ວັນທີ 1ຕຸລາ2024ເປັນວັນສະຖາປະນາສາທາລະນະລັດປະຊາຊົນຈີນຫຼືວັນຊາດຈີນຄົບຮອບ75ປີ. ຕະຫຼອດໄລຍະ75ປີຜ່ານມາ, ປະເທດຈີນເກີດການປ່ຽນແປງຢ່າງໃຫຍ່ຫຼວງແບບໜ້າມືເປັນຫຼັງມື, ທ່າມກາງຂະບວນວິວັດແຫ່ງການພັດທະນາກ້າວເດີນໄປຂ້າງໜ້າຂອງຍຸກສະໄໝ, ມັກຈະມີຄວາມຊົງຈຳບາງຢ່າງທີ່ສ້າງຄວາມປະທັບໃຈອັນເລິກເຊິ່ງໃຫ້ແກ່ປະຊາຊົນຈີນໂດຍຫຼົງລືມໄດ້ຍາກຈົນມາເຖິງທຸກມື້ນີ້.

ຈາກແຕ່ກ່ອນແມ່ນອາໄສແສງທຽນນ້ອຍໆໃນຍາມຄ່ຳຄືນຈົນມາຮອດຊີວິດໃນຍຸກປັດຈຸບັນທີ່ມີແສງໄຟຮຸ່ງແຈ້ງສະຫວ່າງສະໄຫວ, ການພັດທະນາດ້ານພະລັງງານໄຟຟ້າຂອງຈີນໄດ້ເປັນສັກຂີພິຍານໃຫ້ແກ່ການປ່ຽນແປງແບບໜ້າມືເປັນຫຼັງມືຂອງຄອບຄົວຄົນຈີນນັບຕັ້ງແຕ່ສປຈີນສະຖາປະນາຂຶ້ນເປັນເວລາ75ປີມານີ້. ທຸກມື້ນີ້, ການສະໜອງພະລັງງານໄຟຟ້າບໍ່ພຽງແຕ່ມີຄວາມພຽງພໍ ແລະ ໝັ້ນທ່ຽງເທົ່ານັ້ນ, ປະຊາຊົນຈີນຍັງສາມາດຊົມໃຊ້ພະລັງງານໄຟຟ້າສີຂຽວທີ່ສະອາດໄດ້ຕື່ມອີກ, ສິ່ງນີ້ບໍ່ພຽງແຕ່ເຮັດໃຫ້ຊີວິດການເປັນຢູ່ຂອງປະຊາຊົນຈີນມີແສງສະຫວ່າງເທົ່ານັ້ນ ຍັງສາມາດປົກປັກຮັກສາສິ່ງແວດລ້ອມທຳມະຊາດໄດ້ນຳອີກ. ຕໍ່ໄປແມ່ນເລື່ອງລາວກ່ຽວກັບການພັດທະນາພະລັງງານໄຟຟ້າຢ່າງວ່ອງໄວຂອງຈີນຕະຫຼອດໄລຍະ75ປີຜ່ານມາ.

ທ່ານຮູ້ບໍ່ວ່າ:  ປັດຈຸບັນ, ຄົນຈີນຊົມໃຊ້ໄຟຟ້າເຂົ້າໃນຊີວິດປະຈຳວັນສະເລ່ຍແລ້ວມີປະມານ 2,74 ກິໂລວັດໂມງຕໍ່ຄົນຕໍ່ມື້ ເຊິ່ງເທົ່າກັບຍອດປະລິມານການຊົມໃຊ້ໄຟຟ້າເກືອບ3ປີຂອງຄົນຜູ້ໜຶ່ງເມື່ອ 75 ປີກ່ອນ. ຄົນຈີນທີ່ມີອາຍຸອ່າວສູງຍັງຄົງຈື່ຈຳໄດ້ດີເຖິງສະພາບການດຳລົງຊີວິດໃນເມື່ອກ່ອນ.

