ເດືອນຕຸລາປີ2001, ທ່ານສີຈິ້ນຜິງ ໄດ້ຝາກຈົດໝາຍສະບັບໜຶ່ງໄປເຖິງທ່ານສີຈົ້ງຊຸ່ນ ພໍ່ຂອງເພິ່ນ ເຊິ່ງເນື້ອໃຈຈົດໝາຍໄດ້ລະບຸດ້ວຍຄວາມດູດດື່ມວ່າ: “ພໍ່ເຮັດວຽກເພື່ອປະຊາຊົນຈີນປຽບເໝືອນງົວເຖົ້າໂຕໜຶ່ງທີ່ໄຖນາດ້ວຍຄວາມອົດທົນຢ່າງງຽບໆ. ສິ່ງນີ້ໄດ້ກະຕຸກຊຸກຍູ້ໃຫ້ລູກທຸ້ມເທເຫື່ອແຮງ ແລະສະຕິປັນຍາຕະຫຼອດຊີວິດຂອງຕົນເຂົ້າໃນພາລະກິດຮັບໃຊ້ປະຊາຊົນ.” ເນື້ອໃນຈົດໝາຍສະບັບນີ້ຂອງທ່ານສີຈິ້ນຜິງຍັງໄດ້ລະບຸຕື່ມວ່າ: ເພິ່ນໄດ້ສືບທອດຄຸນສົມບັດສິນທຳປະຕິວັດທີ່ສູງສົ່ງຫຼາຍຢ່າງຈາກພໍ່, ໃນນັ້ນ, ນ້ຳໃຈບໍລິສຸດຕໍ່ປະຊາຊົນ ກໍແມ່ນແບບຢ່າງໜຶ່ງ.

   ລູກຂອງເຂດພູພຽງດິນເຫຼືອງ

“ຂ້າພະເຈົ້າເປັນລູກຂອງຊາວນາ” ນີ້ຄືຄຳເວົ້າທີ່ທ່ານສີຈົ້ງຊຸ່ນ ພໍ່ຂອງທ່ານສີຈິ້ນຜິງມັກເວົ້າຢູ່ໃນເຮືອນເລື້ອຍໆ.

ສ່ວນທ່ານສີຈິ້ນຜິງເຄີຍເວົ້າວ່າ: “ປູ່ຂອງຂ້າພະເຈົ້າກໍເປັນຊາວນາເຊັ່ນດຽວກັນ, ພໍ່ຂອງຂ້າພະເຈົ້າແມ່ນກຳເນີດມາຈາກຊາວນາກ້າວຂຶ້ນສູ່ເສັ້ນທາງປະຕິວັດ, ຂ້າພະ ເຈົ້າເອງກໍໄດ້ລົງພື້ນຖານໃຊ້ຊີວິດຊາວນາເປັນເວລາ7ປີ.” ສາຍໃຍຜູກພັນອັນລຽບງ່າຍທີ່ມີຕໍ່ຊາວກະສິກອນແບບນີ້, ທ່ານສີຈິ້ນຜິງແມ່ນໄດ້ຈົດຈຳໄວ້ຢູ່ໃນໃຈຕະຫຼອດ.

ວັນທີ21ຕຸລາ2021, ທ່ານສີຈິ້ນຜິງໄດ້ລົງເຄື່ອນໄຫວຢ້ຽມຢາມແລະເຮັດວຽກຢູ່ນະຄອນຕົ່ງຢິງແຂວງຊ່ານຕົ່ງ,ເພິ່ນໄດ້ຍ່າງລົງສູ່ທົ່ງນາ,ກົ້ມຕົວລົງເດັດເອົາຖົ່ວເຫຼືອງຟັກໜຶ່ງ ແກະເບິ່ງຢ່າງລະອຽດແລ້ວຍິບເອົາຖົ່ວເຫຼືອງເມັດໜຶ່ງໃສ່ເຂົ້າໄປໃນປາກຫຍ້ຳລະອຽດທັງເວົ້າວ່າ: “ໝາກຖົ່ວຄຸນນະພາບດີຫຼາຍ”. ພາບນີ້ໄດ້ເຮັດໃຫ້ທ່ານໂລໂສຢວີ້ ຜູ້ຮັບຜິດຊອບເຕັກນິກກະສິກຳທີ່ຢືນຢູ່ທາງຂ້າງຮູ້ສຶກງຶດງໍ້ ແລະ ປະທັບໃຈຫຼາຍ: “ນີ້ເປັນກິລິຍາຂອງຊາວນາອາວຸໂສຈຶ່ງຄ່ອຍມີໄດ໋”.

