ກ່ອນໜ້ານີ້, ທ່ານ ໂວໂລດີເມຍ ເຊເລນສະກີ ປະທານາທິບໍດີອູແກຣນໄດ້ແຈ້ງໃຫ້ຮູ້ວ່າ: ອູແກຣນກຽມຈະພົບປະກັບຣັດເຊຍໃນກອງປະຊຸມສຸດຍອດສັນຕິພາບ ກ່ຽວກັບບັນຫາອູແກຣນຄັ້ງທີ 2 ແລະ ພວມວາງ “ແຜນການໄຊຊະນະ” ຂອງອູແກຣນ ເຊິ່ງແຜນການດັ່ງກ່າວຈະຖືເປັນພື້ນຖານໃນການສົນທະນາກັບຣັດເຊຍ.

   ວັນທີ 21 ກັນຍານີ້, ທ່ານນາງ ມາເຣຍ ຈາຄາໂຣວາ ໂຄສົກກະຊວງການຕ່າງປະເທດຣັດເຊຍຢືນຢັນວ່າ: ຣັດເຊຍຈະບໍ່ເຂົ້າຮ່ວມກອງປະຊຸມສຸດຍອດສັນຕິພາບກ່ຽວກັບບັນຫາອູແກຣນຄັ້ງທີ 2 ທີ່ຄາດວ່າຈະຈັດຂຶ້ນໃນເດືອນພະຈິກປີນີ້. ພ້ອມດຽວກັນນີ້, ທ່ານນາງ ຈາຄາໂຣວາ ກ່າວວ່າ: ຣັດເຊຍບໍ່ປະຕິເສດທີ່ຈະແກ້ໄຂວິກິດການອູແກຣນໂດຍຜ່ານຮູບແບບການທູດ ແລະ ການເມືອງ, ຣັດເຊຍໄດ້ກຽມເປິກສາຫາລືຕໍ່ຂໍ້ສະເໜີທີ່ເຄັ່ງຂຶມ, ແຕ່ຕ້ອງພິຈາລະນາເຖິງສະຖານະການພາກພື້ນໃນປັດຈຸບັນ, ສະພາບການຕົວຈິງຂອງພູມສາດການເມືອງກໍຄືເງື່ອນໄຂທີ່ກ່ຽວຂ້ອງທີ່ທ່ານ ວະລາດີເມຍ ປູຕິນ ປະທານາທິບໍດີຣັດເຊຍສະເໜີອອກມາໃນເດືອນມິຖຸນາປີນີ້. ທ່ານນາງ ຈາຄາໂຣວາ ກ່າວຕື່ມວ່າ: ຖ້າວ່າຣັດເຊຍບໍ່ເຂົ້າຮ່ວມກອງປະຊຸມດັ່ງກ່າວ ແລະ ຝ່າຍຕ່າງໆບໍ່ພິຈາລະນາເຖິງຜົນປະໂຫຍດຂອງຣັດເຊຍ, ກໍຈະບໍ່ສາມາດບັນລຸສັນຕິພາບແບບຍຸຕິທຳ ແລະ ຍືນຍົງ.