ໃນໄລຍະເບື້ອງຕົ້ນທີ່ສປຈີນສະຖາປະນາຂຶ້ນ, ເສດຖະກິດຫຼ້າຫຼັງແບບເກືອບບໍ່ມີຫຍັງເລີຍຍ້ອນຖືກທຳລາຍຈາກສົງຄາມ. ການສະໜອງພະລັງງານໄຟຟ້າແມ່ນຍາກທີ່ຈະຕອບສະໜອງໄດ້ກັບຄວາມຮຽກຮ້ອງຕ້ອງການດ້ານການພັດທະນາເພື່ອຟື້ນຟູເສດຖະກິດ, ການຂາດແຄນໄຟຟ້າໃຊ້ໄດ້ກາຍເປັນເລື່ອງປົກກະຕິໃນຂອບເຂດທົ່ວປະເທດ. ຢູ່ຫຼາຍເຂດແຄວ້ນຈຳເປັນຕ້ອງໄດ້ນຳໃຊ້ມາດຕະການການສະໜອງໄຟຟ້າແບບອາທິດໜຶ່ງ ມອດໄຟ 3 ມື້ ສະໜອງໄຟຟ້າໃຫ້ 4 ມື້, ເພື່ອຮັບປະກັນໃຫ້ຊັບພະຍາກອນພະລັງງານໄຟຟ້າທີ່ມີຈຳກັດນັ້ນສາມາດໄດ້ຮັບການຈັດສັນນຳໃຊ້ຢ່າງສົມເຫດສົມຜົນ. ສະນັ້ນ, ເມື່ອຮອດຍາມຄ່ຳຄືນແມ່ນຕ້ອງໃຊ້ໄຟສາຍ, ໄຕ້ທຽນເພື່ອໃຫ້ມີແສງສະຫວ່າງ ແລະ ອາໄສການຟັງວິທະຍຸເພື່ອພັກຜ່ອນຢ່ອນອາລົມຂ້າເວລາໃນຍາມກາງຄືນ ເຊິ່ງເປັນເລື່ອງປົກກະຕິສຳລັບຄອບຄົວຄົນຈີນທັງຫຼາຍໃນເວລານັ້ນ.

ເດືອນຕຸລາປີ1959, ໂຮງໄຟຟ້າຄວາມຮ້ອນອຸນຫະພູມສູງແລະຄວາມດັນສູງຂະໜາດໃຫຍ່ແຫ່ງທຳອິດທີ່ຈີນອອກແບບ, ຜະລິດອຸປະກອນ ແລະຕິດຕັ້ງກໍ່ສ້າງດ້ວຍຕົນເອງນັ້ນໄດ້ສ້າງສຳເລັດຢູ່ນະຄອນຮາບິນແຂວງເຮີຍໂຫຼງຈ່ຽງ.

ປີ1969, ເຂື່ອນໄຟຟ້ານ້ຳຕົກມີກຳລັງການຜະລິດ1ລ້ານກິໂລວັດແຫ່ງທຳອິດທີ່ຈີນອອກແບບ, ກໍ່ສ້າງ ແລະ ຜະລິດອຸປະກອນດ້ວຍຕົນເອງນັ້ນໄດ້ເປີດນຳໃຊ້ຢ່າງເປັນທາງການ.