ກິລິຍາທີ່ເປັນທຳມະຊາດແບບນີ້ໄດ້ສ່ອງແສງໃຫ້ເຫັນເຖິງທາດແທ້ການອອກແຮງງານ ແລະນ້ຳໃຈບໍລິສຸດຂອງທ່ານສີຈິ້ນຜິງໂດຍບໍ່ມີການປ່ຽນແປງຈັກເທື່ອໄປຄຽງຄູ່ກັບການເວລາ.

ສ່ວນນ້ຳໃຈບໍລິສຸດຂອງທ່ານສີຈິ້ນຜິງແບບນີ້ແມ່ນເປັນຍ້ອນໄດ້ຮັບອິດທິພົນມາຈາກການອົບຮົມບົ່ມສອນແບບແຜນຄອບຄົວ ແລະ ມາຈາກປະສົບການເຕີບໂຕຂອງເພິ່ນ.

ເນື້ອໃນບາງຕອນຂອງຈົດໝາຍທີ່ທ່ານສີຈິ້ນຜິງຝາກເຖິງພໍ່ໄດ້ບະລຸວ່າ: “ພໍ່ເປັນລູກຂອງຊາວນາ, ຮັກປະຊາຊົນຈີນ, ຮັກເພື່ອນນັກຮົບປະຕິວັດ, ຮັກຊາວບ້ານຢູ່ບ້ານເກີດເມືອງນອນ, ຮັກພໍ່ແມ່, ເມຍ ແລະ ລູກໆ. ພໍ່ໄດ້ສົ່ງອິດທິພົນໃຫ້ຄົນຢູ່ອ້ອມຂ້າງດ້ວຍຄວາມເອື້ອອາທອນ.”

ສາຍໃຍຜູກພັນກັບຊາວກະສິກອນຂອງພໍ່ໄດ້ສົ່ງອິດທິພົນຢ່າງເລິກເຊິ່ງໃຫ້ກັບທ່ານສີຈິ້ນຜິງ.

ປີ1969, ທ່ານສີຈິ້ນຜິງອາຍຸບໍ່ຮອດ 16 ປີ ໃນນາມເປັນໄວໜຸ່ມປັນຍາຊົນຜູ້ໜຶ່ງກໍໄດ້ອອກຈາກບ້ານທີ່ນະຄອນຫຼວງປັກກິ່ງເດີນທາງໄປລົງພື້ນຖານດຳລົງຊີວິດ ແລະ ເຮັດວຽກກະສິກຳຢູ່ບ້ານຫຼຽງເຈ່ຍເຫີ ທາງພາກເໜືອແຂວງສ້ານຊີ່ທີ່ຢູ່ພູພຽງດິນເຫຼືອງ. ຕອນໃຊ້ຊີວິດຊາວນາເປັນເວລາ 7ປີ, ເພິ່ນໄດ້ຜູກມິດອັນເລິກເຊິ່ງກັບປະຊາຊົນຢູ່ທ້ອງຖິ່ນແຫ່ງນັ້ນ, ພ້ອມທັງໄດ້ລົງເລິກຮັບຮູ້ຊົນນະບົດຂອງຈີນເປັນຄືແນວໃດ? ຄວາມທຸກສຸກ, ຄວາມມ່ວນຊື່ນ ແລະຄວາມໂສກເສົ້າຂອງປະຊາຊົນເປັນຄືແນວໃດ?

ທ່ານສີຈິ້ນຜິງເຄີຍໃຊ້ຊີວິດຢູ່ບ່ອນທຸກຍາກຫ່າງໄກສອກຫຼີກ ຈຶ່ງຮູ້ດີເຖິງຄວາມທຸກຂອງປະຊາຊົນ. ສະນັ້ນ, ເພິ່ນຈຶ່ງເວົ້າວ່າ: “ເມື່ອໄປຮອດບ່ອນໃດ ຂ້າພະເຈົ້າຕ້ອງໄປເບິ່ງເຂດຊົນນະບົດ ເພາະວ່າ ເຂດຊົນນະບົດແມ່ນໄດ້ສ່ອງແສງໃຫ້ເຫັນເຖິງຊີວິດການເປັນຢູ່ຂັ້ນພື້ນຖານທີ່ສຸດຂອງປະຊາຊົນພວກເຮົາ.”

