ວັນທີ 23 ກັນຍານີ້, ຢູ່ນະຄອນນີວຢອກປະເທດອາເມຣິກາ, ທ່ານມູອີຊູ ປະທານາທິບໍດີມານດີວໄດ້ຕ້ອນຮັບການເຂົ້າຢ້ຽມຄຳນັບຂອງທ່ານຫວາງຢີ້ ກຳມະການກົມການເມືອງສູນກາງພັກຄອມມູນິດຈີນ ລັດຖະມົນຕີກະຊວງການຕ່າງປະເທດຈີນ.

ໃນໂອກາດດັ່ງກ່າວ, ທ່ານຫວາງຢີ້ກ່າວວ່າ: ສາຍພົວພັນຈີນ-ມານດີວໄດ້ກາຍເປັນແບບຢ່າງທີ່ປະເທດໃຫຍ່ ແລະ ນ້ອຍປະຕິບັດຕໍ່ກັນຢ່າງສະເໝີພາບ, ຊ່ວຍເຫຼືອເຊິ່ງກັນແລະກັນ, ຕ່າງຝ່າຍຕ່າງໄດ້ຮັບຜົນປະໂຫຍດນຳກັນ, ຈີນຍິນດີຮ່ວມກັບມານດີວເສີມຂະຫຍາຍມິດຕະພາບອັນເປັນມູນເຊື້ອ, ຮ່ວມກັນກ້າວເດີນຢູ່ແຖວໜ້າແຫ່ງການຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.

ທ່ານມູອີຊູກ່າວວ່າ: ຂ້າພະເຈົ້າຮູ້ສຶກເປັນກຽດຢ່າງຍິ່ງທີ່ເປັນປະມຸກລັດຕ່າງປະເທດຄົນທຳອິດທີ່ເດີນທາງໄປຢ້ຽມຢາມຈີນທາງລັດຖະກິດຕາມຄຳເຊີນຂອງທ່ານປະທານສີຈິ້ນຜິງ, ນີ້ເປັນການຢ້ຽມຢາມລັກສະນະປະຫວັດສາດຄັ້ງໜຶ່ງ ເຊິ່ງໄດ້ຮັບຜົນສຳເລັດຢ່າງຈົບງາມ ແລະ ໄດ້ຊຸກຍູ້ໃຫ້ສາຍພົວພັນມານດີວ-ຈີນຂະຫຍາຍຕົວຢ່າງແຂງແຮງ. ມານດີວເດັດດ່ຽວຍຶດໝັ້ນປະຕິບັດນະໂຍບາຍຈີນດຽວ, ສະໜັບສະໜູນຂໍ້ລິເລີ່ມການຮ່ວມມືສາກົນສຳຄັນຕ່າງໆທີ່ສະເໜີໂດຍທ່ານປະທານສີຈິ້ນຜິງ.