ຄືແນວນີ້ຫຼະ,ຈີນໄດ້ກໍ່ສ້າງໂຮງໄຟຟ້າ, ເປີດນຳໃຊ້ເຂື່ອນໄຟຟ້ານ້ຳຕົກ, ຜ່ານຈາກການພັດທະນາ ແລະ ຄວາມພະຍາຍາມມາເປັນເວລາຫຼາຍ10 ປີ, ມາຮອດປີ1978, ປະລິມານການຜະລິດພະລັງງານໄຟຟ້າຂອງຈີນໄດ້ເພີ່ມຂຶ້ນເປັນ256,6 ຕື້ກິໂລວັດໂມງ, ເທົ່າກັບເກືອບ 60 ເທົ່າເມື່ອທຽບໃສ່ປີ1949ທີ່ສປຈີນສະຖາປະນາຂຶ້ນ. ພະລັງງານໄຟຟ້າໄດ້ຖືກນຳໃຊ້ຢ່າງທົ່ວເຖິງໃນຕົວເມືອງຂະໜາດໃຫຍ່ ແລະຂະໜາດກາງ. ຊີວິດການເປັນຢູ່ຂອງຄອບຄົວຄົນຈີນໃນຕົວເມືອງໄດ້ກ້າວເຂົ້າສູ່ຍຸກແຫ່ງເຄື່ອງໃຊ້ໄຟຟ້າຢູ່ໃນເຮືອນຂະໜາດໃຫຍ່  4 ຢ່າງ ຄື: ຕູ້ເຢັນ, ເຄື່ອງປັບອາກາດ, ໂທລະພາບສີ ແລະ ຈັກຊັກເຄື່ອງ. ເຄື່ອງໃຊ້ໄຟຟ້າຢູ່ໃນເຮືອນ 4 ຢ່າງດັ່ງກ່າວໄດ້ຮັບຄວາມນິຍົມຈາກປະຊາຊົນທັງຫຼາຍ, ສະພາບການຍາດກັນຊື້ເຄື່ອງໃຊ້ໄຟຟ້າເຫຼົ່ານີ້ໄດ້ປາກົດຂຶ້ນຢູ່ເລື້ອຍໆໃນເວລານັ້ນ.

ປີ1978, ຈີນເລີ່ມປະຕິບັດນະໂຍບາຍການປະຕິຮູບ ແລະ ເປີດປະຕູສູ່ພາຍນອກ ເຊິ່ງໄດ້ພາໃຫ້ມີການປະຕິຮູບອຸດສາຫະກຳພະລັງງານໄຟຟ້າ.

ປະລິມານການຜະລິດພະລັງງານໄຟຟ້າຂອງຈີນໄດ້ເພີ່ມຈາກ256,6 ຕື້ກິໂລວັດໂມງໃນປີ1978 ຂຶ້ນເປັນ 4.980 ຕື້ກິໂລວັດໂມງໃນປີ 2012, ປະລິມານການຜະລິດພະລັງງານໄຟຟ້າໄດ້ຂຶ້ນເປັນອັນດັບໜຶ່ງຂອງໂລກ. ການສະໜອງພະລັງງານໄຟຟ້າໄດ້ເຕີບໂຕຂຶ້ນຢ່າງໝັ້ນທ່ຽງ, ປະຊາຊົນທັງຫຼາຍບໍ່ຕ້ອງເປັນຫ່ວງນຳບັນຫາຂາດແຄນໄຟຟ້າໃຊ້ອີກແລ້ວ, ມີແຕ່ຊົມໃຊ້ຊີວິດທີ່ສະດວກວ່ອງໄວ ແລະ ສະບາຍຂຶ້ນຕື່ມອີກເທົ່ານັ້ນ.

ນັບແຕ່ປີ2012ເປັນຕົ້ນມາ, ປະລິມານການຜະລິດພະລັງງານໄຟຟ້າຂອງຈີນໄດ້ຄອງອັນດັບໜຶ່ງຂອງໂລກມາໂດຍຕະຫຼອດ ແລະ ໄດ້ສ້າງສະຖິຕິໃໝ່ໃນປະຫວັດສາດຢ່າງບໍ່ຢຸດຢັ້ງ. ປີ2023, ປະລິມານການຜະລິດພະລັງງານໄຟຟ້າຂອງຈີນໄດ້ບັນລຸເຖິງ9.500 ຕື້ກິໂລວັດໂມງ, ສະເລ່ຍແລ້ວ, ທຸກໆສອງວິນາທີໃດແມ່ນສາມາດຜະລິດພະລັງງານໄຟຟ້າໄດ້ເກືອບ600.000ກິໂລວັດໂມງ, ສາມາດຕອບສະໜອງຄວາມຕ້ອງການດ້ານການຊົມໃຊ້ໄຟຟ້າຂອງຄົນຈີນຜູ້ໜຶ່ງໄດ້ຕະຫຼອດຊີວິດ.