ເນື້ອໃນບາງຕອນຂອງບົດຫວນຄືນຫຼັງບົດໜຶ່ງຂອງທ່ານສີຈິ້ນຜິງໄດ້ລະບຸວ່າ: “ບໍ່ວ່າຈະໄປຮອດບ່ອນໃດກໍຕາມ, ຂ້າພະເຈົ້າກໍເປັນລູກຂອງເຂດພູພຽງດິນເຫຼືອງຕະຫຼອດໄປ”.

ທ່ານສີຈິ້ນຜິງຍັງເຄີຍກ່າວວ່າ: “ຄົນຮຸ່ນພວກເຮົາແມ່ນມີນ້ຳໃຈຢ່າງໜຶ່ງ, ຄືຢາກຊ່ວຍເຫຼືອປະຊາຊົນໂດຍສະເພາະແມ່ນຊາວນາໃຫ້ໄດ້.”  ໃນນາມເປັນ“ລູກຂອງເຂດພູພຽງດິນເຫຼືອງ”, ເພິ່ນໄດ້ຈາລຶກນ້ຳໃຈບໍລິສຸດຕໍ່ປະຊາຊົນໄວ້ຢູ່ໃນໃຈຢ່າງສະເໝີຕົ້ນສະເໝີປາຍ.

ແບບແຜນຄອບຄົວປະຕິວັດ

“ການຮັບໃຊ້ປະຊາຊົນ ແມ່ນຄວາມກະຕັນຍູຕໍ່ພໍ່ແມ່ດີທີ່ສຸດ” ທ່ານສີຈົ້ງຊຸ່ນເຄີຍສັ່ງສອນລູກໆຂອງເພິ່ນແບບນີ້, ເພິ່ນໄດ້ປະຕິບົດຕົວຈິງດ້ວຍຕົນເອງເພື່ອສັ່ງສອນລູກຂອງເພິ່ນວ່າຄວນປະພຶດຕົວເປັນຜູ້ທີ່ບໍລິສຸດ ແລະ ມີປະໂຫຍດຕໍ່ປະຊາຊົນຄືແນວໃດ.

ເດືອນກັນຍາປີ2021, ທ່ານສີຈິ້ນຜິງ ທີ່ພວມເຄື່ອນໄຫວຢ້ຽມຢາມແລະເຮັດວຽກຢູ່ ນະຄອນຢວີລິນແຂວງສ້ານຊີ່ນັ້ນໄດ້ເດີນທາງໄປຢ້ຽມຢາມອະນຸສອນສະຖານຄະນະພັກເຂດສຸຍເຕີ,ຢູ່ໃນຫ້ອງວາງສະແດງຂອງອະນຸສອນສະຖານ ມີຕົວໜັງສືແຖວໜຶ່ງທີ່ສະດຸດຕາຂຽນວ່າ: “ນັ່ງລົງຢູ່ຂ້າງປະຊາຊົນຢ່າງຊື່ຕົງ”.

   ຄຳເວົ້ານີ້ແມ່ນໃຊ້ສັບທ້ອງຖິ່ນຂອງເຂດກ່ວນຈົ່ງ ພາກກາງຂອງແຂວງສ້ານຊີ່, ເມື່ອຫວນຄືນເຖິງຄຳເວົ້າແບບພາສາທ້ອງຖິ່ນດັ່ງກ່າວຂອງທ່ານສີຈົ້ງຊຸ່ນ ຜູ້ເປັນພໍ່, ທ່ານສີຈິ້ນຜິງຮູ້ສຶກປະທັບໃຈຫຼາຍ.

ພໍ່ບອກສອນແລະເຮັດເປັນແບບຢ່າງໃຫ້ແກ່ລູກ ໄດ້ສົ່ງອິດທິພົນໃຫ້ແກ່ທ່ານສີຈິ້ນຜິງປຽບເໝືອນສາຍລົມແລະນ້ຳຝົນຍາມລະດູໃບໄມ້ປົ່ງຫຼໍ່ລ້ຽງສິ່ງທີ່ມີຊີວິດຕ່າງໆ.

