະນະທຳທ້ອງຖິ່ນໃນການອອກແບບຕຸກກະຕາແຟຊັນ ຈະສາມາດໄດ້ຮັບສຽງຕອບຮັບທີ່ດີຈາກຕະຫຼາດທ້ອງຖິ່ນ ແລະ ຍົກຊື່ສຽງຂອງຍີ່ຫໍ້ໃຫ້ສູງຂຶ້ນ. ຢູ່ໄທ, ບໍລິສັດ POP MART ໄດ້ຮ່ວມມືກັບທ່ານນາງໂມລີ ສິລະປິນໄທ, ໄດ້ອອກແບບຕຸກກະຕາເດັກໄຫ້ ເຊິ່ງກໍໄດ້ຮັບຄວາມນິຍົມຊົມຊອບຈາກລູກຄ້າໄທຢ່າງຫຼວງຫຼາຍ.

ຕຸກກະຕາແຟຊັນຂອງຈີນໄດ້ຮັບຄວາມນິຍົມຊົມຊອບຢູ່ຕ່າງປະເທດນັບມື້ນັບຫຼາຍຂຶ້ນ ກໍໄດ້ເພີ່ມພະລັງຊີວິດໃໝ່ເຂົ້າໃນການແລກປ່ຽນວັດທະນະທຳລະຫວ່າງຈີນກັບປະເທດຕ່າງໆ. ຫວ່າງມໍ່ໆມານີ້, ອົງການທ່ອງທ່ຽວແຫ່ງຊາດໄທໄດ້ຈັດພິທີຕ້ອນຮັບຕຸກກະຕາ LABUBU ຢູ່ສະໜາມບິນສຸວັນນະພູມ ແລະ ໄດ້ມອບນາມມະຍົດ “ຜູ້ສຳຜັດໄທທີ່ມີຄວາມອັດສະຈັນ” ໃຫ້ຕຸກກະຕາ LABUBU ພ້ອມທັງຫວັງວ່າ: ຕຸກກະຕາ LABUBU ສາມາດກາຍເປັນສາຍພານທີ່ສຳຄັນໃນການຊຸກຍູ້ການໄປມາຫາສູ່ດ້ານວັດທະນະທຳແຟຊັນລະຫວ່າງໄທ-ຈີນ. ນີ້ກໍແມ່ນທາງການໄທໄດ້ມອບນາມມະຍົດລະດັບສູງສຸດໃຫ້ແກ່ຕຸກກະຕາແຟຊັນແບບນີ້ເປັນຄັ້ງທຳອິດ.

ຍີ່ຫໍ້ຕຸກກະຕາແຟຊັນຕ່າງໆ ເຊັ່ນ: POP MART ແລະ  52TOYS ໄດ້ຮັບຄວາມນິຍົມຊົມຊອບຫຼາຍຢູ່ຕ່າງປະເທດ ເຊິ່ງສ່ອງແສງໃຫ້ເຫັນວ່າ: ອຸດສາຫະກຳການຜະລິດຂອງຈີນນັບມື້ນັບມີຫົວຄິດປະດິດສ້າງໃນການອອກແບບຕຸກກະຕາຕ່າງໆ. ໃນອະນາຄົດ, ຈີນກໍຈະມີຜະລິດຕະພັນວັດທະນະທຳແຟຊັນທີ່ມີຄຸນນະພາບດີຫຼາຍກວ່າເກົ່າໃຫ້ແກ່ລູກຄ້າປະເທດຕ່າງໆ ພ້ອມທັງຕອບສະໜອງຕາມຄວາມຕ້ອງການຂອງລູກຄ້າສາກົນນັບມື້ນັບດີຂຶ້ນ.