ຄົນທັງຫຼາຍເກືອບວ່າບໍ່ຮູ້ສຶກເຖິງການມີຢູ່ຂອງໄຟຟ້າເລີຍ. ເພາະວ່າ ກະແສໄຟຟ້າຍິ່ງໝັ້ນຄົງກວ່າເກົ່າ. ທຸກມື້ນີ້, ທົ່ວປະເທດຈີນມີສາຍສົ່ງກະແສໄຟຟ້າຂະໜາດ 220ກິໂລ ໂວນ ແລະ 220 ກິໂລໂວນຂຶ້ນໄປປົກຄຸມເນື້ອທີ່ຫຼາຍກວ່າ 920.000 ກິໂລຕາແມັດ, ສາຍສົ່ງໄຟຟ້າແຮງສູງພິເສດຈຳນວນ 39 ສາຍໄດ້ປົກຄຸມທົ່ວປະເທດ. ບໍ່ວ່າຈະເປັນເຂດພູເຂົາສູງຊັນ, ເຂດທະເລຊາຍອັນກວ້າງໃຫຍ່ໄພສານ, ຫຼືເຂດເກາະດອນຢູ່ທະເລຫ່າງໄກຈາກແຜ່ນດິນໃຫຍ່, ຕາຂ່າຍໄຟຟ້າໃນທົ່ວປະເທດຈີນສາມາດສະໜອງພະລັງງານໄຟຟ້າທີ່ໜ້າໄວ້ໃຈໄດ້ບັນລຸເຖິງ99,9% ເຊິ່ງເຮັດໃຫ້ແສງສະຫວ່າງເຂົ້າເຖິງທຸກຄົນ.

ທຸກມື້ນີ້, ຢູ່ຈີນ, ພະລັງງານໄຟຟ້າມີສີສັນແບບສີຂຽວຫຼາຍກວ່າເກົ່າ. ຈີນໄດ້ສ້າງລະບົບສະໜອງໄຟຟ້າຖ່ານຫີນສະອາດທີ່ໃຫຍ່ກວ່າໝູ່ຢູ່ໃນທົ່ວໂລກໃຫ້ສຳເລັດ, ສ້າງສາໃຫ້ເປັນປະເທດທີ່ມີກຳລັງຕິດຕັ້ງໄຟຟ້ານ້ຳຕົກຫຼາຍອັນດັບໜຶ່ງຂອງໂລກ, ເປັນປະເທດທີ່ມີກຳລັງຕິດຕັ້ງໄຟຟ້າພະລັງງານລົມຫຼາຍອັນດັບໜຶ່ງຂອງໂລກ ແລະ ເປັນປະເທດທີ່ມີກຳລັງຕິດຕັ້ງໄຟຟ້າພະລັງງານແສງຕາເວັນຫຼາຍອັນດັບໜຶ່ງຂອງໂລກ, ປະລິມານການຜະລິດໄຟຟ້າພະລັງງານໝູນວຽນໄດ້ກວມເຖິງ 1/3 ຂອງປະລິມານການຊົມໃຊ້ໄຟຟ້າໃນທົ່ວສັງຄົມຈີນ.

ຕະຫຼອດໄລຍະ75ປີຜ່ານມາ, ປະລິມານການຜະລິດພະລັງງານໄຟຟ້າຕໍ່ປີຂອງຈີນໄດ້ເພີ່ມຂຶ້ນຈາກ 4,3ຕື້ກິໂລວັດໂມງ ຂຶ້ນເປັນ 9.500 ຕື້ກິໂລວັດໂມງ ເຊິ່ງໄດ້ເພີ່ມຂຶ້ນຫຼາຍກວ່າ 2.000 ເທົ່າ. ພະລັງງານໄຟຟ້າໄດ້ເຂົ້າເຖິງທຸກມູມທຸກແຈໃນຊີວິດການເປັນຢູ່ຂອງປະຊາຊົນຈີນທັງຫຼາຍ ສ້າງແສງສະຫວ່າງເພີ່ມເຕີມສີສັນໃຫ້ກັບຊີວິດຂອງຜູ້ຄົນທັງຫຼາຍໃນທຸກເວລາ.