ເນື້ອໃນບາງຕອນຂອງບົດຄວາມຫວນຄືນຫຼັງຂອງທ່ານນາງ ເຮີ້ເຈເຊິ່ງ ລູກສາວຂອງທ່ານເຮີ້ໂຫຼງ ອະດີດຜູ້ນຳປະເທດຈີນໄດ້ລະບຸວ່າ: ພາຍຫຼັງທ່ານສີຈິ້ນຜິງເຂົ້າເຮັດວຽກທາງການເມືອງແລ້ວ, ທ່ານສີຈົ້ງຊຸ່ນໄດ້ເວົ້າກັບທ່ານສີຈິ້ນຜິງ ຜູ້ເປັນລູກດ້ວຍຄວາມສຳຄັນວ່າ: “ບໍ່ວ່າລູກຈະເປັນເຈົ້າໃຫຍ່ນາຍໂຕສູງສ່ຳໃດກໍຕາມ, ຢ່າສູ່ຫຼົງລືມການຮັບໃຊ້ປະຊາຊົນດ້ວຍຄວາມດຸໝັ່ນຂະຫຍັນພຽນ, ຄິດເພື່ອປະຊົນຢ່າງແທ້ຈິງ, ຕ້ອງໃກ້ຊິດຕິດແທດມະຫາຊົນ, ເປັນກັນເອງກັບປະຊາຊົນ.”

ແບບແຜນຄອບຄົວສົ່ງອິດທິພົນໃຫ້ກັບທ່ານສີຈິ້ນຜິງປຽບເໝືອນນ້ຳຝົນຍາມລະດູໃບໄມ້ປົ່ງໄດ້ຫຼໍ່ລ້ຽງສິ່ງທີ່ມີຊີວິດຢ່າງງຽບໆ.

ເນື້ອໃນຈົດໝາຍທີ່ຝາກເຖິງພໍ່ຂອງທ່ານສີຈິ້ນຜິງໄດ້ລະບຸເຖິງອິດທິພົນຂອງທ່ານສີຈົ້ງຊຸ່ນ ຜູ້ເປັນພໍ່ທີ່ມີຕໍ່ລູກໆວ່າ: “ນີ້ຄືແບບແຜນຄອບຄົວໂບນເຊວິກອາວຸໂສ ແລະຊາວຄອມມູນິດທີ່ສົມຄວນເປັນແບບຢ່າງ, ແບບແຜນຄອບຄົວທີ່ດີແບບນີ້ສົມຄວນສືບທອດຕໍ່ໆກັນໄປຈາກຮຸ່ນສູ່ຮຸ່ນ.”

ແບບແຜນຄອບຄົວແມ່ນຕິດພັນກັບແບບແຜນຂອງພັກ. ຕໍ່ກັບການສືບທອດແບບແຜນຄອບຄົວປະຕິວັດ, ທ່ານສີຈິ້ນຜິງແມ່ນບໍ່ເຄີຍຫຼົງລືມຈັກເທື່ອ.

ທ່ານສີຈິ້ນຜິງເຄີຍເນັ້ນໜັກວ່າ: “ສືບທອດ ແລະ ເສີມຂະຫຍາຍແບບແຜນຄອບຄົວປະຕິວັດຂອງນັກປະຕິວັດອາວຸໂສ, ຮຽນເອົາແບບຢ່າງຂອງບັນດາສະຫາຍ ເຊັ່ນ: ສະຫາຍຈ່ຽວຢວີ້ລູ້, ສະຫາຍ ກູເວີນຊ່າງ, ສະຫາຍຢາງຊ້ານໂຈ່ວເປັນຕົ້ນ, ເພື່ອເປັນແບບຢ່າງແຫ່ງການສ້າງສາແບບແຜນຄອບຄົວ.” ທ່ານສີຈິ້ນຜິງຍັງໄດ້ຊີ້ໃຫ້ເຫັນວ່າ: “ບໍ່ວ່າຍຸກສະໄໝຈະເກີດການປ່ຽນແປງຫຼາຍສ່ຳໃດ, ບໍ່ວ່າສະພາບຊີວີດຈະເກີດການປ່ຽນແປງຫຼາຍສ່ຳໃດກໍຕາມ, ພວກເຮົາຕ້ອງໃຫ້ຄວາມສຳຄັນຕໍ່ການສ້າງສາຄອບຄົວ, ເອົາໃຈໃສ່ຄອບຄົວ, ເອົາໃຈໃສ່ການອົບຮົມບົ່ມສອນຂອງຄອບຄົວແລະເອົາໃຈໃສ່ແບບແຜນຄອບຄົວ.” “ເຮັດໃຫ້ຄອບຄົວເປັນພັນເປັນໝື່ນກາຍເປັນຈຸດພື້ນຖານອັນສຳຄັນສຳລັບການພັດທະນາປະເທດຊາດ, ຄວາມກ້າວໜ້າຂອງຊົນຊາດ ແລະ ຄວາມກົມກຽວຂອງສັງຄົມ.”

   ອຸດົມການແຕ່ຫົວທີ ແລະ ພາລະກຳຂອງຊາວຄອມມູນິດ

ການທີ່ມາຈາກປະຊາຊົນ ຝັງຮາກເລິກຢູ່ນຳປະຊາຊົນ, ເພື່ອປະຊາຊົນ, ເຊິ່ງເປັນອຸດົມການແຕ່ຫົວທີທີ່ໝັ້ນໜຽວບໍ່ປ່ຽນແປງຂອງຊາວຄອມມູນິດສອງຮຸ່ນຄື ທ່ານສີຈິ້ນຜິງ ແລະ ພໍ່ຂອງເພິ່ນ.

ທ່ານສີຈົ້ງຊຸ່ນ ພໍ່ຂອງທ່ານສີຈິ້ນຜິງ ເຊິ່ງເປັນ “ລູກຊາວນາເຂດກ່ວນຈົ່ງແຂວງສ້ານຊີ່” ຖືກເອີ້ນເປັນ “ຜູ້ນຳມະຫາຊົນທີ່ມາຈາກປະຊາຊົນ.”

ທ່ານສີຈິ້ນຜິງ ເກີດຢູ່ໃນຄອບຄົວປະຕິວັດ ໄດ້ຮັບການອົບຮົມບົ່ມສອນປູກຈິດສຳນຶກຈາກພໍ່ແບບບໍ່ຮູ້ສຶກຕົວ, ອິດທິພົນຂອງແບບແຜນຄອບຄົວໄດ້ເຮັດໃຫ້ຄຳວ່າ “ປະຊາຊົນ” ຈາລຶກໄວ້ຢູ່ໃນຈິດໃຈໃຫ້ກາຍເປັນອຸດົມການແຕ່ຫົວທີ.

ສິ່ງນີ້ແມ່ນເຫັນໄດ້ຈາກການລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ທ້ອງຖິ່ນຕ່າງໆໃນທົ່ວປະເທດຢ່າງບໍ່ຮູ້ອິດຮູ້ເມື່ອຍຂອງທ່ານສີຈິ້ນຜິງເຊັ່ນ: ແຂ່ງລົມແຮງຫິມະຕົກໜັກ, ແຂ່ງແດດກ້າ, ຢຽບທາງດິນຕົມ, ຂຶ້ນພູຂ້າມຮ່ອມ, ນັ່ງຕຽງເຕົ້າໄຟ, ນັ່ງຕັ່ງນ້ອຍໂອລົມສົນທະນາກັບປະຊາຊົນຜູ້ທຸກຍາກ, ກິນເຂົ້າແບບລຽບງ່າຍຮ່ວມກັບຊາວບ້ານ,ລົມເລື່ອງລາວຊີວິດປະຈຳວັນກັບຊາວບ້ານແບບເປັນກັນເອງ…ນັບຕັ້ງແຕ່ລົງພື້ນຖານໃຊ້ຊີວິດເປັນຊາວນາຢູ່ຊົນນະບົດເຂດພູພຽງດິນເຫຼືອງ, ຈາກເລຂາໜ່ວຍ ພັກບ້ານຈົນຮອດຜູ້ນຳພາການພັດທະນາປະເທດຈີນໃນຍຸກໃໝ່,ທ່ານສີຈິ້ນຜິງໄດ້ສຳຜັດຮູ້ເຖິງຄວາມທຸກສຸກຂອງປະຊາຊົນ, ຕອບຮັບ ຄວາມປາດຖະໜາຂອງປະຊາຊົນ, ຍຶດໝັ້ນອຸດົມການແຕ່ຫົວທີຂອງຊາວຄອມມູນິດ, ຮັກສາທາດແທ້ພັກຄອມມູນິດທີ່ຮັບໃຊ້ປະຊາຊົນຢ່າງສຸດໃຈແບບສະເໝີຕົ້ນສະເໝີປາຍ.

ເຖິງວ່າເວລາຜ່ານໄປດົນປານໃດກໍຕາມ, ອຸດົມການແຕ່ຫົວທີແມ່ນບໍ່ເຄີຍຫວັ່ນໄຫວຄອນແຄນ.

ຕົວຢ່າງ: ເດືອນພະຈິກປີ2012, ໃນເວລາພົບປະກັບສື່ມວນຊົນຈີນແລະຕ່າງປະເທດຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ, ທ່ານສີຈິ້ນຜິງທີ່ຫາກໍໄດ້ຮັບເລືອກຕັ້ງເປັນເລຂາທິການໃຫຍ່ຄະນະກຳມະການສູນກາງພັກຄອມມູນິດຈີນໄດ້ໃຫ້ຄຳໝັ້ນສັນຍາຢ່າງໜັກແໜ້ນວ່າ: “ຄວາມປາດຖະໜາຂອງປະຊາຊົນທີ່ຢາກມີຊີວິດການເປັນຢູ່ອັນດີງາມ ແມ່ນເປົ້າໝາຍສູ້ຊົນຂອງພວກເຮົາ.”

ເດືອນພະຈິກປີ2013, ເວລາໂອ້ລົມກັບຊາວບ້ານຜູ້ທຸກຍາກຕອນທີ່ລົງເຄື່ອນໄຫວ ແລະ ເກັບກຳຂໍ້ມູນຢູ່ບ້ານສິບແປດຖ້ຳແຂວງຫູໜານ, ທ່ານສີຈິ້ນຜິງໄດ້ແນະນຳຕົນເອງດ້ວຍຄຳເວົ້າທີ່ລຽບງ່າຍວ່າ: “ຂ້າພະເຈົ້າເປັນຜູ້ຮັບໃຊ້ປະຊົນ.”

ເດືອນມີນາປີ2019, ໃນເວລາພົບປະກັບປະທານສະພາຕ່ຳອີຕາລີຢູ່ນະຄອນຫຼວງໂຣມພ້ອມທັງຕອບຄຳຖາມຂອງເພິ່ນ, ທ່ານສີຈິ້ນຜິງໄດ້ກ່າວປະກາດດ້ວຍສຽງດັງກ້ອງວ່າ: “ຂ້າພະເຈົ້າຈະບໍ່ຄິດເພື່ອຕົນເອງ ແລະ ບໍ່ເຮັດໃຫ້ປະຊາຊົນຜິດຫວັງ.”

ໃນເວລາກ່າວຄຳອວຍພອນປີໃໝ່ສາກົນ2024, ທ່ານສີຈິ້ນຜິງໄດ້ໃຊ້ສຳນວນທີ່ສ້າງຄວາມປະທັບໃຈໃຫ້ແກ່ຜູ້ຄົນທັງຫຼາຍວ່າ: “ເປົ້າໝາຍຂອງພວກເຮົາເປັນເປົ້າໝາຍທີ່ຍິ່ງໃຫຍ່ ແລະ ລຽບງ່າຍ, ສະຫຼຸບແລ້ວແມ່ນເຮັດໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນກວ່າເກົ່າ.”

ນອກນີ້ ທ່ານສີຈິ້ນຜິງຍັງເຄີຍເວົ້າດ້ວຍຄວາມໜັກແໜ້ນວ່າ: “ຄຳໝັ້ນສັນຍາທີ່ພັກຄອມມູນິດໄດ້ໃຫ້ໄວ້ກັບປະຊາຊົນ ຕ້ອງບັນລຸຜົນເປັນຈິງແນ່ນອນ!”